អ្នកវិទ្យាសាស្ដ្រសហរដ្ឋអាមេរិកបានព្រមានថា បុរស-ស្រ្ដីវ័យក្រោម៥៥ឆ្នាំដែលពិសាកាហ្វេច្រើនជាង៤ពែងក្នុងមួយថ្ងៃអាចប្រឈមនឹងការស្លាប់មុនអាយុដល់ទៅ៥០ភាគរយ ។ ក្រុមអ្នកវិទ្យាសាស្រ្ដដែលបានពិសោធលើមនុស្សវ័យពី២៨ឆ្នាំទៅ៨៧ឆ្នាំប្រមាណ៣៣.៧២៤នាក់បានដាក់ការសង្ស័យថា អ្នកដែលពិសាកាហ្វេច្រើនលើសលប់រហូតដល់ទៅ២៨ពែងក្នុងមួយសប្ដាហ៍ ទំនងជាធ្វើឱ្យប៉ះពាល់ដល់ការរំលាយអាហាររបស់រាងកាយ ដែលការប៉ះពាល់នេះបានលុបលើអត្ថប្រយោជន៍សុខភាពមួយចំនួនរបស់កាហ្វេ ។
បន្ថែមពីលើនេះទៀត អ្នកដែលញៀនកាហ្វេខ្លាំងទាំងនេះ ក៏ទំនងជាអ្នកដែលរងផលប៉ះពាល់ខាងដើមនេះផងដែរ។ Steven Blair ជាអ្នកស្រាវជ្រាវមកពីសាកលវិទ្យាល័យ University of South Carolina បានថ្លែងថា «ច្បាស់ណាស់ លទ្ធផលនៃការរកឃើញលើកនេះមិនបានបង្ហាញនូវការជាប់ពាក់ព័ន្ធគ្នារវាងការពិសាកាហ្វេ និងសេចក្ដីស្លាប់ចំពោះបុរស និងស្រ្ដីវ័យចាស់នោះទេ» ។ ទោះជាយ៉ាងនេះក្ដី ក្រុមស្រាវជ្រាវរបស់លោកមិនបានពន្យល់ពីមូលហេតុដែលកាហ្វេមិនផ្ដល់ផលប៉ះពាល់ដូចគ្នានេះលើមនុស្សវ័យចាស់នោះទេ ។
កាហ្វេត្រូវគេដឹងថា ផ្ទុកទៅដោយសារធាតុគីមីផ្សេងៗគ្នារាប់រយមុខ ដូច្នេះវាផ្ដល់ទាំងផលអាក្រក់ និងផលល្អដល់សុខភាពអាស្រ័យលើអ្នកទទួលទាន ។ យោងតាមការសិក្សាពីមុនមកបានបង្ហាញថា កាហ្វេពិតជាផ្ដល់ផលល្អដល់សុខភាព ប្រសិនជាប្រើប្រាស់ក្នុងកម្រិតមធ្យម ៕
ចែករំលែកព័តមាននេះ