ទីក្រុងឌូបៃ ៖ លោកស្រី Christine Lagarde ប្រធានគ្រប់គ្រងមូលនិធិរូបិយប័ណ្ណអន្តរជាតិ (IMF) បានព្រមានដល់រដ្ឋាភិបាលឲ្យត្រៀមខ្លួនសម្រាប់ព្យុះភ្លៀងសេដ្ឋកិច្ចដែលអាចនឹងកើតមានឡើងនាពេលខាងមុខនេះ ។
យោងតាមសារព័ត៌មានបាងកក ប៉ុស្ដិ៍ ចេញផ្សាយកាលពីថ្ងៃទី១១ កុម្ភៈ ម្សិលមិញ បានស្រង់សម្ដីលោកស្រីដែលបាននិយាយក្នុងកិច្ចប្រជុំមួយនៅទីក្រុងឌូបៃថា ៖« ពួកយើងឃើញសេដ្ឋកិច្ចដែលកំពុងតែលូតលាស់កាន់តែយឺតជាងការដែលយើងបានគិតទុក »។
កាលពីខែមុន IMF បានបន្ទាបព្យាករណ៍លើការលូតលាស់សេដ្ឋកិច្ចពិភលោកសម្រាប់ឆ្នាំនេះពី៣,៧%មកស្មើ ៣,៥%វិញ ។ លោកស្រីបានលើកឡើងពីហានិភ័យធំៗចំនួនបួនដែលជាកត្តាប៉ះពាល់ដល់សេដ្ឋកិច្ចពិភពលោកខ្លាំងជាងគេ ។
ក្នុងនោះរួមមានភាពតានតឹងពាណិជ្ជកម្មនិងការដំឡើងពន្ធ ការរឹតបន្តឹងផ្នែកហិរញ្ញវត្ថុ ភាពមិនប្រាកដប្រជាទាក់ទិននឹងលទ្ធផលនៃការចាកចេញរបស់ចក្រភពអង់គ្លេសពីសហភាពអឺរ៉ុប និងផលប៉ះពាល់ដែលវាបង្កឡើង រួមជាមួយនឹងការអន់ថយនៃសេដ្ឋកិច្ចរបស់ប្រទេសចិនផងដែរ ។
លោកស្រី Lagarde បានបន្តទៀតថាភាពតានតឹងពាណិជ្ជកម្ម ជាពិសេសរវាងសហរដ្ឋអាមេរិក និងប្រទេសចិនកំពុងតែបង្កផលប៉ះពាល់ជុំវិញពិភពលោកទៅហើយ ។ លោកស្រីបានបន្ថែមថា ៖« ពួកយើងមិនដឹងច្បាស់ទេថាតើវានឹងចេញរូបរាងយ៉ាងដូចម្តេច តែអ្វីដែលពួកយើងដឹងគឺវាបានចាប់ផ្តើមបង្កផលប៉ះពាល់ដល់ការធ្វើពាណិជ្ជកម្ម ជំនឿចិត្ត និងទីផ្សារហើយ »។
អ្នកស្រីបានព្រមានដល់រដ្ឋាភិបាលផងដែរឲ្យជៀសវាងគោលនយោបាយការពារនិយមជាដើម ៕
ចែករំលែកព័តមាននេះ