រាជធានីភ្នំពេញ ៖ កម្លាំងនគរបាលផ្នែកប្រឆាំងគ្រឿងញៀននិងកម្លាំងនគរបាលផ្នែកអន្តរាគមន៍ខណ្ឌពោធិ៍សែនជ័យបានធ្វើការស្រាវជ្រាវ និងឈានដល់ការឃាត់ខ្លួនជនសង្ស័យចំនួន២នាក់ ក្នុងនោះម្នាក់ដែលជាមុខសញ្ញាជួញដូរថ្នាំញៀន ដោយដកហូតវត្ថុតាងថ្នាំញៀនចំនួន២៩កញ្ចប់ និងជនសង្ស័យម្នាក់ទៀតជាអ្នកប្រើប្រាស់ ដោយសមត្ថកិច្ចធ្វើការឆែកឆេររកឃើញថ្នាំញៀន១កញ្ចប់តូចនៅជាប់ខ្លួនផង។
ប្រតិបត្តិការបង្ក្រាបនេះធ្វើឡើងកាលពីវេលាម៉ោង១២និង១០នាទីថ្ងៃត្រង់ថ្ងៃទី១៩ ខែកុម្ភៈ ឆ្នាំ២០១៩ នៅចំណុចបន្ទប់ជួលស្ថិតនៅក្នុងភូមិព្រៃព្រីងខាងជើង២ សង្កាត់ចោមចៅទី៣ ខណ្ឌពោធិ៍សែនជ័យ ។
ជនសង្ស័យទាំង២នាក់ខាងលើ ក្នុងនោះម្នាក់ឈ្មោះ អៀង នុត ភេទប្រុស អាយុ២១ឆ្នាំ មុខរបរមិនពិតប្រាកដ ស្នាក់នៅភូមិព្រៃព្រីងជើង២ សង្កាត់ចោមចៅទី៣ ខណ្ឌពោធិសែនជ័យទី៣ (ជាអ្នកជួញដូរ) និងជនសង្ស័យម្នាក់ទៀតឈ្មោះផែង ភីន ភេទប្រុស អាយុ៣៣ឆ្នាំ មុខរបរមិនពិតប្រាកដ ស្នាក់នៅភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិសែនជ័យ (ជាអ្នកប្រើប្រាស់)។
ប្រភពពីនគរបាលបាននិយាយាថា ដោយអនុវត្តតាមបទបញ្ជានិងការចង្អុលបង្ហាញពីលោកវរសេនីយ៍ឯក យឹម សារ៉ាន់ អធិការនគរបាលខណ្ឌត្រូវតែបង្ការ និងបង្ក្រាបរាល់បទល្មើស ជាពិសេសបញ្ហាគ្រឿងញៀន ទើបកំលាំងបានដាក់ការតាមដាន និងស្រាវជ្រាវចុះបង្ក្រាបជាក់ស្តែង ដោយឃាត់ខ្លួនបានជនសង្ស័យជាអ្នកជួញដូរថ្នាំញៀនឈ្មោះ អៀង នុត និងដកហូតបានថ្នាំញៀនប្រភេទម្សៅក្រាមសថ្លាចំនួន២៩កញ្ចប់តូច ។
បច្ចុប្បន្នជនសង្ស័យកំពុងសួរនាំនិងឃុំខ្លួនជាបណ្ដោះអាសន្ននៅអធិការដ្ឋាននគរបាលខណ្ឌដើម្បីរង់ចាំបញ្ជូនខ្លួនឡើងតុលាការចាត់ការទៅតាមនីតិវិធី ៕
ចែករំលែកព័តមាននេះ