នៅប្រទេសកម្ពុជា ស្ត្រីសឹងតែគ្រប់រូបតែងកើតមានបញ្ហាធ្លាក់ស មិនមែនកើតចំពោះតែស្ត្រីមានប្តីនោះទេ សូម្បីស្ត្រីនៅវ័យក្រមុំមិនទាន់ប្រឡូកក្នុងការរួមភេទផងក៏អាចកើតមានរោគធ្លាក់សនេះដែរ ។លោកស្រីវេជ្ជបណ្ឌិតពឹង ជុតិមា នាយិកាសេវាកម្មនៃគ្លីនិកអង្គការរ៉ាក់បានប្រាប់កោះសន្តិភាពថា រោគធ្លាក់សជាប្រភេទជំងឺមួយដែលតែងតែជួបញឹកញាប់ជាងរោគសញ្ញាផ្សេងៗ និងជាក្តីកង្វល់យ៉ាងធំបំផុតសម្រាប់ស្ត្រីទូទៅ ។
ជំងឺធ្លាក់ស មានរោគសញ្ញាច្រើនយ៉ាង ហើយអ្វីដែលគួរឱ្យបារម្ភនោះគឺស្ត្រីដែលមានសញ្ញាធ្លាក់សតែងតែគិតថាវាជាប្រភេទជំងឺឬមិនមែន ។ បើយើងនិយាយអំពីជំងឺធ្លាក់ស គឺយើងនិយាយអំពីទឹកសណ្ឋានដែលហូរចេញពីទ្វារមាសរបស់ស្ត្រី ។ តាមពិតទៅជំងឺធ្លាក់ស មានន័យទូលំទូលាយខ្លាំងណាស់ ព្រោះជំងឺនេះបណ្តាលមកពីមូលហេតុច្រើន និងរោគសញ្ញាមានលក្ខណៈផ្សេងៗពីគ្នាទៅតាមប្រភេទនៃជំងឺនេះដែលមានដូចជា ៖
ប្រសិនបើជំងឺធ្លាក់សវាមិនបង្កដោយមេរោគនោះទេ យើងហៅថាជាការវិវឌ្ឍធម្មជាតិរបស់ស្ត្រី ដែលធ្លាក់សបែបធម្មជាតិ មិនចាំបាច់ព្យាបាលនោះទេ ព្រោះនេះគឺជាការប្រែប្រួលវដ្តរដូវអ័រម៉ូនរបស់ស្ត្រីដែលធ្វើឱ្យស្ត្រីមានសញ្ញាធ្លាក់ស ។ ការធ្លាក់សបែបនេះមិនធ្លាក់ជាប់រហូតនោះទេ គឺធ្លាក់សដែលមានលក្ខណៈថ្លា និងសតិចតួច មិនមានធុំក្លិន មិនរមាស់ហើយក៏មិនមានរោគសញ្ញាឈឺចាប់អ្វីដែរ ។ ជាទូទៅរោគសញ្ញាបែបនេះច្រើនតែធ្លាក់នៅពេលមុនមករដូវ ឬក្រោយពេលមករដូវ ប្រហែល២សប្តាហ៍ ដូច្នេះបើសិនជាស្ត្រីដែលមានរោគសញ្ញាបែបនេះ ចាត់ជាការធ្លាក់សបែបធម្មជាតិដែលបណ្តាលមកពីការវិវឌ្ឍនៃអ័រម៉ូនរបស់ស្ត្រីគឺមិនទាមទារឱ្យព្យាបាលអ្វីនោះទេ ។
ប៉ុន្តែបើសិនជាជំងឺធ្លាក់សកើតឡើងដោយសារមេរោគ ដូចជាធ្លាក់សមានពណ៌សដូចជាខ្ទិះដូង ឬដូចម្សៅជាដើម អ្នកជំងឺច្រើនតែរមាស់ បើសិនជាអ្នកជំងឺទៅធ្វើរោគវិនិច្ឆ័យជាមួយគ្រូពេទ្យ ឃើញថាទ្វារមាសរបស់ស្ត្រីមានសភាពក្រហម ឬឃើញមានស្នាមអេសជាដើម ។ បើសិនជាស្ត្រីធ្លាក់សមានលក្ខណៈប្រឡាក់ជាប់ខោ ហើយមានពណ៌លឿង និងធុំក្លិនទៀតនោះករណីនេះបង្កឡើងដោយមេរោគម្យ៉ាងហៅថាសត្វល្អិតដែលមាននៅនឹងទ្វារមាសរបស់ស្ត្រី ។
