រាជធានីភ្នំពេញ ៖ គិតចាប់ពីឆ្នាំ២០១៤ មកទល់ពេលនេះក្រសួងមហាផ្ទៃបានបណ្តេញជនបរទេសល្មើសច្បាប់ចំនួន១៥.២៥៤នាក់ មាន៩១សញ្ជាតិ ដោយឡែកជនបរទេសមានពាក់ព័ន្ធបទល្មើសផ្សេងៗដែលក្នុងរយៈពេលមួយឆ្នាំនេះបានរកឃើញ និងឃាត់ខ្លួនជនបរទេសល្មើសច្បាប់ចំនួន១.៣៤៨នាក់ មាន៥២សញ្ជាតិ និងរៀបចំនីតិវិធីបណ្តេញចេញពីកម្ពុជា។ នេះបើយោងតាមរបាយការណ៍ចែកជូននាយនគរបាល…
រាជធានីភ្នំពេញ ៖ គិតចាប់ពីឆ្នាំ២០១៤ មកទល់ពេលនេះក្រសួងមហាផ្ទៃបានបណ្តេញជនបរទេសល្មើសច្បាប់ចំនួន១៥.២៥៤នាក់ មាន៩១សញ្ជាតិ ដោយឡែកជនបរទេសមានពាក់ព័ន្ធបទល្មើសផ្សេងៗដែលក្នុងរយៈពេលមួយឆ្នាំនេះបានរកឃើញ និងឃាត់ខ្លួនជនបរទេសល្មើសច្បាប់ចំនួន១.៣៤៨នាក់ មាន៥២សញ្ជាតិ និងរៀបចំនីតិវិធីបណ្តេញចេញពីកម្ពុជា។
នេះបើយោងតាមរបាយការណ៍ចែកជូននាយនគរបាល នៅក្នុងពិធីបើកសន្និបាតត្រួតពិនិត្យការងារឆ្នាំ២០១៨ លើកទិសដៅការងារ ឆ្នាំ២០១៩ នៅព្រឹកថ្ងៃទី១៣ ខែកុម្ភៈ ឆ្នាំ២០១៩នេះ នៅក្រសួងមហាផ្ទៃ ។ របាយការណ៍ដដែលបានឲ្យដឹងទៀតថាផ្អែកតាមទិន្នន័យនៃការធ្វើជំរឿនស្ថិតិ ជនបរទេសអន្តោប្រវេសន្តមានចំនួន៤៩.៦៣០គ្រួសារ មនុស្ស១៨២.៦៧៣នាក់ ស្រី៨២.៤៨៨នាក់ក្នុងនោះអ្នកកាន់ឯកសារកម្ពុជាមិនប្រក្រតីមាន២៣.០១១គ្រួសារ មនុស្ស៨១.៨៦៤នាក់ ស្រី៣៩.៩២៤នាក់ ។
នៅក្នុងឆ្នាំ២០១៨នេះ ដោយអនុលោមតាមគោលការណ៍ដឹកនាំរបស់រាជរដ្ឋាភិបាល និងស្មារតីអនុក្រឹត្យលេ១២៩ អនក្រ.បក ចុះថ្ងៃទី១៥ ខែសីហា ឆ្នាំ២០១៧ ក្រសួងមហាផ្ទៃបានយកចិត្តទុកដាក់ជម្រុញវិធានការពីរស្របគ្នា គឺធ្វើការដកហូតឯកសារដែលមានភាពមិនប្រក្រតីផង និងផ្សព្វផ្សាយជម្រុញឲ្យជនបរទេសទាំងនោះមកបំពេញពាក្យស្នើសុំប្រកាសទទួលស្គាល់ជាជនបរទេសអន្តោប្រវេសន្ត និងប័ណ្ណស្នាក់នៅអចិន្ត្រៃយ៍ផង ។
