ខេត្តព្រៃវែង ៖ ស្ត្រីម្នាក់ដែលគេអះអាងថាជាប្រពន្ធចុង បានតាមមករករឿងជេរបញ្ចោរ និងស្ទុះចូលទៅរកវាយស្ត្រីជាប្រពន្ធដើមដល់ក្នុងផ្ទះ ធ្វើអោយភ្ញាក់ផ្អើលដល់អ្នកស្រុកនៅជុំវិញនោះនាំគ្នាចោមរោមមើលព្រោងព្រាត កាលពីវេលាម៉ោង៩និង៣០នាទីព្រឹកថ្ងៃទី២០ កុម្ភៈ ឆ្នាំនៅចំណុចផ្ទះលក់បាយ និងគុយទាវមួយកន្លែង…
ខេត្តព្រៃវែង ៖ ស្ត្រីម្នាក់ដែលគេអះអាងថាជាប្រពន្ធចុង បានតាមមករករឿងជេរបញ្ចោរ និងស្ទុះចូលទៅរកវាយស្ត្រីជាប្រពន្ធដើមដល់ក្នុងផ្ទះ ធ្វើអោយភ្ញាក់ផ្អើលដល់អ្នកស្រុកនៅជុំវិញនោះនាំគ្នាចោមរោមមើលព្រោងព្រាត កាលពីវេលាម៉ោង៩និង៣០នាទីព្រឹកថ្ងៃទី២០ កុម្ភៈ ឆ្នាំនៅចំណុចផ្ទះលក់បាយ និងគុយទាវមួយកន្លែង ក្នុងភូមិ៥ ឃុំព្រែកខ្សាយ(ខ) ស្រុកពាមរក៍ ខេត្តព្រៃវែង ។
តាមប្រភពពីសមត្ថកិច្ចបានឱ្យដឹងថា ស្ត្រីជាប្រពន្ធចុងដែលតាមទៅរករឿងប្រពន្ធដើមដល់ផ្ទះនោះមានឈ្មោះ នៅ សុលីណា អាយុ៣៤ឆ្នាំ មានស្រុកកំណើតនៅភូមិសឹង្ហ ឃុំកំពង់សឹង្ហ ស្រុកព្រះស្តេច ខេត្តព្រៃវែង បច្ចុប្បន្នរស់នៅក្នុងរាជធានីភ្នំពេញ។ រីឯស្ត្រីជាប្រពន្ធដើមឈ្មោះ នួយ អាយុ៣៧ឆ្នាំ មុខរបរលក់បាយ និងគុយទាវ និងមានទីលំនៅក្នុងភូមិកើតហេតុខាងលើ ។ ចំណែកបុរសជាប្តីត្រូវបានគេស្គាល់ថាឈ្មោះ លី បច្ចុប្បន្នរស់នៅជាមួយប្រពន្ធចុងនៅឯរាជធានីភ្នំពេញ។
បើតាមការរៀបរាប់ពីអ្នកជិតខាងផ្ទះកើតហេតុ និងបានដឹងរឿងរ៉ាវនេះច្បាស់បានរៀបរាប់ឱ្យដឹងថា ស្ត្រីឈ្មោះ នួយ បានរៀបការ និងមករស់នៅជាមួយប្តីនៅផ្ទះឪពុកម្តាយខាងប្តី គឺផ្ទះកើតហេតុខាងលើច្រើនឆ្នាំមកហើយ រហូតបានកូនប្រុសម្នាក់អាយុ៧ឆ្នាំផងដែរ ។
ប្រភពដដែលនេះបានបន្តថា នៅអំឡុងពេលប៉ុន្មានឆ្នាំមុននេះ បុរសជាប្តីឈ្មោះ លី បានចេញទៅរកស៊ីនៅភ្នំពេញ យូរៗទើបមកផ្ទះម្តង អស់រយៈពេល៤ទៅ៥ឆ្នាំ ស្រាប់តែឮថាមានប្រពន្ធចុងនៅភ្នំពេញ តែស្ត្រីជាប្រពន្ធដើម មិនបានខឹងប្តីឡើយ ហើយក៏មិនបានតាមទៅរករឿងអ្វីដែរ គឺគិតតែខំលក់បាយគុយទាវរកប្រាក់ចិញ្ចឹមកូន និងមើលថែឪពុកម្តាយរបស់ប្តី ក្នុងនាមជាកូនប្រសាតែប៉ុណ្ណោះ។