លើសពីនេះទៀតបើសិនជាការធ្លាក់សមានលក្ខណៈឈឺពោះនៅផ្នែកខាងក្រោម និងពិបាកក្នុងការបត់ជើងតូច ការធ្លាក់សបែបនេះច្រើនតែបណ្តាលមកពីជំងឺកាមរោគដែលអ្នកជំនាញឱ្យឈ្មោះថាជាជំងឺប្រមេះទឹកបាយ ឬប្រមេះទឹក
ថ្លា ។ ក្រៅពីនេះក៏មានករណីជាច្រើនទៀតដែលមិនមានរោគសញ្ញា ប៉ុន្តែវាបង្កឱ្យមានផលប៉ះពាល់ដល់ស្ត្រីឬអាចចម្លងទៅដល់ដៃគូ បើសិនស្ត្រីរួមភេទ ខណៈពេលមានមេរោគទាំងនេះមានតែការធ្វើរោគវិនិច្ឆ័យទេទើបដឹងច្បាស់ ។លោកស្រីវេជ្ជបណ្ឌិតពឹង ជុតិមា បានប្រាប់បន្តថា ជាការពិតណាស់ចំពោះរោគធ្លាក់សមិនមានបែងចែកទៅតាមវ័យនោះទេ ជំងឺនេះមានលក្ខណៈខុសប្លែកពីគ្នាទៅតាមមូលហេតុមេរោគដែលបង្កតែប៉ុណ្ណោះ ។
ភាគច្រើនស្ត្រីវ័យក្មេង ដែលមិនទាន់ប្រឡូកក្នុងការរួមភេទ ការធ្លាក់សភាគច្រើនកើតឡើងដោយសារតែការវិវឌ្ឍបែបធម្មជាតិ និងការធ្លាក់សមួយប្រភេទទៀតកើតឡើងដោយសារតែកង្វះអនាម័យចំពោះទ្វារមាស ។ ចំពោះស្ត្រីដែលប្រឡូកក្នុងការរួមភេទហើយ ការធ្លាក់សអាចមានភាពស្មុគស្មាញច្រើន ព្រោះវាអាចទាក់ទងនឹងការធ្វើអនាម័យផង ការវិវឌ្ឍធម្មជាតិផង និងអាចទាក់ទងជំងឺកាមរោគដែលឆ្លងតាមរយៈការរួមភេទពីដៃគូផង ។ ដោយឡែកចំពោះស្ត្រីដែលមានវ័យចំណាស់ ជិតអស់រដូវស្ត្រីប្រភេទនេះមិនសូវមានការធ្លាក់សនោះទេ ។ ប៉ុន្តែផ្ទុយទៅវិញស្ត្រីប្រភេទនេះអាចមានរោគសញ្ញាផ្សេង ដែលបណ្តាលមកពីអ័រម៉ូនចុះថយធ្វើឱ្យស្ត្រីមានសភាពស្ងួត ឬក្រហាយនៅលើទ្វារមាស បើសិនជាមិនបានព្យាបាលទេ អាចនឹងធ្វើឱ្យមាន ការរំខានដល់ជីវិតរស់នៅប្រចាំថ្ងៃដែលធ្វើឱ្យមានផលបះ៉ពាល់ដល់ប្រព័ន្ធបន្តពូជរបស់ស្ត្រី ដែលក្រៅពីក្រហាយនិងស្ងួតហើយនោះ ស្ត្រីអាចប្រឈមនឹងការបត់ជើងតូចញឹកញាប់ខុសពីធម្មតាដែលធ្វើឱ្យសាមីខ្លួនយល់ថាមានជំងឺតម្រងនោម ។
