ខេត្តសៀមរាប ៖ បុរសអ្នករត់តាក់ស៊ីម្នាក់ ត្រូវបានជនជាតិជប៉ុន២នាក់សម្លាប់ដោយអារ.ក ខណៈជួលរថយន្តជិះមកពីក្រុងប៉ោយប៉ែត ខេត្តបន្ទាយមានជ័យ គឺសម្លាប់ប្លន់យករថយន្ត ។ បុរសអ្នករត់តាក់ស៊ីត្រូវបានអារ.កសម្លាប់យ៉ាងព្រៃផ្សៃ នៅក្នុងភូមិសាស្ត្រស្រុកពួកខេត្តសៀមរាប…
ខេត្តសៀមរាប ៖ បុរសអ្នករត់តាក់ស៊ីម្នាក់ ត្រូវបានជនជាតិជប៉ុន២នាក់សម្លាប់ដោយអារ.ក ខណៈជួលរថយន្តជិះមកពីក្រុងប៉ោយប៉ែត ខេត្តបន្ទាយមានជ័យ គឺសម្លាប់ប្លន់យករថយន្ត ។ បុរសអ្នករត់តាក់ស៊ីត្រូវបានអារ.កសម្លាប់យ៉ាងព្រៃផ្សៃ នៅក្នុងភូមិសាស្ត្រស្រុកពួកខេត្តសៀមរាប តែសកម្មដ៏សាហាវដែលស្មានមិនដល់ ខណៈពេលជនជាតិជប៉ុនបើករថយន្តគេចខ្លួនបានចម្ងាយប្រហែល៣០០ម៉ែត្រ ក៏បានបុកជាមួយគោយន្ដកន្ដ្រៃដឹកស្រូវ ដែលធ្វើដំណើរស្របទិសគ្នា ធ្វើឱ្យរថយន្ដដាច់កង់ម្ខាង ហើយរេចង្កូតទៅបុកតូបលក់គុយទាវ ទើបទៅមុខលែងរួច និងត្រូវបានសមត្ថកិច្ចធ្វើការឃាត់ខ្លួនបានភ្លាមៗ បង្កឱ្យមានការភ្ញាក់ ផ្អើលមួយ ដោយសារតែក្រុមជនដៃដល់ជាឃាតករគឺជាជនបរទេស ។
ហេតុការណ៍អារ.កសម្លាប់អ្នករត់តាក់ស៊ីនោះ បានកើតឡើងនៅវេលាម៉ោង៥នាទីល្ងាចថ្ងៃទី១៧ មីនា ស្ថិតនៅលើកំណាត់ផ្លូវជាតិលេខ៦ ត្រង់ចំណុចជញ្ជីងថ្លឹងរថយន្តក្នុងទឹកដីភូមិគោកដូង ឃុំពួក ស្រុកពួក ខេត្ត សៀមរាប ។ លោកវរសេនីយ៍ឯក ទេព ពុំសែន អធិការនគរបាលស្រុកពួកមានប្រសាសន៍ឱ្យដឹងថា ករណីសម្លាប់អ្នករត់តាក់ស៊ីប្លន់យករថយន្តនេះ គឺបង្កឡើងដោយជនសង្ស័យចំនួន២នាក់ ជាជនជាតិជប៉ុន ១-ឈ្មោះ ISHIDA REIMON ភេទប្រុស អាយុ២៤ឆ្នាំ ២-ឈ្មោះ NAKA KUKI RYUJI ភេទប្រុស អាយុ២៤ឆ្នាំ (ជាជនដៃដល់) បានចូលមកកម្ពុជានៅថ្ងៃទី១៦ មីនា ឆ្នាំ២០១៩ តាមច្រកទ្វារអន្តរជាតិប៉ោយប៉ែត បានធ្វើសម្មភាពអារ.ក ជនរងគ្រោះ ឈ្មោះ ហ៊ឹម ចាន់ ភេទប្រុស អាយុ៤០ឆ្នាំ ជាអ្នករត់តាក់ស៊ីសៀមរាប សិរីសោភ័ណ បាត់ដំបង ប៉ោយប៉ែត និងច្រកឡែប បើករថយន្ដម៉ាកហាយឡែនឌ័រ ពណ៌ស្ករ ស្លាកលេខ ភ្នំពេញ ២AB ៥២១៨ ។ ជនរងគ្រោះមានប្រពន្ធឈ្មោះ សុខ ចាន់ធឿន អាយុ៣៨ឆ្នាំ មានកូន៤នាក់ ប្រុស៣នាក់ ស្រីម្នាក់ មានទីលំនៅភូមិជាន់ត្រាច ឃុំឈូកដាច់ ស្រុកបារាយណ៍ ខេត្តកំពង់ធំ បច្ចុប្បន្នស្នាក់នៅភូមិបឹងដូនប៉ា សង្កាត់ស្លរក្រាម ក្រុងសៀមរាប ។
