រាជធានីភ្នំពេញ ៖ យ៉ាងហោចណាស់មនុស្សស្លាប់២៣៤នាក់ និងរបួស៨៤៤នាក់ ក្នុងបទល្មើសឧក្រិដ្ឋ និងមជ្ឈិមប្រចាំឆ្នាំ២០១៨ កន្លងមកនេះ បើយោងតាមរបាយការណ៍ក្រសួងមហាផ្ទៃដែលកោះសន្តិភាពទទួលបាននាព្រឹកថ្ងៃទី១៣ ខែកុម្ភៈ ឆ្នាំ២០១៩…
រាជធានីភ្នំពេញ ៖ យ៉ាងហោចណាស់មនុស្សស្លាប់២៣៤នាក់ និងរបួស៨៤៤នាក់ ក្នុងបទល្មើសឧក្រិដ្ឋ និងមជ្ឈិមប្រចាំឆ្នាំ២០១៨ កន្លងមកនេះ បើយោងតាមរបាយការណ៍ក្រសួងមហាផ្ទៃដែលកោះសន្តិភាពទទួលបាននាព្រឹកថ្ងៃទី១៣ ខែកុម្ភៈ ឆ្នាំ២០១៩ ។
របាយការណ៍ស្តីពីបទល្មើសព្រហ្មទណ្ឌបានឲ្យដឹងថា នៅឆ្នាំ២០១៨ បទល្មើសជារួមកើតឡើង២.៩៦៩លើកកើន១៥២លើក ស្មើ៥% រួមមានបទល្មើសឧក្រិដ្ឋ៦២១លើក កើន៧លើក ស្មើ១% (ប៉ុន្តែក្នុងនោះបទល្មើសដូចជា លួចមានស្ថានទម្ងន់ឃាតកម្មបោក និងបង្កគ្រាប់បែកមានការថយចុះ) និងបទល្មើសមជ្ឈិម២.៣៤៨លើក កើន១៤៥លើក ស្មើ៧% បណ្តាលឲ្យមនុស្ស២៣៤នាក់ របួស៨៤៤នាក់ រងគ្រោះ៦១៩នាក់ បាត់បង់រថយន្ត៤៩គ្រឿង ម៉ូតូ៣៥៣គ្រឿង និងសម្ភារៈមាសប្រាក់មួយចំនួនទៀត ។
ក្នុងបទល្មើសខាងលើកម្លាំងសមត្ថកិច្ចបង្ក្រាបបាន២.៥៩៨ករណី ស្មើ៨៧,៥% ឃាត់ខ្លួនបាន ៣.៧៤២នាក់ (ឧក្រិដ្ឋ៥២៨ករណី ស្មើ៨៥% ឃាត់ខ្លួន៧៨៤នាក់ មជ្ឈិម២.០៧០ករណី ស្មើ៨៨% ឃាត់ខ្លួន២.៩៥៨នាក់) ក្នុងនោះបង្ក្រាបជាក់ស្តែង២.០៦៩ករណី ស្មើ៧០% ឃាត់ខ្លួន២.៩៣៤នាក់ និងបង្ក្រាបដោយស៊ើបអង្កេត ក្នុងរយៈពេល៥២៩ ករណីស្មើ១៨% ឃាត់ខ្លួន៨០៨នាក់ ។
រឹបអូសវត្ថុតាងរួមមាន អាវុធវែង៩ដើម ខ្លី៣៤ដើម គ្រាប់បែក៤គ្រាប់ ម៉ូតូ៣៦៥គ្រឿង រថយន្ត៤៩គ្រឿង និងសម្ភារៈមាសប្រាក់មួយចំនួន ។ ជនល្មើស និងវត្ថុតាងត្រូវបានកសាងសំណុំរឿងបញ្ជូនទៅតុលាការ ។ ដោយឡែកការបង្ក្រាបគ្រឿងញៀនខុសច្បាប់លើកទី៣ ចាប់ពីថ្ងៃទី១ ខែមករា ដល់ថ្ងៃទី៣១ ខែធ្នូ ឆ្នាំ២០១៨ បង្ក្រាបបាន៨.០០២ករណី ឃាត់ខ្លួន១៦.២១៦នាក់ស្រី១៣៣៣នាក់ រឹបអូសវត្ថុតាងបានគ្រឿងញៀនសរុប៥៣៦,៣៦គីឡូក្រាម ព្រមទាំងមធ្យោបាយ និងឧបករណ៍វេចខ្ចប់មួយចំនួនទៀតក្នុងនោះនគរបាលជាតិបង្ក្រាបបាន៦.៧៩២ករណី ឃាត់ខ្លួន១៣.៣៩៧នាក់ ស្រី១.០១១នាក់ ។
បង្ក្រាបករណីធំៗចាប់ពី១គីឡូក្រាមឡើងបាន៤៧ករណី ស្មើ៤៧ក្រុម ឃាត់ខ្លួន៨៣នាក់ ស្រី២៤នាក់ ក្នុងនោះមេក្លោង១៩នាក់ ។ របាយការណ៍បានបញ្ជាក់ថា ហេតុការណ៍ពាក់ព័ន្ធជនបរទេសកើតឡើងចំនួន១.០១៦ ករណីមាន១១៣សញ្ជាតិ រួមមានជនបរទេសរងគ្រោះដោយឧបទ្ទវហេតុផ្សេងៗចំនួន៣៣៥ករណី (ស្លាប់២៤៧នាក់របួស១១៥នាក់) រងគ្រោះដោយបទល្មើសចំនួន ១៩១ករណី (ស្លាប់៥នាក់របួស២២នាក់) និងជនបរទេសបង្កបទល្មើសផ្សេងៗចំនួន៣១១ករណីស្មើ៥៤៣នាក់ ៕
ចែករំលែកព័តមាននេះ