រាជធានីភ្នំពេញ ៖ បុរស២នាក់បានក្លែងខ្លួនធ្វើជាសង្ឃ បានចេញដើរបិណ្ឌបាត្រគ្រប់ច្រកល្ហកតាមទីប្រជុំជន និងតាមផ្ទះតាមភូមិនានា ហើយប្រជាពលរដ្ឋតែងនាំគ្នាដាក់បាត្រជាលុយ និងក្រាបសំពះថ្វាយបង្គំក្បាលដល់ដីគ្រប់ៗគ្នា ខណៈមិនបានចាប់អារម្មណ៍ឬដឹងថា ជនដែលពួកគាត់កំពុងគោរពនេះ ជាសង្ឃក្លែងក្លាយនោះឡើយ ។
ទាំង២នាក់ក្រោយបិណ្ឌបាត្របានលុយហើយ នាំគ្នាទៅកន្លែងស្ងាត់រួចដោះស្បង់ចីវរចេញ និងស្លៀកពាក់ខោអាវជាគ្រហស្ថវិញ ក៏ត្រូវអ្នកភូមិប្រទះឃើញក៏ចាប់ខ្លួនប្រគល់ជូននគរបាលតែម្ដង កើតឡើងកាលពីវេលាម៉ោង១១និង៣០នាទីថ្ងៃត្រង់ថ្ងៃទី១៥ កុម្ភៈ នៅតាមផ្លូវវេង ស្រេង ត្រង់ចំណុចជិតរោងចក្រស្រាបៀរហ្ក្រោន ស្ថិតក្នុងភូមិត្រពាំងថ្លឹង១ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យដែលត្រូវចាប់ខ្លួន ម្នាក់ឈ្មោះសុខ សុធា អាយុ១៨ឆ្នាំ ស្នាក់នៅក្នុងស្ទឹងមានជ័យ ខណ្ឌមានជ័យ រាជធានីភ្នំពេញ ជននេះមានស្រុកកំណើតនៅក្នុងភូមិសាម័រ ឃុំត្រពាំងស្រែ ស្រុកមេសាង ខេត្តព្រៃវែង ហើយបានក្លែងខ្លួនបានរយៈពេល៧ថ្ងៃមកហើយ ។ ចំណែកម្នាក់ទៀតឈ្មោះប្រាង សំណាង អាយុ៣៥ឆ្នាំ ស្នាក់នៅមិនពិតប្រាកដ និងមានស្រុកកំណើត នៅក្នុងភូមិចារ ឃុំព្រៃរំដេង ស្រុកមេសាង ខេត្តព្រៃវែង ជននេះបានក្លែងខ្លួនជាសង្ឃក្លែងរយៈពេល៣ថ្ងៃប៉ុណ្ណោះ ។
ក្រោយចាប់ខ្លួន នគរបាលដកហូតបានលុយជាង១០ម៉ឺនរៀល ដែលពួកនេះបិណ្ឌបាត្របានពីទីកន្លែងនា
នា រួមជាមួយស្បង់ចីវរបាត្រ និងឆាយគណៈមហានិកាយ២ ដែលជនសង្ស័យលួចរបស់ព្រះសង្ឃនៅឯស្រុកកំណើត រួចយកទៅស្គែនដាក់តាមខ្លួន ដើម្បីការពារក្រែងអាជ្ញាធរឃាត់ត្រួតពិនិត្យ ។
អ្នកភូមិខាងលើបាននិយាយថា ពួកគាត់បានឃើញជនសង្ឃទាំង២នាក់នេះដើរបិណ្ឌបាត្រច្រើនថ្ងៃមកហើយ មិនតែប៉ុណ្ណោះពួកគាតមិនបានដឹងថា ពួកនេះគឺជាសង្ឃក្លែងក្លាយនោះឡើយ ។ បន្ទាប់ពីធ្វើការសាកសួរអ្នកទាំង២បានសារភាពថា ពួកខ្លួនពិតជាបានក្លែងខ្លួនជាសង្ឃពិតមែន ដើម្បីរកលុយជាច្រើនថ្ងៃមកហើយ ។ ទោះបីជាបែបនេះក្ដី តាមចំណាត់ការរបស់ថ្នាក់លើ បានសម្រេចមិនកសាងសំណុំរឿងបញ្ជូនទៅតុលាការឡើយ គឺសម្រេចត្រឹមធ្វើការអប់រំនិងធ្វើកិច្ចសន្យាប៉ុណ្ណោះ ក៏ដោះលែងវិញ។
ចែករំលែកព័តមាននេះ