ខេត្តកំពង់ឆ្នាំង ៖ ក្នុងឱកាសត្រួតពិនិត្យការងារដាក់ភ្លើងនៅតាមក្លោងទ្វារជានិមិត្តសញ្ញារូបឆ្នាំងកាត់ទទឹងថ្នល់ជាតិនៅចំណុចសួនច្បារ ទួលក្រឡាញ់ កាលពីយប់ថ្ងៃទី១៣ ខែកុម្ភៈ ឆ្នាំ២០១៩នេះ លោកស៊ុន សុវណ្ណរិទ្ធ អភិបាលរងខេត្តកំពង់ឆ្នាំងបានអំពាវនាវដល់ប្រជាពលរដ្ឋចូលរូមទាំងអស់គ្នាទាំងសំអាតលំនៅដ្ឋាន…
ខេត្តកំពង់ឆ្នាំង ៖ ក្នុងឱកាសត្រួតពិនិត្យការងារដាក់ភ្លើងនៅតាមក្លោងទ្វារជានិមិត្តសញ្ញារូបឆ្នាំងកាត់ទទឹងថ្នល់ជាតិនៅចំណុចសួនច្បារ ទួលក្រឡាញ់ កាលពីយប់ថ្ងៃទី១៣ ខែកុម្ភៈ ឆ្នាំ២០១៩នេះ លោកស៊ុន សុវណ្ណរិទ្ធ អភិបាលរងខេត្តកំពង់ឆ្នាំងបានអំពាវនាវដល់ប្រជាពលរដ្ឋចូលរូមទាំងអស់គ្នាទាំងសំអាតលំនៅដ្ឋាន និងការដាក់ភ្លើងលំអរជាដើម ។ ទាំងនេះ គឺដើម្បីត្រៀមរៀបចំបុណ្យទន្លេនៅពាក់កណ្តាលខែមិនា ឆ្នាំ២០១៩ ខាងមុខនេះអោយទទួលបានជោគជ័យ ។
លោកអភិបាលរងខេត្តបានបន្តថា ដើម្បីត្រៀមរៀបចំបុណ្យទន្លេដែលមានរយៈពេល៣ថ្ងៃដោយគិតចាប់ពីថ្ងៃទី១៥ ដល់១៧ ខែមិនាខាងមុខនេះអាជ្ញាធរខេត្តបានរៀបចំគណៈកម្មការ ចំនួន១៧ គណៈកម្មការ ដើម្បីទទួលផែនការការងាររៀងៗខ្លួន ។ ដោយឡែកខាងភ្លើងលំអរ ខាងមន្ទីររ៉ែ និងថាមពលជាអ្នកទទួលខុសត្រូវដោយក្នុងនោះភ្លើងលំអរដាក់តាមក្លោងទ្វារ និមិត្តសញ្ញាឆ្នាំងកាត់ទទឹងផ្លូវជាតិលេខ៥ និងតាមផ្លូវចុះទៅផ្សារក្រោមមានចំនួន២១ក្លោងទ្វារ គឺបានសហការជាមួយក្រុមហ៊ុន មេឌា អាក់សិន ជាអ្នករៀបចំ ។
ក្រៅពីក្លោងទ្វារជានិមិត្តសញ្ញាឆ្នាំងយើងនៅមានក្លោងទ្វារជាគ្រោងប៉ាណូសម្រាប់ដាក់តាំងរូបស្តីពីសមិទ្ធផលរីកចម្រើនរបស់ខេត្តមានចំនួន៦៥កន្លែង និងក្លោងទ្វារជារបៀបមានដំបូលប្រក់ពីលើចំនួន១៧កន្លែងទៀតផងដែរ ដែលក្លោងទ្វារទាំងអស់ គឺសុទ្ធតែដាក់កាត់ទទឹងថ្នល់ក្នុងខេត្ត និងថ្នល់ជាតិ។
ជាមួយគ្នានេះឯកឧត្តមបានសំណូមពរដល់បងប្អូនអាជីវករតាមដល់ផ្លូវដែលមានការប៉ះពាល់ពីការរៀបចំបុណ្យទន្លេនេះសូមមេត្តាយោគយល់អាធ្យាស្រ័យ និងម្យ៉ាងវិញទៀតសូមសំណូមពរដល់បងប្អូនប្រជាពលរដ្ឋក្នុងក្រុងកំពង់ឆ្នាំង សូមចូលរួមសំអាតតាមមុខផ្ទះ និងចូលរួមដាក់ភ្លើងនៅតាមមុខផ្ទះរៀងៗខ្លួនផងដែរ ។
ដោយឡែកតាមមន្ទីរអង្គភាពដែលនៅតាមដងផ្លូវ គឺបានចាត់ចែងអស់ហើយប៉ុន្តែយោងតាម ប្រសាសន៍របស់លោកអភិបាលខេត្តកំពង់ឆ្នាំងថា ការដាក់តាំងភ្លើងនៅតាមមន្ទីរអង្គភាពនីមួយៗត្រូវដាក់អោយមានការប្រឡងប្រណាំងផងដែរ ។ ជាមួយគ្នានោះដែរតំណាងក្រុមហ៊ុនមេឌាអាក់សិនបានអោយដឹងថា ក្រុមហ៊ុនរបស់លោកធ្លាប់ទទួលជោគជ័យលើការរៀបចំភ្លើងនេះចំនួន២ដង ហើយលើកទី១នៅអង្គរសង្ក្រានខេត្តសៀមរាប និងលើកទី២ នៅពិធីបុណ្យទន្លេខេត្តកណ្តាល។
សូមបញ្ជាក់ថា ដើម្បីរៀបចំបុណ្យទន្លេនៅខេត្តកំពង់ឆ្នាំងដែលមានប្រមុខរាជរដ្ឋាភិបាលចូលរួមបើកកម្មវិធីអោយទទួលបានជោគជ័យអាជ្ញាខេត្តក៏ដូចជា គណៈកម្មការបុណ្យទន្លេទាំង១៧ បានប្រឹងប្រែងទាំងយប់ទាំងថ្ងៃដោយក្នុងនោះមានការរៀបចំភ្លើងរៀបចំសំអាតតាមដងផ្លូវ ជួសជុលផ្លូវកែប្រែផ្លូវក្នុងក្រុងមួយចំនួនពីផ្លូវដីក្រហមមកចាក់កៅស៊ូជាដើម ៕
ចែករំលែកព័តមាននេះ