ដោយឡែកប្រភពពីសាច់ញាតិក្រុមគ្រួសារកើតហេតុបានអោយដឹងថា បងប្អូនសាច់ញាតិក្នុងក្រុមគ្រួសារនេះកំពុងតែមានទុក្ខ ដោយសារតែបុរសម្នាក់ដែលត្រូវជាឪពុកមា មានផ្ទះនៅស្ទឹងខៀវ ( ផ្សារក្រោម ) បានទទួលមរណៈភាពដោយសារជំងឺ ហើយបងប្អូនសាច់ញាតិទាំងអស់នៅទីជិតឆ្ងាយបានមកចូលរួមបុណ្យសព និងកាន់ទុក្ខគ្រប់គ្នា។
ប្រភពដដែលបានបន្តថា លុះនៅព្រឹកថ្ងៃទី២០ កុម្ភៈនេះ សាច់ញាតិទាំងអស់ក៏បាននាំគ្នាដង្ហែសពយកទៅបញ្ចុះនៅក្នុងបរិវេណវត្តទួលសមាធិ ហើយបុរសឈ្មោះ លី និងប្រពន្ធឈ្មោះ នួយ ក៏បានទៅចូលរួមដង្ហែសពដែរ ដោយជិះឡានជាមួយគ្នា ប៉ុន្តែពេលហែរសពទៅជិតដល់វត្តទៅហើយនោះ ស្រាប់តែលេចមុខស្ត្រីឈ្មោះ នៅ សុលីណា ជាប្រពន្ធចុង បានចេញមកកាក់រថយន្តប្តីប្រពន្ធនេះនៅក្នុងក្បួនដង្ហែសព ហើយស្ត្រីជាប្រពន្ធចុងបានស្ទុះចូលទៅជេរបញ្ចោរ និងវាយស្ត្រីជាប្រពន្ធដើម ធ្វើអោយមានការប្រវាយប្រតប់គ្នាឡើង ។
ភ្លាមៗនោះបងប្អូនសាច់ញាតិដែលដង្ហែសពជាមួយគ្នាបាននាំគ្នាចាប់ឃាត់បំបែកអ្នកទាំង២ចេញពីគ្នា ហើយបុរសជាប្តីឈ្មោះ លី ក៏បានដេញប្រពន្ធចុងអោយត្រឡប់ទៅវិញ ចំណែករូបគេនិងប្រពន្ធ ព្រមទាំងសាច់ញាតិក៏បន្តហែរសពយកទៅបញ្ចុះរហូតរួចរាល់ទើបត្រឡប់ទៅផ្ទះវិញ។
ចំណែកស្ត្រីជាប្រពន្ធចុង ក្រោយពីទៅកាក់ស្ទាក់អុកឡុកក្នុងក្បួនដង្ហែសពរួចហើយ ក៏បានទៅដាក់ពាក្យប្តឹងនៅប៉ូស្តិ៍រដ្ឋបាលឃុំអ្នកលឿង ដោយប្តឹងមនុស្សចំនួន៣នាក់ គឺស្ត្រីជាប្រពន្ធដើមឈ្មោះ នួយ បុរសជាបងថ្លៃឈ្មោះ លាំង និងស្ត្រីជាបងថ្លៃឈ្មោះ ឃីម ដោយចោទពីបទបង្ករបួសស្នាមព្រួតគ្នាវាយនាងអោយដាច់រលាត់ផ្ទៃមុខ។
ប៉ុន្តែរឿងដែលនឹកស្មានមិនដល់ គឺពេលដែលប្តីប្រពន្ធនេះត្រឡប់ទៅដល់ផ្ទះបានមួយសន្ទុះ ស្រាប់តែឃើញស្ត្រីជាប្រពន្ធចុងតាមទៅដល់ដែរ ហើយក៏បានឡូឡាស្រែកជេរបញ្ចោរផ្អើលពេញភូមិ ចំណែកបុរសជាប្តីព្យាយាមហាមឃាត់ដែរ តែមិនឈ្នះ ក៏គេចខ្លួនចេញទៅបាត់ បន្សល់ទុកស្ត្រីជាប្រពន្ធចុងនៅស្រែកជេរប្រពន្ធដើម និងស្ទុះចូលទៅរកវាយប្រពន្ធដើមដែលសំងំនៅក្នុងផ្ទះនោះទៀតផង ប៉ុន្តែត្រូវបានបងប្អូននិងសាច់ញាតិខាងប្តីរារាំង ហើយមួយសន្ទុះក្រោយមក លោកមេប៉ុស្តិ៍រដ្ឋបាលឃុំព្រែកខ្សាយ(ខ) ក៏បានមកដល់ជួយអន្តរាគមន៍ និងនាំនាងជាប្រពន្ធចុងទៅប៉ុស្តិ៍រំងាប់អារម្មណ៍ រួចក៏អោយត្រឡប់ទៅវិញដោយពុំបានចាប់ទោសអូសដំណើរអ្វីទេ។
