ខេត្តបន្ទាយមានជ័យ ៖ អ្នកហូបត្រីក្រពតបានពុលស្លាប់ម្នាក់ទៀតហើយ បន្ទាប់ពីរើសយកមកប្រឡាក់អំបិលអាំងហូបជាមួយបាយបីថ្ងៃជាប់គ្នា បណ្តាលឱ្យពុលស្ត្រីជាម្តាយស្លាប់ វេលាម៉ោង២រសៀលថ្ងៃទី១៧ កុម្ភៈ ឯកូន២នាក់និងក្មួយ១នាក់ ត្រូវបានសង្គ្រោះ ។…
ខេត្តបន្ទាយមានជ័យ ៖ អ្នកហូបត្រីក្រពតបានពុលស្លាប់ម្នាក់ទៀតហើយ បន្ទាប់ពីរើសយកមកប្រឡាក់អំបិលអាំងហូបជាមួយបាយបីថ្ងៃជាប់គ្នា បណ្តាលឱ្យពុលស្ត្រីជាម្តាយស្លាប់ វេលាម៉ោង២រសៀលថ្ងៃទី១៧ កុម្ភៈ ឯកូន២នាក់និងក្មួយ១នាក់ ត្រូវបានសង្គ្រោះ ។ ហេតុការណ៍នេះ បានកើតឡើងនៅភូមិស្រះគោក ឃុំព្រះនេត្រព្រះ ស្រុកព្រះនេត្រព្រះ ។
លោកអនុសេនីយ៍ឯក ឡត ម៉ាឌី មេប៉ុស្តិ៍នគរបាលឃុំព្រះនេត្រព្រះបានប្រាប់ថា ជនរងគ្រោះដែលពុល
ត្រីក្រពតស្លាប់ឈ្មោះ តូច ឡុច ភេទស្រី អាយុ៣៩ឆ្នាំ ដែលមានកូន២នាក់ក្នុងបន្ទុក និងចិញ្ចឹមក្មួយម្នាក់ទៀត ។ លោកបានបញ្ជាក់ថា មុនពេលដែលស្ត្រីរងគ្រោះពុលត្រីក្រពតស្លាប់ គឺប្តីរបស់គាត់ទៅស៊ីឈ្នួលបើកត្រាក់ទ័រឱ្យគេនៅខេត្តឧត្តរមានជ័យ ហើយប្រពន្ធបានរស់នៅជាមួយកូន២នាក់ និងក្មួយម្នាក់ក្នុងបន្ទុកគ្រួសារមាន៤នាក់ ។
ហើយកាលពីថ្ងៃទី១៥ ខែកុម្ភៈ ស្ត្រីរងគ្រោះបានទៅរើសត្រីក្រពត ដែលត្រូវអ្នកបង់សំណាញ់ជំរុះចោលនៅចំណុចបឹងរហាល ចំងាយពីភូមិប្រមាណ២០០ម៉ែត្រ ។ លោកអនុសេនីយ៍ឯកបានបញ្ជាក់ថា ក្រោយពេលរើសត្រីក្រពតបានហើយក៏យកទៅប្រឡាក់អំបិលអាំងហូប ជាមួយបាយអស់រយៈពេល៣ថ្ងៃជាប់គ្នា ក៏ស្រាប់តែនៅអំឡុងម៉ោង១០ព្រឹក ថ្ងៃ១៧ ខែកុម្ភៈ ស្រាប់តែស្ត្រីរូបនេះ មានអាការៈពុល ហើយត្រូវបានដឹកទៅមន្ទីរពេទ្យបង្អែកស្រុកព្រះនេត្រព្រះភ្លាមៗ ។
ដោយឃើញស្ថានភាពអ្នកជំងឺធ្ងន់ធ្ងរ ក៏បានបញ្ជូនទៅសង្គ្រោះបន្ទាន់ ទៅមន្ទីរពេទ្យមិត្តភាពកម្ពុជា-ជប៉ុនមង្គលបូរី តែយឺតពេលទៅហើយ ស្ត្រីរងគ្រោះបានស្លាប់នៅម៉ោង២រសៀល ហើយត្រូវបានដឹកសពមកលំនៅឋានវិញដើម្បីធ្វើបុណ្យតាមប្រពៃណី ។ លោកបានបញ្ជាក់ថា ក្រោយពេលស្ត្រីរងគ្រោះជាម្តាយដែលស្លាប់ហើយ គ្រូពេទ្យរកឃើញថា ពុលត្រីក្រពត ក្រុមគ្រូពេទ្យបានយកកូន និងក្មួយ៣នាក់ ១.ឈ្មោះ មឿន លីនដា ភេទស្រី អាយុ១០ឆ្នាំ ២.ឈ្មោះ មឿន លីសា ភេទស្រី អាយុ៩ឆ្នាំ ៣.ឈ្មោះ អែម រង្សី ភេទប្រុស អាយុ១០ឆ្នាំ ត្រូវជាក្មួយ យកទៅពិនិត្យសុខភាពនៅមន្ទីរពេទ្យបង្អែកស្រុកព្រៈនេត្រព្រះ ហើយគ្រូពេទ្យជំនាញប្រាប់ថា ក្មេង៣នាក់គ្មានជាតិពុលក្នុងខ្លួនទេ ។
លោក ឃូរ ពៅ អភិបាលស្រុកព្រះនេត្រព្រះ ក៏ធ្លាប់ណែនាំដល់ប្រជាពលរដ្ឋក្នុងស្រុកព្រះនេត្រព្រះ មិនឱ្យបរិភោគត្រីក្រពតទេ ព្រោះបណ្តាលឱ្យពុលមានគ្រោះថ្នាក់ដល់អាយុជីវិត តែការណែនាំហាក់នៅមានកំរិត ទើបនៅតែមានអ្នករងគ្រោះពុលស្លាប់ដោយត្រីប្រភេទនេះដដែល ជាក់ស្តែងស្ត្រីរងគ្រោះឈ្មោះ តូច ឡុច ត្រូវបានពុលស្លាប់ចោលក្រុមគ្រួសារគួរឱ្យសោកស្ដាយ ដោយសារតែត្រីក្រពតនេះ ៕
ចែករំលែកព័តមាននេះ