រាជធានីភ្នំពេញ ៖ តារាសម្តែងលោកស៊ិន សំនៀង ដែលបានបោះជំហានចូលពិភពសិល្បៈជាច្រើនឆ្នាំមកហើយនោះ គេសង្កេតឃើញថា ឆ្នាំថ្មីនេះការងារហាក់ស្ទុះឡើងគ្រាន់បើ ។ ពិសេសលោកសំនៀង ទើបបានក្លាយជាថៅកែហាងលក់វត្ថុអនុស្សាវរីយ៍ និងហាងកាត់ដេរ ស្ទើរតែមិននឹកស្មានដល់រហូតអ្នកសិល្បៈមួយចំនួនលាន់មាត់ថា លោកសល់លុយច្រើនហើយមើលទៅ ។ ដើម្បីបំពេញគោលដៅរបស់ខ្លួន លោកស៊ិន សំនៀង បានបង្ហើប ខ្លះៗថា លោកគ្រោងបន្ថែមការងាររកសុីមួយថ្មីទៀត គឺបើកផ្ទះសំណាក់នៅទីប្រជុំជនក្នុងទឹកដីខេត្តសៀមរាប តាមគម្រោងដែលលោកគិតពីមុនមកម៉្លេះ ។
គ្រាន់តែក្លាយជាថៅកែហាង កាលពីពេល ថ្មីៗនេះ អ្នកណាក៏ថា លោកស៊ិន សំនៀង តារាសម្តែងដែលក្តាប់បានតំណែងតួឯកជាច្រើនរឿងតាមកញ្ចក់ទូរទស្សន៍នេះមានលុយក្នុងដៃច្រើនគ្រាន់បើ និងពូកែសន្សំមែន ព្រោះលោកមិនដែលហ៊ានប្រើប្រាស់របស់ផ្ទាល់ខ្លួនដូចជា រថយន្ត ថ្លៃៗ ឬរបស់ណាមានតម្លៃលើសពីលទ្ធភាពរបស់ខ្លួនឡើយ គឺប្រើរបស់ ល្មមៗប៉ុណ្ណោះ ។
ប្រឡូកក្នុងពិភពសិល្បៈតាំងពីក្មេងរហូតពេលនេះ លោកសុិន សំនៀង គេឃើញប្រើតែម៉ូតូ១គ្រឿង និងរថយន្តកាមរីគូទជ្រុងចាស់ សម្រាប់ទៅណាមកណា ។ ពេលខ្លះបើកតាមផ្លូវហុយផ្សែងទ្រលោម ឡើងចង់ពុលអ្នកនៅតាមផ្លូវ ។ ទោះជាយ៉ាងណាក្តី រូបភាពដែលលោកសំនៀង ធ្វើដាក់គេឯងអស់រាប់ឆ្នាំកន្លងទៅនេះ មិនបានធ្វើឱ្យលោកខ្មាសអៀនទេ ទីបំផុតលោកបានក្លាយខ្លួនជាម្ចាស់ហាង២ក្នុងដៃមានលំនឹងប្រចាំខ្លួន បន្ទាប់ពីព្យាយាមសន្សំសំចៃទុកបង្កើតមុខរបរទី២ ។
អ្វីដែលពិសេសអាចជាគម្រូថ្មីមួយបន្ថែមទៀតសម្រាប់តារាប្រុសដែលពេលកំពុងមានយីអ៊ុនគួរតែក្តាប់ឱកាសណាមួយដូច លោកស៊ិន សំនៀង សម្រាប់ពង្រីកអាជីពខ្លួន ។ ដើម្បីបន្តរូបភាពជោគជ័យ ស៊ិន សំនៀង ដែលកំពុងតែជក់ចិត្តជក់អារម្មណ៍ធ្វើជាថៅកែហាងរហូតភ្លេចគិតរឿងរកប្រពន្ធកូននោះ កំពុងតែរៀបផែនការមួយទៀត