រាជធានីភ្នំពេញ ៖ ស្ត្រីម្នាក់បានកាន់រូបថតមួយសន្លឹកដែលអះអាងថា ជាប្រុសស្នេហ៍មកប្តឹងសមត្ថកិច្ចមូលដ្ឋាន ដើម្បីឲ្យជួយអន្តរាគមន៍ក្រោយពីស្គាល់គ្នាតាមរយៈហ្វេសបុ៊កប្រហែលជាង២ខែ ស្រាប់តែបុរសនេះបោកយកទូរស័ព្ទដៃ និងម៉ូតូមួយគ្រឿងរួចគេចខ្លួនទៅបាត់ ។ ករណីនេះ កើតឡើងកាលពីរសៀលថ្ងៃទី១៥ ខែកុម្ភៈ កន្លងទៅ នៅមុខផ្សារស៊ិនជូរីផ្លាហ្សា តាមមហាវិថីសហព័ន្ធរុស្សុី ក្នុងភូមិតាងួន សង្កាត់កាកាប១ ខណ្ឌពោធិ៍សែនជ័យ ។
ស្ត្រីរងគ្រោះជាម្ចាស់ម៉ូតូឈ្មោះ អាន ស្រីលីន អាយុ១៩ឆ្នាំ ជាកម្មការិនីរោងចក្រ ស្នាក់នៅបន្ទប់ជួលក្នុងភូមិក្បាលដំរី សង្កាត់កាកាប២ខណ្ឌពោធិ៍សែនជ័យ ។ ចំណែកប្រុសស្នេហ៍ដែលឆបោកយកម៉ូតូ ហើយគេចខ្លួនបាត់នោះត្រូវបានប្រាប់ថា ឈ្មោះ ណាក់ ភារៈ អាយុ៣២ឆ្នាំ ជាមន្ត្រីនគរបាល តែមិនស្គាល់អាសយដ្ឋានទេ ។ ប្រភពពីស្ត្រីជាដើមបណ្តឹងឲ្យដឹងទៀតថា នាងបានស្គាល់គ្នាជាមួយបុរសខាងលើ តាមរយៈហ្វេសបុ៊ក ប្រហែលជាង២ខែ ។
ក្នុងអំឡុងពេលស្គាល់គ្នានេះ បុរសខាងលើបានប្រាប់ថា គេជានគរបាលនៅក្នុងខណ្ឌពោធិ៍សែនជ័យ និងធ្លាប់ណាត់ជួបគ្នាដើរលេងបានចំនួន២ដង ប៉ុន្តែមិនដែលស្គាល់ផ្ទះបុរសនេះឡើយ ។ លុះនៅថ្ងៃទី១៤ ខែកុម្ភៈ មុនកើតហេតុ បុរសរូបនេះបានប្រាប់ថា ចង់ទៅលេងស្រុកនាង ដើម្បីស្គាល់សាច់ញាតិ ក៏ណាត់គ្នាជួបនៅមុខព្រលានយន្តហោះអន្តរជាតិភ្នំពេញ និងបានជិះម៉ូតូនាងម៉ាក់ឌ្រីមសេ១២៥ ពណ៌ខ្មៅ ស៊េរីឆ្នាំ២០១៨ពាក់ផ្លាកលេខ ភ្នំពេញ ១NT-២៩៤៣ ឌុបគ្នាទៅលេងស្រុកកំណើតនាងនៅខេត្តកំពង់ចាម ។
ស្ត្រីរូបនេះឲ្យដឹងទៀតថា ក្រោយពីដេកនៅស្រុកកំណើតនាងមួយយប់ លុះព្រឹកថ្ងៃទី១៥ខែកុម្ភៈ ត្រឡប់មកភ្នំពេញវិញ ។ ខណៈមកដល់មុខផ្សារស៊ិនជូរីផ្លាហ្សា បុរសខាងលើបានប្រាប់នាងឲ្យចាំនៅមុខផ្សារមួយភ្លែត រូបគេជិះម៉ូតូទៅយកកូនសោចូលផ្ទះដែលផ្ញើនឹងមិត្តភក្តិនៅអធិការដ្ឋាននគរបាលខណ្ឌពោធិ៍សែនជ័យ ព្រមទាំងយកទូរស័ព្ទដៃនាងម៉ាកហូវៃមួយគ្រឿងទៅជាមួយផង ងាយស្រួលទូរស័ព្ទរកមិត្តភក្តិក្រែងទៅរកមិនជួប ហើយក៏ទៅបាត់រហូតតែម្តង ។
ដោយចាំបាត់ៗ ហើយទូរស័ព្ទទៅមិនចូលនិងសូម្បីអាខោនហ្វេសបុ៊កក៏ប្លុកចោលទៀត ទើប
នាង និងបងប្អូនសម្រេចចិត្តមកប៉ុស្តិ៍នគរបាលរដ្ឋបាលកាកាប១ ដើម្បីដាក់ពាក្យបណ្តឹងដោយកាន់រូបថតបុរសខាងលើមកជាមួយផង ។ សមត្ថកិច្ចនិយាយថា ទោះបីជាស្ត្រីម្ចាស់បណ្តឹងថា ជននោះជានគរបាលក្តី ក៏មិនទាន់អាចនិយាយឲ្យច្បាស់លាស់នៅឡើយទេថា ជានគរបាល ព្រោះជនខិលខូចអាចប្រើល្បិចបោកក៏ថាបាន ៕
ចែករំលែកព័តមាននេះ