សៀមរាប ៖ អ្នកភូមិជិះម៉ូតូជក់បារីមកដល់ចំណុចព្រៃស្ងាត់បានបោះកន្ទុយបារីចូលទៅក្នុងព្រៃចំដីឡូតិ៍របស់ម្ចាស់ក្សត្រីនរោត្តមម៉ារី រណឫទ្ធិ នៅក្នុងតំបន់មណ្ឌល៣ ដែលខាងអាជ្ញាធរអប្សរាជាអ្នកកាន់កាប់ធ្វើឱ្យភ្លើងឆេះអស់ចំនួន១ហិកតា ក្នុងចំណោម៣ហិកតា ទើបឃើញមានរបងថ្មក្រាក់ធំៗព័ន្ធជុំវិញដីឡូតិ៍នោះបង្កឱ្យមានការភ្ញាក់ផ្អើលដល់សមត្ថកិច្ចមូលដ្ឋាន និងសមត្ថកិច្ចចម្រុះចុះទៅជួយពន្លត់ទាន់ពេលវេលាកុំអីរាលដាលដល់ផ្ទះប្រជាពលរដ្ឋជាក់ជាមិនខាន ។
ហេតុការឆេះព្រៃរបស់អ្នកធំនោះបានកើតឡើងនៅវេលាម៉ោង១៥និង១០នាទីរសៀលថ្ងៃទី១១ ខែមីនា ឆ្នាំ២០១៩ ស្ថិតនៅក្រុមទី១៦ ភូមិមណ្ឌល៣ សង្កាត់ស្លក្រាម ក្រុង-ខេត្តសៀមរាប ដែលជាតំបន់របស់អាជ្ញាធរអប្សរាកាន់កាប់សព្វថ្ងៃនេះ ។
បើតាមប្រសាសន៍របស់លោកឧត្តមសេនីយត្រី ភឹង សម្បត្តិ ស្នងការរងទទួលការិយាល័យបង្ការពន្លត់អគ្គិភ័យ និងសង្គ្រោះបានប្រាប់តាមទូរស័ព្ទនៅរសៀលថ្ងៃទី១២ ខែមីនា ឆ្នាំ២០១៩នេះថា មុនពេលកើតហេតុមានអាជ្ញាធររមូលដ្ឋានបានរាយការណ៍មកកម្លាំងជំនាញរបស់ស្នងការខេត្តទើបលោកបានដឹកនាំកម្លាំងការិយាល័យពន្លត់អគ្គិភ័យរបស់ស្នងការនរគបាលខេត្ត ចុះសហការជាមួយសមត្ថកិច្ចចម្រុះចុះជួយអន្តរាគមន៍ដោយប្រើរថយន្តសរុបអស់ចំនួន៧គ្រឿងក្នុងនោះមានរថយន្តរបស់ស្នងការខេត្តចំនួន២គ្រឿង រថយន្តរបស់នគរបាលបេតិកភ័ណ្ឌ១គ្រឿង រថយន្កកងរាជអាវុធហត្ថខេត្តចំនួន២គ្រឿង និងរថយន្តរបស់អាជ្ញាធរជាតិអប្សរាចំនួន២គ្រឿងបាញ់អស់ទាំង៧គ្រឿងទើបជួយពន្លត់បានជាស្ថារពមិនបង្កឱ្យមានការរីករាលដាលដល់ផ្ទះប្រជាពលរដ្ឋ ឬខូចខាតទ្រព្យសម្បត្តិប្រជាពលរដ្ឋនោះឡើយ ។
លោកបានបញ្ជាក់ថា ម្ចាស់កម្មសិទ្ធិដីឡូតិ៍ដែលត្រូវភ្លើងឆេះនោះ គឺជារបស់ម្ចាស់ក្សត្រីនរោត្តមម៉ារីរណឫទ្ធិ ។ លោកបានបញ្ជាក់បន្ថែមថា ការខូចខាតនៃការឆេះនេះអស់០១ហិកតា ក្នុងផ្ទៃដីទំហំសរុបចំនួន០៣ហិកតា ។ មូលហេតុ បណ្ដាលមកពីអ្នកជិះម៉ូតូបោះកន្ទុយបារីចោលទៅក្នុងព្រៃទើបបណ្តាលឱ្យឆេះ ។
លោក ឧត្តមសេនីយត្រីស្នងការរងសុំសំណូមពរទៅដល់បងប្អូនប្រជាពលរដ្ឋទូទាំងខេត្តសៀមរាបទាំងអស់មេត្តាចូលរួមបង្ការទប់ស្កាត់នូវគ្រោះអគ្គិភ័យទាំងអស់គ្នា និងប្រុងប្រយ័ត្ន នូវភ្លើងទៀនភ្លើងធូប ភ្លើងចង្កៀង ភ្លើងចង្គ្រាន ភ្លើងបារី ភ្លើងអគ្គីសនី ប្រេងសាំង ហ្គាស ដែលជាសារធាតុគីមីងាយឆេះ ងាយផ្ទុះ និងសារធាតុដទៃទៀត ដើម្បីសន្តិសុខសុវត្ថិភាពផ្ទះ និងទ្រព្យសម្បត្តិរបស់យើងទាំងអស់គ្នា ព្រោះរដូវនេះ គឺជារដូវប្រាំង ហើយក៏ជារដូវក្តៅខ្លាំងផងដែរ ។
ជុំវិញករណីភ្លើងឆេះព្រៃនៅក្នុងតំបន់របស់អាជ្ញាធរអប្សរាកាន់កាប់សព្វថ្ងៃនេះ សូម្បីតែរុយក៏មិនអាចហ៊ានទៅជិតផង កុំថាឡើយពលរដ្ឋលួចធ្វើផ្ទះនោះ ព្រោះកម្លាំងសមត្ថកិច្ចរបស់មន្ត្រីអាជ្ញាធរអប្សរានៅជុំវិញបរិវេណទាំងយប់ទាំងថ្ងៃ ក្នុងតំបន់ហាមឃាត់នោះទាំងអស់ ក៏ប៉ុន្តែហេតុអ្វីបានជាមានផ្ទះថ្មធំៗ និងមានរបងថ្មធំៗទៀតផង តើខាងអគ្គនាយកនៃអាជ្ញាធរជាតិអប្សរាបើកភ្លើងខៀវឱ្យអ្នកមានអំណាច ឬមន្ត្រីថា្នក់ក្រោមជាអ្នកបើកភ្លើងខៀវទៅវិញ ៕
ចែករំលែកព័តមាននេះ