ដែលលោកតែងតែស្រមៃតាំងពីមិនទាន់ប្រឡូកសិល្បៈម៉្លេះ នោះគឺចង់ក្លាយជាម្ចាស់ផ្ទះសំណាក់ ។ ផែនការមួយនេះ លោកកំពុងតែផ្ចិតផ្ចង់ជា បណ្តើរៗហើយ ព្រោះតែលោកបានទៅមើលដល់ទីតាំងរកសុីនោះ ដើម្បីឱ្យដឹងថា ត្រូវរៀបចំសាងសង់ផ្ទះសំណាក់បែបណាត្រូវចិត្តអតិថិជន ។
លោកស៊ិន សំនៀង ដែលគ្រោងបញ្ចេញកញ្ចប់ប្រាក់បង្កើតមុខរបរទីបីជាផ្ទះសំណាក់នៅខេត្តសៀមរាបនេះអះអាងថា លោកពិតជាមានបំណងបើកផ្ទះសំណាក់នោះមែន ព្រោះលោកចង់បង្កើតមុខរបរនេះយូរមកហើយ និងស្រឡាញ់ផ្នែកនេះទៀតផង ។ លោកបានខិតខំរៀបចំទុកដាក់លុយកាក់សន្សំតាំងពីឡើងកូដសិល្បៈ ទាំងត្រដាបត្រដួស ពេលខ្លះអត់ហ៊ានចាយវាយផ្តេសផ្តាសទេ ដើម្បីបំពេញមហិច្ឆតារបស់ខ្លួន ព្រោះលោកបានព្យាករថានឹងត្រូវធ្វើផែនការដែលចិត្តស្រឡាញ់ឱ្យបាននៅពេលណាមួយ ។ នៅទីបំផុត លោកបានទិញដីមួយកន្លែងនៅតំបន់ជាយក្រុងសៀមរាប ទុកចោលតាំងពីដីនៅតំបន់នោះមិនទាន់ត្រូវប៉ាន់ឯណោះ ។
ទើបតែពេលនេះឮថា គេជិតបង្កើតកន្លែងកម្សាន្តជិតដីរបស់លោក បានជាលោកមានគំនិតរៀបចំផ្ទះសំណាក់ ដើម្បីទាញភ្ញៀវស្នាក់នៅ ។ ដីនោះមានទំហំធំល្មម ហើយលោកបានទិញឈើទុកក្នុងបរិវេណដីរបស់លោក ដើម្បីច្នៃធ្វើជាផ្ទះសំណាក់រចនាបែបខ្មែរ ដោយរៀបចំឱ្យស្អាតទាំងភ្លើងពណ៌ ហើយបន្ទប់គេងមើលទៅបែបមនោសញ្ចេតនា ។ បើសិនជាធ្វើបាន លោកនឹងដាក់របស់របរលក់វត្ថុអនុស្សាវរីយ៍នៅទីនោះបន្ថែមទៀត ។
តារាសម្តែង ដែលទោះក្លាយជាម្ចាស់ហាងនៅតែប្រើរថយន្តចាស់ដដែលនេះ បានអះអាងទៀតថា លោកមិនចង់ទិញរបស់ណាមកប្រើខុសខ្ទង់ទេ ទើបបានជាចេះតែប្រើរបស់ ដដែលៗ ដើម្បីទុកលុយយកប្រើប្រាស់តាមតម្រូវការនៅចំពោះមុខឱ្យផុតសិនចាំគិតទៀត ព្រោះបើរកសុីចំណេញវាមិនខ្វះរបស់ទាំងនោះប្រើឡើយ ហើយមិនហួសពេលដែរ ។ មហាជនសង្ឃឹមថា ផែនការរបស់លោកស៊ិន សំនៀង នឹងជោគជ័យ ហើយលេចចេញជារូបរាងនាពេល ឆាប់ៗនេះ ៕
ចែករំលែកព័តមាននេះ