លោកអធិការបានបញ្ជាក់ទៀតថា ក្រោយពេលសម្លាប់ដោយអារ.កជនរងគ្រោះក្នុងរថយន្តរួច ក៏បានទម្លាក់ជនរងគ្រោះចេញពីក្នុងរថយន្ដនៅចំណុចកើតហេតុខាងលើ ហើយជនសង្ស័យ ក៏បានបើករថយន្ដគេចខ្លួនទៅទិសខាងកើត ខណៈរថយន្តប្រឡាក់ដោយឈាមជនរងគ្រោះ ។ លុះបើករត់បានចម្ងាយប្រហែល៣០០ម៉ែត្រ ក៏បានទៅបុកគូទគោយន្ដកន្ដ្រៃដឹកស្រូវ ដែលធ្វើដំណើរស្របទិសគ្នា ។ ពេលនោះរថ យន្ដបើកទៅមុខលែងរួច ទើបធ្វើឱ្យជនជាតិជប៉ុនទាំង២នាក់ បានចុះរត់គេចខ្លួន ដោយបន្សល់ទុករថយន្តនៅកន្លែងកើតហេតុ ហើយត្រូវបានកម្លាំងប៉ូលិសដេញតាមឃាត់ខ្លួនបានភ្លាមៗទាំង២នាក់ យកមកកាន់អធិការដ្ឋាននគរបាលស្រុក ។ លោកអធិការបានបញ្ជាក់បន្ថែមទៀតថា ករណីអារ.កសម្លាប់នេះបណ្ដាលឱ្យជនរងគ្រោះឈ្មោះ ហ៊ឹម ចាន់ ស្លាប់នៅកន្លែងកើតហេតុ ចំណែកអ្នកជិះគោយន្ដកន្ដ្រៃ២នាក់រងរបួស ស្រាល ។ ក្រោយការចាប់ខ្លួនសមត្ថកិច្ចរងដកហូតប៉ាស្ព័រចំនួន២សន្លឹក របស់ជនដៃដល់ជនជាតិជប៉ុននេះនិងរថយន្ដ១គ្រឿងរបស់ជនរងគ្រោះ ។
ជនសង្ស័យជាជនជាតិជប៉ុនទាំង២នាក់ ត្រូវបានកម្លាំងជំនាញរៀបចំកសាងសំណុំរឿងបញ្ជូនទៅតុលា ការខេត្ត ដើម្បីចាត់ការតាមផ្លូវច្បាប់ ។ ចំណែកសាកសពជនរងគ្រោះ ត្រូវបានសមត្ថកិច្ចធ្វើការប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ។ សូមបញ្ជាក់ថា ក្រោយពេលកើតហេតុភ្លាមៗ កាលពីយប់ថ្ងៃដដែលនោះគ្រប់គ្នាមានការយល់ច្រឡំថា ជនបរទេសប្លន់រថយន្តដែលចាប់បាននោះជាជនជាតិចិន ព្រោះឃើញសាច់.ស ប៉ុន្តែការពិតគឺជាជនជាតិជប៉ុនទេ ។ នេះអាចចាត់ទុកថា ជាលើកដំបូងហើយដែលការប្រព្រឹត្តបទល្មើសព្រហ្មទណ្ឌធ្ងន់ធ្ងរ ត្រូវបានធ្វើសកម្មភាពដោយជនជាតិជប៉ុន ដែលពលរដ្ឋខ្មែរគ្រប់រូបស្រឡាញ់រាប់អានព្រមទាំងស្មានមិនដល់ ។ ទោះបីជាបែបនេះក្តី គឺវាជារឿងបុគ្គល ។ គិតត្រឹមម៉ោង២រសៀលថ្ងៃទី១៨ មីនា មិនទាន់ទទួលបានចម្លើយពីជនដែលត្រូវចាប់ខ្លួនទាក់ទិននឹងមូលហេតុនៃការសម្លាប់ប្លន់អ្នកបើកតាក់ស៊ីនេះនៅឡើយទេ ៕
ចែករំលែកព័តមាននេះ