ខេត្តកំពង់ស្ពឺ ៖ ពួកញៀនល្បែងជល់មាន់មួយក្រុមត្រូវកម្លាំងជំនាញព្រហ្មទណ្ឌខេត្តកំពង់ស្ពឺ ចេញប្រតិបត្តិការបង្ក្រាបពេលកំពុងពពាក់ពពូនគ្នាលេង ដោយឃាត់ខ្លួនមុខសញ្ញា៦នាក់ រួមជាមួយវត្ថុតាងមាន់ជល់ ម៉ូតូ និងសម្ភារៈផ្សេងមួយចំនួនទៀត។ ករណីនេះសង្ស័យបែកការណ៍ពីលោកនាយការិយាល័យមួយរូបទំនងខឹងនឹងមេខ្លោងមិនឱ្យចូលហ៊ុន ទើបរាយការណ៍បំបែកហ្វូងតែម្តង។…
ខេត្តកំពង់ស្ពឺ ៖ ពួកញៀនល្បែងជល់មាន់មួយក្រុមត្រូវកម្លាំងជំនាញព្រហ្មទណ្ឌខេត្តកំពង់ស្ពឺ ចេញប្រតិបត្តិការបង្ក្រាបពេលកំពុងពពាក់ពពូនគ្នាលេង ដោយឃាត់ខ្លួនមុខសញ្ញា៦នាក់ រួមជាមួយវត្ថុតាងមាន់ជល់ ម៉ូតូ និងសម្ភារៈផ្សេងមួយចំនួនទៀត។ ករណីនេះសង្ស័យបែកការណ៍ពីលោកនាយការិយាល័យមួយរូបទំនងខឹងនឹងមេខ្លោងមិនឱ្យចូលហ៊ុន ទើបរាយការណ៍បំបែកហ្វូងតែម្តង។
ការបង្ក្រាបនេះធ្វើឡើងកាលពីរសៀលនាទីថៃ្ងទី២ ខែមីនា ឆ្នាំ២០១៩ នៅចំណុចដីឡូតិ៍មួយកន្លែងនៅភូមិស្នោរទី១ សង្កាត់រការធំ ក្រុងច្បារមន ខេត្តកំពង់ស្ពឺ។
ប្រភពពីសមត្ថកិច្ចបានឱ្យដឹងថា ក្រោមការបញ្ជាពីលោកស្នងការកម្លាំងជំនាញព្រហ្មទណ្ឌសហការជាមួយកម្លាំងអន្ដរាគមន៍ខេត្ត បានបើកប្រតិបត្ដិការដ៏ក្ដៅគគុកបង្ក្រាបក្រុមញៀនល្បែងស៊ីសងជល់មាន់មួយកន្លែង ស្ថិតក្នុងចំណុចដីឡូតិ៍របស់ឈ្មោះ អ៊ួង ភុំ ប្រុស អាយុ៧២ឆ្នាំ ស្ថិតក្នុងភូមិស្នោរទី១ សង្កាត់រការធំ ក្រុងច្បារមន ។
តាមការបញ្ជាក់ពីសំណាក់សមត្ថកិច្ច គឺបានឱ្យដឹងថា ទីតាំងជល់មាន់ដែលបង្ក្រាបនេះ គឺគ្មានរោង គ្មានសង្វៀននោះទេ ដោយក្រុមអ្នកញៀនល្បែងស៊ីសងជល់មាន់នេះគេប្រើវិធីណាត់ផ្គូរផ្គងតាមទូរស័ព្ទ (គីឡូមាន់) និងបានចរចាតម្លៃ ទីកន្លែង ពេលវេលា ហើយដឹកមាន់មកជល់តែម្ដង ។
ប្រភពបន្តថា នេះគឺជារបៀបថ្មី បែបផែនថ្មីដែលមិនធ្វើឱ្យសមត្ថកិច្ចងាយបង្ក្រាបបាននោះទេ។ ហើយប្រតិបត្តិការខាងលើនេះ សមត្ថកិច្ចនគរបាលធ្វើការដកហូត និងឃាត់មុខសញ្ញា៦នាក់សុទ្ធតែប្រុសដែលជាអ្នកលេងទាំងអស់ រួមជាមួយនឹងសត្វមាន់រស់ប្រាំបួនក្បាល (ជាមាន់ពូជជល់ខ្លាំង) និងម៉ូតូ២២គ្រឿង ព្រមទាំងសម្ភារៈផ្សេងៗទៀត។ បច្ចុប្បន្នកម្លាំងនគរបាលបានកំពុងដឹកជញ្ជូននូវសម្ភារៈវត្ថុតាងរក្សាទុកនៅស្នងការដ្ឋាននគបាលខេត្ដកំពង់ស្ពឺ ដើម្បីកសាងសំណុំរឿងចាត់ការតាមនីតិវិធីច្បាប់។
បើតាមប្រភពក្រៅផ្លូវការ គឺមេខ្លោងជល់មាន់នេះមានឈ្មោះហ៊ា គឺជាអ្នករស់នៅជិតកន្លែងបង្ក្រាបតែម្តង។ មេខ្លោងរូបនេះ ពីមុនបានលបបើកជល់មាន់នេះជារឿយៗ តែមិនដែលត្រូវបានបង្ក្រាបម្តងណាឡើយ ដោយសារតែមានសម្ព័ន្ធភាពជិតស្និតជាមួយលោកនាយការិយាល័យមួយរូប។
ជាក់ស្តែងការបង្ក្រាបនេះ មុនពេលសមត្ថកិច្ចទៅដល់ គេបានឃើញឈ្មោះហ៊ា គឺកំពុងមមាញឹកយ៉ាងខ្លាំង ស្រាប់តែឈ្មោះហ៊ា គឺចេញផុត សមត្ថកិច្ចក៏ចូលដល់តែម្តង។ បើតាមប្រភពមួយទៀតបានបង្ហើបថា រឿងជល់មាន់នេះបែកធ្លាយដោយសារលោកនាយការិយាល័យមួយរូបខឹងសម្បានឹងក្រុមហ៊ា គឺមិនឱ្យចូលហ៊ុន ទើបចេះតែបោះរឿងឆ្វេងស្តាំធ្វើយ៉ាងណាមិនឱ្យក្រុមហ៊ា គឺជល់បានសុខឡើយ៕
ចែករំលែកព័តមាននេះ