ទោះជាយ៉ាងណាក៏ដោយ នៅក្នុងពេលនោះដែរ លោកមេប៉ុស្តិ៍ហៅទៅរំងាប់អារម្មណ៍នៅប៉ុស្តិ៍នោះ ស្ត្រីជាប្រពន្ធចុងបានរៀបរាប់ថា នាងនិងប្តីឈ្មោះ លី នេះបានស្រលាញ់គ្នា និងរួមរស់ជាមួយគ្នារយៈពេល៧ឆ្នាំមកហើយ ដោយក្នុងអំឡុងពេលនេះបងប្អូននិងម្តាយរបស់ឈ្មោះ លី ក៏បានដឹងរឿងនេះដែរ ហើយនាងបានចំណាយលុយច្រើនណាស់មកលើប្តី និងម្តាយរបស់ប្តី។
ស្ត្រីជាប្រពន្ធចុងបានបន្តថា ពេលស្រលាញ់គ្នាដំបូង បុរសជាប្តីបានប្រាប់នាងថា ខ្លួនបានលែងលះជាមួយប្រពន្ធឈ្មោះ នួយ រួចហើយ ទើបនាងព្រមរួមរស់ជាមួយ ស្រាប់តែពេលនេះបែរជាមកឃើញជិះឡានជាមួយគ្នា ហើយឡាននោះជាឡានរបស់បងនាងនៅឯភ្នំពេញ ដែលនាងខ្ចីជិះមកជាមួយប្តីទៀត ទើបនាងខឹងហើយតាមទៅដេញដោលសួរនាំអោយដឹងច្បាស់ថាឈ្មោះ នួយ ត្រូវជាយ៉ាងម៉េច ហើយនាងត្រូវជាយ៉ាងម៉េចអោយពិតប្រាកដ ប៉ុន្តែពេលចូលទៅសួរនាំក៏ត្រូវឈ្មោះ នួយ និងបងប្អូនបក្សពួកព្រួតគ្នាវាយនាងតែម្តង ទើបផ្ទុះកើតជារឿងឡើង ហើយដែលនាងតាមទៅដល់ផ្ទះនោះ គឺមិនមែនតាមទៅរករឿងទេ គឺតាមទៅរកប្តីហើយទារយកឡានមកវិញ ព្រោះឡាននោះជាឡាននាងខ្ចីបងមកជិះទេ។
បើទោះជាបែបនេះក្តី នៅពេលកើតហេតុនោះ អ្នកស្រុកអ្នកភូមិដែលបានទៅចោមរោមមើលនោះ បាននាំគ្នាស្តីបន្ទោសទៅលើស្ត្រីជាប្រពន្ធចុង ដោយចោទថា យកប្តីគេហើយគេមិនរករឿងផង នៅហ៊ានមកតាមរករឿងគេដល់ផ្ទះទៀត ។ ជាពិសេសសូម្បីតែគេកំពុងដង្ហែសពយកទៅបញ្ចុះក៏មិនលើកលែងដែរ វាហួសហេតុពេកហើយ។
ចំណែកខាងសមត្ថកិច្ចវិញ បានអោយដឹងថា រឿងស្នេហាត្រីកោណនេះ ទុកអោយសាមីខ្លួនជាអ្នកដោះស្រាយទៅចុះ អ្នកណាចងអ្នកនោះស្រាយ ប៉ុន្តែតួនាទីសមត្ថកិច្ចពេលនេះ គឺកសាងសំណុំរឿងចាត់ការទៅតាមនិតិវិធី លើពាក្យបណ្តឹងរបស់ស្ត្រីជាប្រពន្ធចុង ដែលបានប្តឹងចោទប្រពន្ធដើម និងបងប្អូន២នាក់ទៀតពីបទបង្ករបួសស្នាមលើរូបនាង៕
ចែករំលែកព័តមាននេះ