ខេត្តស្វាយរៀង ៖ ផ្ទុះទំនាស់បែកផ្សែងរឿងសង់ផ្ទះជញ្ជាំងជាប់គ្នាភាគីម្ខាងវាយកម្ទេចជញ្ជាំងដើម្បីសង់ផ្ទះថ្មី ឯភាគីម្ខាងទៀតមិនឲ្យវាយដោយជញ្ជាំងផ្ទះប្រើប្រាស់រួមគ្នា២០ឆ្នាំមកហើយបើវាយជញ្ជាំងរួមចោល តើគាត់មានជញ្ជាំងឯណាវា និងចំហរជញ្ជាំងចោរចូលលួចទ្រព្យសម្បត្តិអស់មិនខាន ។ ករណីអាជ្ញាធរចុះដោះស្រាយវិវាទជញ្ជាំងផ្ទះនេះកើតឡើង កាលពីវេលាម៉ោង៩និង៣០នាទីព្រឹកថ្ងៃទី០៤ មីនា…
ខេត្តស្វាយរៀង ៖ ផ្ទុះទំនាស់បែកផ្សែងរឿងសង់ផ្ទះជញ្ជាំងជាប់គ្នាភាគីម្ខាងវាយកម្ទេចជញ្ជាំងដើម្បីសង់ផ្ទះថ្មី ឯភាគីម្ខាងទៀតមិនឲ្យវាយដោយជញ្ជាំងផ្ទះប្រើប្រាស់រួមគ្នា២០ឆ្នាំមកហើយបើវាយជញ្ជាំងរួមចោល តើគាត់មានជញ្ជាំងឯណាវា និងចំហរជញ្ជាំងចោរចូលលួចទ្រព្យសម្បត្តិអស់មិនខាន ។
ករណីអាជ្ញាធរចុះដោះស្រាយវិវាទជញ្ជាំងផ្ទះនេះកើតឡើង កាលពីវេលាម៉ោង៩និង៣០នាទីព្រឹកថ្ងៃទី០៤ មីនា ឆ្នាំ២០១៩ នៅខាងមុខផ្សារកំពង់ត្រាច ស្ថិតនៅភូមិកំពង់ត្រាច ស្រុករមាសហែក ។ ដឹកនាំដោយលោកហម ហឿន នាយករដ្ឋបាលសាលាស្រុករមាសហែកដែលជាតំណាលលោកចាប ណុល អភិបាលរង និងជាអភិបាលស្តីទីលោកម៉ៅ ពុទ្ធី ប្រធានភូមិបាលស្រុករមាសហែកលោកមេឃុំកំពង់ត្រាច លោកមេភូមិកំពង់ត្រាច រួមទាំងសមត្ថកិច្ចនគរបាលនិងកងរាជអាវុធហត្ថជាច្រើនរូបផងដែរ ។
បើតាមម្ចាស់ផ្ទះឈ្មោះ ប៊ូ ដៀប ភេទស្រី អាយុ៥៤ឆ្នាំ នៅភូមិកើតហេតុខាងលើបានឲ្យដឹងថា កាលពីអំឡុងឆ្នាំ១៩៩៩ ឬឆ្នាំ២០០០ ពួកគាត់ធ្វើផ្ទះតៀមជញ្ជាំងឈើប្រក់ស័ង្ខសីដីទំហំ៤ម៉ែត្រកន្លះ បណ្តោយ១៦ម៉ែត្រ ក្រោយមកឈ្មោះសុខ តុង និងប្រពន្ធឈ្មោះកើត តូម៉ា បានមកសង់ផ្ទះនៅជាប់គ្នាក៏បានសុំរៀបជញ្ជាំងថ្ម ដោយយល់ព្រមឲ្យប្រើជញ្ជាំងរួមគ្នាទើបគាត់ (ប៊ូដៀប) យល់ព្រមរុះជញ្ជាំងក្តាចេញ ហើយឲ្យសុខ តុង រៀបឥដ្ឋធ្វើជញ្ជាំងថ្ម ប្រើជញ្ជាំងរួមគ្នារហូតមករយៈពេល២០ឆ្នាំមកហើយទើបតែនៅថ្ងៃទី១៨ កុម្ភៈ ២០១៩ ពេលគ្រួសារគាត់មិននៅផ្ទះទៅភ្នំពេញឈ្មោះសុខ តុង និងប្រពន្ធឈ្មោះកើត តូម៉ា បានប្តឹងអាជ្ញាធរភូមិឃុំ និងសមត្ថកិច្ចនគរបាលនាំគ្នាមករុះរើជញ្ជាំងផ្ទះដែលជាជញ្ជាំងប្រើរួមគ្នាចោលធ្វើឲ្យផ្ទះគាត់ខូចខាតគ្មានជញ្ជាំងចំហរជញ្ជាំងអាចជនខិលខូចចូលលួចទ្រព្យសម្បត្តិក្នុងផ្ទះទើបគាត់សំណូមពរសុំឲ្យអាជ្ញាធរពិនិត្យ និងដោះស្រាយ និងការពារសិទ្ធិលំនៅឋានជូនគ្រួសារគាត់ផង ។
