រាជធានីភ្នំពេញ ៖ កិច្ចប្រជុំឧត្តមក្រុមប្រឹក្សាពិគ្រោះយោបល់ប្រចាំឆមាស ក្រោមអធិបតីភាពសម្តេចតេជោហ៊ុន សែន នាយករដ្ឋមន្ត្រីនៅទីស្តីការគណៈរដ្ឋមន្ត្រី បានប្រើពេលជាង៦ម៉ោង ដើម្បីជជែកពិភាក្សា និងដោះស្រាយបញ្ហានានា ។…
រាជធានីភ្នំពេញ ៖ កិច្ចប្រជុំឧត្តមក្រុមប្រឹក្សាពិគ្រោះយោបល់ប្រចាំឆមាស ក្រោមអធិបតីភាពសម្តេចតេជោហ៊ុន សែន នាយករដ្ឋមន្ត្រីនៅទីស្តីការគណៈរដ្ឋមន្ត្រី បានប្រើពេលជាង៦ម៉ោង ដើម្បីជជែកពិភាក្សា និងដោះស្រាយបញ្ហានានា ។ បញ្ហាដីធ្លីនៅខេត្តព្រះសីហនុ និងការរំលោភដីធ្លីនៅភ្នំដោះក្រមុំខេត្តមណ្ឌលគិរី បានក្លាយជាប្រធានបទក្តៅ គ្របដណ្តប់លើកិច្ចប្រជុំឧត្តមក្រុមប្រឹក្សាពិគ្រោះ និងផ្តល់យោបល់ ។ ក្នុងនោះសម្តេចប្រមុខរាជរដ្ឋាភិបាលក៏បានបញ្ជាឱ្យសិក្សាពីការដកតំណែងមេយោធាខេត្ត និងអភិបាលរងខេត្ត ដែលជាអ្នកដឹកនាំការអនុវត្តសាលដីកាតុលាការកំពូលដោយប្រើហិង្សា ។
លោកឈឹម ផលវរុណ ប្រធានលេខាធិការដ្ឋានឧត្តមក្រុមប្រឹក្សាពិគ្រោះយោបល់បានប្រាប់ក្រុមអ្នកសារព័ត៌មាននៅក្រោយកិច្ចប្រជុំថា កិច្ចប្រជុំប្រចាំឆមាសនៅព្រឹកថ្ងៃទី២៨ កុម្ភៈ ដែលប្រើពេលរហូតដល់ជាង៦ម៉ោងនោះ ដើម្បីស្តាប់សេចក្តីរាយការណ៍ដោយផ្ទាល់ពីសមាជិកទាំង១៦គណបក្ស ដែលបានចុះពិនិត្យ និង ស្រាវជ្រាវករណីទំនាស់ដីធ្លី និងបញ្ហាមួយចំនួនទៀតនៅតាមមូលដ្ឋាន ។ បញ្ហាទំនាស់ដីធ្លី នៅខេត្តព្រះសីហនុកាលពីថ្ងៃទី២៤ ខែមករា កន្លងទៅក្លាយជាប្រធានបទក្តៅសម្រាប់លើកយកមកពិភាក្សានៅក្នុងកិច្ចប្រជុំ ដោយមានភ្ជាប់វីដេអូconferenceជាមួយអភិបាលខេត្តទៀតផង ។
លោកឈឹម ផលវរុណ បញ្ជាក់ថា ការចុះអនុវត្តសាលដីកាតុលាការកំពូលរហូតមានអំពើហិង្សា និងមានអ្នករងរបួសបានធ្វើឲ្យសម្តេចតេជោខឹងសម្បាជាខ្លាំង ។ ខឹងសម្បាក៏ព្រោះតែក្នុង ប្រតិបត្តិការនោះមេបញ្ជាការសឹករងខេត្តព្រះសីហនុបានប្រើប្រាស់កម្លាំងយោធាទៅអនុវត្តសាលដីកាដោយខុសពីនីតិវិធីច្បាប ់។ សម្តេចតេជោនាយករដ្ឋមន្ត្រី បានបញ្ជាឲ្យស៊ើបអង្កេតឲ្យបានម៉ត់ចត់បំផុតចំពោះករណីហិង្សានៃការអនុវត្តសាលដីកានេះ និងបានបញ្ជាឲ្យរឹបអូសដីសម្បទាននោះមកឲ្យគ្រប់គ្រងវិញ មុននឹងយកដីសម្បទាននោះទៅធ្វើជាដីសម្បទានសង្គមកិច្ចជូនប្រជាពលរដ្ឋ ។ សម្តេចក៏បានស្នើឱ្យសិក្សាពីការដកតំណែងមេបញ្ជាការយោធា និងអភិបាលរងខេត្តព្រះសីហនុផងដែរ ។
ក្រៅពីបញ្ហាទំនាស់ដីធ្លីនៅខេត្តព្រះសីហនុ បញ្ហានៃការរំលោភដីធ្លីនៅតំបន់ភ្នំដោះក្រមុំ ខេត្តមណ្ឌលគិរី ក៏ត្រូវបានកិច្ចប្រជុំលើកមកពិភាក្សា និងដោះស្រាយ ។ សម្តេចតេជោនាយករដ្ឋមន្ត្រីបានបញ្ជាឲ្យអភិបាលខេត្តមណ្ឌលគិរី និងស្ថាប័នពាក់ព័ន្ធត្រូវទប់ស្កាត់ជាបន្ទាន់មិនអនុញាតឲ្យទៅទន្ទ្រានដីនៅភ្នំ ោះក្រមុំនោះឡើយ ដោយត្រូវរឹបអូសយកមកវិញទុកជាសម្បត្តិរដ្ឋ។ នៅខេត្តព្រះសីហនុសម្ដេចតេជោបានសម្តែងនូវការមិនពេញចិត្តចំពោះបាតុភាពដែលកើតមានកាលពីថ្ងៃទី២៤ ខែមករាកន្លងទៅចំពោះការអនុវត្តសាលដីកាតុលាការ ។
បញ្ហានេះសម្ដេចតេជោបានបញ្ជាទៅក្រសួងដែនដីនគរូបនីយកម្មនិងក្រសួងកសិកម្មត្រូវពិនិត្យឡើងវិញអំពីបញ្ហានោះ ហើយសម្រេចរឹបអូសដីដែលជាដីសម្បទានដែលកើតមានមិនប្រក្រតី ក្នុងនោះមានមន្ត្រីមានអំណាចខ្លះលើកដៃទៅក្នុងកិច្ចការនោះ។សម្ដេចមិនផ្ដល់នូវដីសម្បទានសេដ្ឋកិច្ចទេ ទឹកដីជារបស់រដ្ឋ និងរៀបចំនូវគោលការណ៍ម៉ត់ចត់នូវដីសម្បទានសេដ្ឋកិច្ចជូនប្រជាពលរដ្ឋ ។ សម្ដេចតេជោបានកំណត់នូវភាពម៉ឺងម៉ាត់មិនឲ្យអាជ្ញាធរមូលដ្ឋានលូកដៃចូលឬក៏កេងយកផលប្រយោជន៍នៅក្នុងការបែងចែកដីសម្បទានសង្គមកិច្ចជូនប្រជាពលរដ្ឋទេ គឺផ្ដល់តែប្រជាពលរដ្ឋទេ ហើយអាជ្ញាធរមិនត្រូវទៅបន្លំកេងយកចំណេញនោះទេ ៕
ចែករំលែកព័តមាននេះ