រាជធានីភ្នំពេញ៖ យូរខែមកហើយតារាចម្រៀង ឈឿន ឧត្តម ហាក់ស្ងប់ស្ងាត់ពីឆាកសិល្បៈចម្រៀង ។ គេកម្រឃើញលោកឧត្តមចូលរួមកម្មវិធីទូរទស្សន៍ដូចមុនណាស់ តែលោកច្រៀងជាប្រចាំនៅភោជនីយដ្ឋានមួយក្បែរស្ថានទូតចិន ។
ទោះជាយ៉ាងណាក្តីលោក ឈឿន ឧត្តម ត្រៀមចេញទៅច្រៀងនៅអូស្ត្រាលីនាពាក់កណ្តាលខែមីនានេះ វាបង្ហាញថាការងារសិល្បៈក្នុងស្រុកមិនសូវល្អ តែក្រៅប្រទេសនៅតែពេញនិយម។
លោកឈឿន ឧត្ដម គឺជាតារាចម្រៀងផ្នែកចម្រៀងមនោសញ្ចេតនា ។
លោកបានចូលប្រឡូកក្នុងពិភពសិល្បៈនាឆ្នាំ១៩៩៨ តាមរយៈការប្រឡងចម្រៀងក្នុងកម្មវិធី«គន្លងតារា»របស់ស្ថានីយទូរទស្សន៍ប៉ុស្ថិ៍លេខ៥ ដោយលោកទទួលបានជ័យលាភីលេខ២ ។ ក្រោយមក លោកក៏មានកេរ្តិ៍ឈ្មោះល្បីក្នុងផលិតកម្មរស្មីស្ទឹងសង្កែ មានដូចជាបទ«ខ្លាចរកាដែក» «ឱបស្រមោល» «រនោចខែប្រាំង» «ទឹកភ្នែកជនពាល» «ទូរស័ព្ទអ្នកណា ?» «ប្រពន្ធនរណាគេន៎»ជាដើម ។
មួយរយៈចុងក្រោយនេះ ការងារសិល្បៈរបស់លោកឈឿន ឧត្ដម ហាក់ដូចជាស្ងប់ស្ងាត់ ធ្វើឲ្យទស្សនិកជនហាក់មានការងឿងឆ្ងល់ថា តើលោកបាត់ទៅណា ? លោកបានបញ្ជាក់កាលពីពេល ថ្មីៗកន្លងមកថា តាមការណ៍ពិតលោកមិនបានបាត់ទៅណាទេ តែដោយសារតែមានតារាចម្រៀងជំនាន់ក្រោយច្រើន ទើបបានជាមិនសូវមានគេអញ្ជើញឲ្យឡើងច្រៀងតាមស្ថានីយទូរទស្សន៍ ។ ម្យ៉ាងទៀតលោកមានជំងឺច្រមុះ និងបំពង់កអស់រយៈ៤ឆ្នាំហើយ ទើបការងារសិល្បៈស្ងប់ស្ងាត់បែបនេះ ។ ទោះជាយ៉ាងណាក្តីពេលនេះលោកបានជាសះស្បើយពីជំងឺហើយ ។
លោកឈឿន ឧត្តម មានវ័យ៤៣ឆ្នាំ ។ លោកឈឿន ឧត្តម ចាប់អាជីពជាតារាចម្រៀងប្រចាំភោជនីយដ្ឋានពិភពរាត្រី រួមជាមួយតារាចម្រៀងជើងចាស់ជាច្រើនដួង ។
លោកឈឿន ឧត្តម និយាយថា «ការងារសិល្បៈក្នុងស្រុករបស់ខ្ញុំមិនត្រូវគេមើលរំលងឡើយ តែក៏មិនប្រជែងជាមួយ ប្អូនៗឡើយព្រោះធម្មតាតែងតែមានរលកមុនរលកក្រោយយើងមានតែបើកចិត្តចែករំលែកភាពជោគជ័យចំពោះអ្នកសិល្បៈ ក្រោយៗ ។ យ៉ាងណាមិញខ្ញុំពិតជាអរគុណទៅដល់ជនរួមជាតិខ្មែរនៅឯនាយសមុទ្រទាំងអស់នៅតែពេញចិត្តអញ្ជើញខ្ញុំចេញច្រៀងជាប្រចាំមិនសូវជាអាក់ខានពិតជាមានទឹកចិត្តបន្តទៀតដើរលើវិថីមួយនេះ ។ ត្រៀមចាកចេញទៅប្រទេសអូស្ត្រាលីរយៈពេល៣ខែនៅពាក់កណ្តាលខែមីនានេះសង្ឃឹមថាពុកម៉ែបងប្អូនចូលរួមរាំលេងកម្សាន្តទាំងអស់គ្នាខ្មែរតែមួយ»៕
ចែករំលែកព័តមាននេះ