ជាក់ស្តែង ការងារដកហូតឯកសារ ចាត់វិធានការដកហូតឯកសាររដ្ឋបាលកម្ពុជាមិនប្រក្រតីដែលជនបរទេសកំពុងកាន់កាប់ប្រើប្រាស់ក្នុងព្រះរាជាណាចក្រកម្ពុជាបានចំនួន៣៥.០១១ឯកសារស្មើ៨៨,៧៩% នៃផែនការ ។ ការងារទទួលពាក្យសុំប្រកាសទទួលស្គាល់ជាជនបរទេសអន្តោប្រវេសន្ត និងប័ណ្ណស្នាក់នៅអចិន្ត្រៃយ៍ គិតត្រឹមខែតុលា ឆ្នាំ២០១៨ ទទួលពាក្យប្រកាសទទួលស្គាល់ជា ជនបរទេសអន្តោប្រវេសន្ត (ចាប់១៨ឆ្នាំឡើង) បានចំនួន៧៥.០៨៩នាក់ ស្មើ៥៩,៦៩% និងពាក្យសុំប័ណ្ណស្នាក់នៅអចិន្ត្រៃយ៍បានចំនួន៥៧.៤៤៤នាក់ ស្មើ៤៥,៦២%ក្នុងនោះបានចេញប្រកាសចំនួន២៩.១៨១ ប្រកាសមនុស្ស៤៦.៣៨១នាក់ ស្មើ១៤.៤៤៩គ្រួសារនិងប័ណ្ណស្នាក់នៅអចិន្ត្រៃយ៍ចំនួន១៨.៥៣០សន្លឹក ។
បច្ចុប្បន្នជនបរទេសដែលមានឋានៈជាជនភៀសខ្លួនចំនួន៦១នាក់ ស្រី១៣នាក់ មាន៨សញ្ជាតិ អ្នកសុំសិទ្ធិជ្រកកោននៅសល់ចំនួន៨នាក់ ស្រី២នាក់ មាន៦សញ្ជាតិ និងជនជាតិភាគតិចវៀតណាមម៉ុងតាញ៉ា ដែលមិនទទួលបានឋានៈជាជនភៀសខ្លួន កំពុងរស់នៅកម្ពុជាចំនួន៣២នាក់ ស្រី២១នាក់ ។ នៅក្នុងឆ្នាំ២០១៨ ក្រសួងមហាផ្ទៃបានអនុវត្តនីតិវិធីលើករណីស្នើសុំសិទ្ធិជ្រកកោន នៅកម្ពុជាចំនួន១៤នាក់ ស្រី៥នាក់ មាន៥សញ្ជាតិ គិតចាប់ពីឆ្នាំ២០០៨មកទល់ពេលនេះ ក្រសួងមហាផ្ទៃបានអនុវត្តនីតិវិធីលើករណីស្នើសុំសិទ្ធជ្រកកោន នៅកម្ពុជាមានដូចជា បិទករណីចំនួន១៩៣នាក់ ស្រី៦៤នាក់ មាន១៨សញ្ជាតិ កំពុងដំណើរការនីតិវិធីចំនួន១៦នាក់ ស្រី៥នាក់ មាន៧សញ្ជាតិ និងផ្តល់ឋានៈជាជនភៀសខ្លួន ចំនួន៤៤នាក់ ស្រី១៣នាក់ មាន៦សញ្ជាតិ ។
របាយការណ៍ដដែលក៏បានបញ្ជាក់ថា គិតចាប់ពី១៩៩៩ មកដល់បច្ចុប្បន្នជនបរទេសដែលទទួលបានសញ្ជាតិខ្មែរដោយសញ្ជាតូបនីយកម្មមានចំនួន១,៩៣៥នាក់ ក្នុងនោះវិនិយោគទុន១,៧០៧នាក់ មាន៣៩សញ្ជាតិ ស្នាក់នៅចាប់ពី០៧ឆ្នាំឡើង២២៤នាក់ មាន២២សញ្ជាតិ និងស្នាដៃពិសេស០៤នាក់ មាន០៤សញ្ជាតិ ។
ក្នុងឆ្នាំ២០១៨ ក្រសួងបានពិនិត្យសម្រេចលើសំណើសុំចូលសញ្ជាតិខ្មែរ និងលះបង់សញ្ជាតិខ្មែរសរុបចំនួន២៨នាក់ ស្រី០៦នាក់ រួមមានសុំចូលសញ្ជាតិ តាមលក្ខខណ្ឌវិនិយោគទុន២០នាក់ ស្រី០៣នាក់ សុំចូលសញ្ជាតិតាមលក្ខខណ្ឌស្នាក់នៅកម្ពុជាចាប់ពី០៧ឆ្នាំឡើង០២នាក់ និងសុំលះបង់សញ្ជាតិខ្មែរ០៦នាក់ ស្រី០៣នាក់ ៕
ចែករំលែកព័តមាននេះ