ជនរងគ្រោះប៊ូ ដៀប បានសំណូមពរអាជ្ញារលោកមេឃុំកំពង់ត្រាចលោកអភិបាលស្រុករមាសហែកថា១-សុំឲ្យរក្សាជញ្ជាំងរួម បើភាគីលោកសុខ តុង រុះជញ្ជាំងចាស់សាងសង់ផ្ទះថ្មី ត្រូវសង់ជញ្ជាំងចំកន្លែងដដែល ហើយបណ្តុះដែកចេញខាង ទុកសម្រាប់ឲ្យគាត់ (ប៊ូដៀប)តោង ដើម្បីសង់ផ្ទះផង ។ ទី២- សុំសិទ្ធិប្រើជញ្ជាំងជាជញ្ជាំងអត្ថសិទ្ធិស្របច្បាប់ ។ ទី៣- សូមឲ្យអាជ្ញាធរស្រុក និងលោកប្រធានភូមិបាលស្រុករមាសហែកធ្វើកំណត់ហេតុ និងច្បាប់សាងសង់ទុកសិទ្ធិឲ្យឈ្មោះប៊ូ ដៀប តោងសំណង់របស់សុខតុង តាមច្បាប់ទទួលសិទ្ធិនៃជញ្ជាំងអត្ថសិទ្ធិ ។ ទី៤- សូមអាជ្ញាធរធានា និងការពារកុំឲ្យខូចខាតដល់ទ្រព្យសម្បត្តិក្នុងផ្ទះពេលរុះរើជញ្ជាំងរួមចាស់ចោល ។
ចំណែកឈ្មោះសុខ តុង អាយុ៥១ឆ្នាំ បាននិយាយថា ជញ្ជាំងផ្ទះរបស់គាត់អ្នកធ្វើ ហើយរស់នៅរយៈពេលជិត២០ឆ្នាំមកហើយ គឺដំបូលផ្ទះឈើប្រក់ស័ង្ខសីពុកផុយអស់លិចទឹកទើបរុះរើដើម្បីសង់ផ្ទះថ្មី ក៏ប៉ុន្តែពេលរុះជញ្ជាំងខាងជើងឈ្មោះប៊ូ ដៀប មករារាំងថា ជាជញ្ជាំងរួម ទើបទំនាស់កើតឡើង ។
ទាក់ទិនករណីទំនាស់ជញ្ជាំងផ្ទះនេះដែរ បើតាមលោកម៉ៅ ពុទ្ធី ប្រធានភូមិបាលស្រុករមាសហែកបានឲ្យដឹងថា តាមគតិច្បាប់ភូមិបាលដីសង់លំនៅឋានទីប្រជុំជនដីផ្ទះល្វែង ពេលម្ចាស់ទ្រព្យណាម្នាក់សាងសង់ផ្ទះថ្ម ត្រូវសុំច្បាប់សាងសង់ដោយសុំការយល់ព្រមពីម្ចាស់ដីដែលមានព្រំប្រទល់ជាប់គ្នា បើមានការយល់ព្រមព្រៀងគ្នាទើបសុរិយោដីបញ្ជាក់ និងអនុញ្ញាតិហើយបើភាគីអ្នកជាប់ព្រំប្រទល់សុំតោងសំណង់របស់ខ្លួន គឺច្បាប់អនុញ្ញាតិតែតម្រូវឲ្យអ្នកសុំតោងចេញថ្លៃសំណង់ជញ្ជាំង៥០ភាគរយនេះ គឺជាសិទ្ធិជញ្ជាំងអត្ថសិទ្ធិ ។ ហើយចំពោះទម្នាស់ជញ្ជាំងរវាងឈ្មោះ ប៊ូ ដៀប និងឈ្មោះសុខ តុង នោះ គឺគ្មានលទ្ធផលទេ ដោយភាគីទាំងពីរដណ្តើមគា្នយកត្រូវរៀងខ្លួន ។
ទាក់ទិនករណីនេះដែរលោកហម ហឿន នាយករដ្ឋបាលសាលស្រុករមាសហែកដែលជាអ្នកដឹកនាំក្រុមការងារដោះស្រាយទំនាស់បានមានប្រសាសន៍ថា ក្រុមការងារគ្រាន់តែបានចុះវាស់វែងដីផ្ទះឈ្មោះប៊ូ ដៀប មើលទទឹងមាន៤កន្លះ គឺត្រូវតាមសរសរត្រឹមជញ្ជាំងពិតមែន ក៏ប៉ុន្តែគាត់អះអាងថា ពេលសុខ តុង សុំធ្វើជញ្ជាំងថ្ម គឺបានព្រមព្រៀងគ្នាប្រើប្រាស់ជញ្ជាំងរួមគ្នា ហើយបានប្រើប្រាស់ជញ្ជាំងរួមគ្នា២០ឆ្នាំមកហើយ ។ដូច្នេះដំណោះស្រាយគ្មានលទ្ធផលទេ ក្រុមការងារបានត្រឹមចុះវាស់វែង ហើយធ្វើរបាយការណ៍ជូនលោកអភិបាលស្រុកពិនិត្យសម្រេច ៕
ចែករំលែកព័តមាននេះ