រាជធានីភ្នំពេញ៖ កញ្ញាប៉ែន ស្រីពេជ្រ គឺជាពិធីការិនី និងជាតារាសម្តែងកំពុងមានឈ្មោះបោះសំឡេងក្នុងពិភពសិល្បៈ ។ ពេលនេះជាតារាចែងចាំង តែអតីតកាលស្រីពេជ្រ ខុសពីនេះឆ្ងាយណាស់ ។ កាលពីអាយុ១៤ឆ្នាំ ប៉ែន ស្រីពេជ្រ ជាកូនអ្នកក្រីក្រ រស់នៅខេត្តព្រះវិហារ ។ ខ្សែជីវិតនាពេលនោះស្រីពេជ្រ ជាក្មេងស្រីលក់ផ្ទាំងរូបភាព ផ្សេងៗនៅលើភ្នំប្រាសាទព្រះវិហារ ។ ដោយប្រាថ្នាឲ្យជីវិតលូតលាស់ឡើង ស្រីពេជ្រ បានបន្សាត់ខ្លួនពីទីនោះមករាជធានីភ្នំពេញ ក្នុងគោលបំណងស្វែងរកការងារធ្វើផង និងបន្តការសិក្សាផង ។
ជីវិតពោរពេញដោយទុក្ខលំបាកបានកើតមានឡើងស្ទើរតែគ្រប់ពេលសម្រាប់ប៉ែន ស្រីពេជ្រ នៅទឹកដីប្រាសាទព្រះវិហារដ៏ល្បីល្បាញរបស់ខ្មែរនោះ ហើយនៅភ្នំពេញក៏មិនខុសគ្នាប៉ុន្មានដែរ វាជាខ្សែជីវិតអ្នកក្រដែលតែងតែបែបនេះ ។
ការងារដំបូងដែលប៉ែន ស្រីពេជ្របានចាប់យកនោះ គឺដើរលក់រូបភាពប្រាសាទព្រះវិហារ និងប្រាសាទអង្គរវត្ត នៅលើភ្នំប្រាសាទព្រះវិហារជូនដល់ភ្ញៀវទេសចរជាតិ និងអន្តរជាតិ។ ទើបតែមានអាយុ១៤ឆ្នាំ នាងត្រូវរ៉ាប់រងធ្វើការនេះសម្រាប់ជីវភាពគ្រួសារ និងផ្គត់ផ្គង់ការសិក្សារបស់ខ្លួនផង ។
ប៉ែន ស្រីពេជ្រ នាពេល ថ្មីៗកន្លងមកនៅចងចាំថា ក្នុងពេលដែលនាងធ្វើជាអ្នកដើរលក់រូបភាពលើភ្នំនោះ ជីវភាពប៉ាម៉ាក់របស់នាងលំបាកលំបិន មិនដូចបច្ចុប្បន្ននេះទេ ។ ជារៀងរាល់ថ្ងៃស្រីពេជ្រ តែងតែដើរលក់វត្ថុអនុស្សាវរីយ៍ជាប្រចា ំពេលខ្លះបាន៣០០ទៅ៤០០បាត អត់គិតខ្លាចហត់នឿយទេ ដើម្បីជួយឪពុកម្តាយ ។ រស់នៅព្រះវិហារ តែប៉ែន ស្រីពេជ្រ មានដើមកំណើតនៅខេត្តតាកែវ ។ ប៉ាម៉ាក់នាងបានទៅរស់នៅខេត្តព្រះវិហារនាឆ្នាំ២០១៣ ។
ពេលរស់នៅភ្នំពេញ ប៉ែន ស្រីពេជ្រ បានដាក់ពាក្យចូលរួមប្រឡងក្នុងកម្មវិធីមួយជាប់ចំណាត់ថ្នាក់លេខ២ ដោយកម្មវិធីនោះរើសយកអ្នកមានទេពកោសល្យទាំងចម្រៀង បង្ហាញម៉ូដ និងសម្តែង ។ ជ័យលាភីនោះហើយដែលបានបណ្តែតជីវិតស្រីពេជ្រ ក្នុងពិភពសិល្បៈ ។
ប៉ែន ស្រីពេជ្រ បានបញ្ចប់ការសិក្សាត្រឹមវិទ្យាល័យនៅរាជធានីភ្នំពេញ ។ នាងបានចុះកិច្ចសន្យាធ្វើជាពិធីការិនីនៅស្ថានីយទូរទស្សន៍ហង្សមាសរយៈពេល៥ឆ្នាំបន្ទាប់ពីថ្នាក់ដឹកនាំសម្លឹងឃើញទេពកោសល្យរបស់នាង អាចយកប្រើការបាន ។ ការងារនេះរៀមច្បងដែលនាងយកលំនាំតាម គឺពិធីការិនីកែវ ចាន់និមល និងលោកជា វិបុល ។
ស្រីស្រស់ប៉ែន ស្រីពេជ្រ និយាយទាំងរីករាយ និងមានមោទនភាពថា«ខ្ញុំពុំធ្លាប់នឹកថាបានមកឈរលើវេទិកា ធំៗនៅក្នុងស្ថានីយដ៏មានប្រជាប្រិយភាពមួយនេះឡើយ និងគិតថានេះជាឱកាសដែលនាងខ្ញុំកាន់តែព្យាយាមតស៊ូបន្តទៀត ។ រាល់ថ្ងៃការងារនៅក្នុងស្ថានីយ៥ទៅ៦កម្មវិធីសុទ្ឋតែតន្ត្រីផ្សាយផ្ទាល់ និងចុងសប្តាហ៍នាងខ្ញុំតែតែចេញធ្វើពិធីករនៅតាមខេត្តជាមួយការប្រគំតន្ត្រី»។
ចំពោះអាជីពសម្តែងភាពយន្ត ប៉ែន ស្រីពេជ្រ ប្រឡូកបាន៥ទៅ៦រឿងហើយជាប្រភេទរឿងភាគ ។ រឿងដែលនាងសម្តែងភាគច្រើននៅលើកញ្ចក់ទូរទស្សន៍បាយ័ន ។ រឿងភាគដំបូងមានចំណងជើងថា«មេម៉ាយមានលាភ»។ បន្ទាប់មករឿង«ពិសឫស្យា» រឿង«បេះដូងឃ្លាតទ្រូង»និងមានមួយរឿងទៀតត្រៀមបញ្ចាំងនៅចុងខែកុម្ភៈនេះ ។ ធ្លាប់តែសម្តែងរឿងភាគ ពេលនេះស្រីពេជ្រ ប្រាថ្នាចង់សម្តែងរឿងដុំម្តង ។
ប៉ែន ស្រីពេជ្រ មានបងប្អូនបង្កើត៣នាក់ប្រុស១ ស្រី២ ក្នុងនោះនាងកូនទី២ ។ឪពុកស្រីពេជ្រ ជាប៉ូលិសការពារព្រំដែនប្រចាំខេត្តព្រះវិហារ ឯម្តាយជាមេផ្ទះ ។ ក្នុងពេលអាជីពកំពុងតែរីកចម្រើន ប៉ែន ស្រីពេជ្រ បិទបេះដូងមិនទាន់ទទួលបុរសណាទេ ។ អ្វីដែលស្រីពេជ្រ យកចិត្តទុកដាក់នាពេលនេះ គឺជ្រោងជីវភាពគ្រួសារឲ្យបានល្អប្រសើរ ៕
ចែករំលែកព័តមាននេះ