ខេត្តព្រៃវែង ៖ បុរសជាកសិករធ្វើស្រែម្នាក់នៅស្រុកស្វាយអន្ទរបានស្លាប់បាត់បង់ជីវិតដោយសារតែត្រូវដីបាក់សង្កត់ ខណៈពេលដែលរូបគេកំពុងជីកអណ្តូងយកទឹកធ្វើស្រែ ។ ហេតុការណ៍នេះបានកើតឡើង កាលពីវេលាម៉ោង១០និង៣០នាទីព្រឹកថ្ងៃទី០៥ មីនា នៅចំណុចវាលស្រែខាងលិចភូមិខ្សោកកណ្តាល ចម្ងាយប្រមាណជា២គីឡូម៉ែត្រ ស្ថិតក្នុងឃុំពពឹស ស្រុកស្វាយអន្ទរ ខេត្តព្រៃវែង ។
ជនរងគ្រោះមានឈ្មោះ ព្រុំ ស៊ា អាយុ២៩ឆ្នាំ មានទីលំនៅក្នុងភូមិកើតហេតុខាងលើ ។ ប្រភពព័ត៌មានពីលោកអ៊ុង ផាន អធិការស្រុកស្វាយអន្ទរបានឲ្យដឹងថា ដោយសារតែខ្វះទឹកធ្វើស្រែ ប្រជាកសិករនៅក្នុងស្រុកស្វាយអន្ទរ អ្នកមានលទ្ធភាព គឺនាំគ្នាបុកអណ្តូងបូមទឹកដាក់ស្រែ ចំណែកជនរងគ្រោះដោយសារតែជីវភាពក្រីក្រគ្មានលុយបុកអណ្តូងបានជីកអណ្តូងដោយខ្លួនឯង ទំហំ៤ម៉ែត្រ ជម្រៅ៨ម៉ែត្រ សម្រាប់បូមទឹកដាក់ស្រែប្រាំង ។
លោកអធិការបានបន្តថា ជនរងគ្រោះជីកអណ្តូងបាន១ហើយ កាលពីប៉ុន្មានឆ្នាំមុន ប៉ុន្តែដោយសារឆ្នាំនេះអាកាសធាតុក្តៅខ្លាំងអណ្តូង១មិនអាចផ្តល់ទឹកគ្រប់គ្រាន់ ទើបជនរងគ្រោះជីកអណ្តូង១ទៀត នៅក្បែរគ្នានោះដោយមានទំហំ៤ម៉ែត្រ និងជម្រៅ៨ម៉ែត្រដូចគ្នា ។ លោកអ៊ុង ផាន បានបញ្ជាក់ថា អណ្តូងទាំង២ត្រូវបានជីករួចហើយ ប៉ុន្តែដោយចង់អោយងាយស្រួលក្នុងការបូមទឹកជនរងគ្រោះបានចុះទៅចោះទម្រុះអណ្តូងទាំង២បង្កប់ទុយោទឹកភ្ជាប់ចូលគ្នា ហើយក្នុងពេលដែលកំពុងចោះទម្រុះអណ្តូងនោះទំនងជាអណ្តូងទើបជីកថ្មី ដីមិនទាន់រឹង ទើបធ្វើអោយបាក់ដី ហើយក៏សង្កត់ជនរងគ្រោះជាប់នៅក្នុងអណ្តូងនោះតែម្តង ។
ភ្លាមៗនោះក្រោយពីទទួលបានព័ត៌មានពីក្រុមគ្រួសារជនរងគ្រោះ លោកអធិការបានហៅអេស្ការទ័រ (អាអ៊ិច ) ទៅកាយដីចេញជួយសង្គ្រោះភ្លាមៗដែរ ប៉ុន្តែដោយសារតែជនរងគ្រោះកប់ក្នុងអណ្តូងជម្រៅដល់ទៅ៨ម៉ែត្រទម្រាំជីកកាយដល់ គឺជនរងគ្រោះបានដាច់ខ្យល់ស្លាប់បាត់ទៅហើយទើបបានត្រឹមយកសពប្រគល់អោយក្រុមគ្រួសារយកទៅធ្វើបុណ្យតាមប្រពៃណីប៉ុណ្ណោះ ៕
ចែករំលែកព័តមាននេះ