ដោយឡែក ស្ត្រីឈានដល់វ័យអស់រដូវក៏អាចកើតមានរោគសញ្ញាចុកស្រពន់ដៃជើងបែកញើស ឬក្តៅខ្លួនខុសពីធម្មតាក្នុងរយៈពេលមួយរំពេច ។ ក្រៅពីនេះក្រោយពីអ័រម៉ូនធ្លាក់ចុះស្ត្រីក៏អាចប្រឈមនឹងជំងឺពុកឆ្អឹង អារម្មណ៍ផ្លូវភេទធ្លាក់ចុះ ដូច្នេះបើសិនជាមិនបានព្យាបាលឬផ្តល់ប្រឹក្សានោះទេ ស្ត្រីនឹងអាចមានផលវិបាកក្នុងគ្រួសារ ។លោកស្រីវេជ្ជបណ្ឌិតបានបញ្ជាក់ថា ចំពោះស្ត្រីដែលមានបញ្ហាជំងឺធ្លាក់សអាចប្រឈមផលប៉ះពាល់ជាច្រើនដូចជា បើស្ត្រីមិនទាន់ប្រឡូកនៅក្នុងការរួមភេទ ហើយលក្ខណៈធ្លាក់សគឺជាការវិវឌ្ឍបែបធម្មជាតិកើតឡើងដោយសារបម្រែបម្រួលនៃអ័រម៉ូននោះ វាមិនមានផលប៉ះពាល់ទៅដល់សុខភាពទេ ព្រោះជាច្បាប់ធម្មជាតិ មិនមែនជំងឺដែលត្រូវធ្វើការព្យាបាល ។ ផ្ទុយទៅវិញបើកើតមានជំងឺធ្លាក់សដោយសារកង្វះអនាម័យដែលធ្វើឱ្យមេរោគមានការលូតលាស់ គឺអាចឱ្យស្ត្រីមានការធ្លាក់ស រមាស់ ធុំក្លិន រំខានដល់បញ្ហាផ្លូវភេទនោះស្ត្រីត្រូវតែធ្វើការព្យាបាល ។
ចំពោះស្ត្រីដែលមានគ្រួសារឬដៃគូហើយមូលហេតុនៃការធ្លាក់សនេះកើតឡើងដោយសារតែមេរោគសត្វល្អិតនៅក្នុងទ្វារមាស ហើយមិនបានទៅធ្វើការព្យាបាលទេ អាចធ្វើឱ្យរំខានដល់បញ្ហាផ្លូវភេទ មានផលវិបាកផ្លូវចិត្តដោយសារតែការរំខាននៅពេលធ្លាក់ស ។ ផ្ទុយទៅវិញបើសិនជាធ្លាក់សដែលបង្កឡើងដោយប្រភេទមេរោគដែលឆ្លងតាមការួមភេទ នោះវាអាចធ្វើឱ្យរំខាននិងធ្វើឱ្យមានការឆ្លងទៅដល់ដៃគូរួមភេទ ហើយកាលណាបើអ្នកជំងឺរួមភេទជាមួយដៃគូ ដោយមិនបានប្រើប្រាស់ស្រោមអនាម័យនោះវានឹងអាចចម្លងតគ្នា ។
បើការធ្លាក់សបង្កឡើងដោយកាមរោគនោះអាចធ្វើឱ្យស្ត្រីខ្លួនឯងប្រឈមនឹងការកើតជំងឺរលាកសាច់ដុំត្រគាកអាចរលាកដៃស្បូន មានខ្ទុះនៅដៃស្បូនដែលនេះជាដំណាក់កាលធ្ងន់ធ្ងរបំផុតគឺទាមទារការព្យាបាលដោយប្រើរយៈពេលយូរនិងយកចិត្តទុកដាក់បំផុត ។ ជាពិសេសបើសិនជាស្ត្រីពពោះអាចនឹងចម្លងទៅដល់ទារកនៅក្នុងផ្ទៃ ធ្វើឱ្យទារកកើតជំងឺកាមរោគ ឬធ្វើឱ្យទារកពិការភាព ឬក៏មានការយឺតយ៉ាវនៅក្នុងការលូតលាស់ជាដើម ។
អ្វីដែលគ្រោះថ្នាក់ជាងនេះគឺអាចធ្វើឱ្យបុរសក៏ដូចជាស្ត្រី អសមត្ថភាពផ្លូវភេទ មិនអាចមានកូនបាន ឬអាចធ្វើឱ្យបុរសមានជំងឺរលាកផ្លូវតម្រងនោមរ៉ាំរ៉ៃ ដែលធ្វើឱ្យពិបាកក្នុងការបត់ជើងតូច ។ ដូច្នេះសរុបសេចក្តីមកវិញបុរសក៏អាចកើតមានជំងឺធ្លាក់សដូចជាស្ត្រីបានដែរ តែខុសត្រង់ថាបុរសគេហៅថា ជំងឺហូរខ្ទុះតាមតម្រង់នោម ៕
ចែករំលែកព័តមាននេះ