ទីក្រុងហុងកុង ៖ អតិថិជនចិនបានកាត់បន្ថយការចំណាយលើផលិតផលផ្សេងៗមិនថា លើ iPhone ឬនាឡិកាឡើយ ខណៈដែលសង្គ្រាមពាណិជ្ជកម្មជាមួយសហរដ្ឋអាមេរិកចាប់ផ្តើមជះឥទ្ធិពលដល់សេដ្ឋកិច្ច។
យោងតាមសារព័ត៌មានបាងកក ប៉ុស្ដិ៍ ចេញផ្សាយកាលពីថ្ងៃទី២ មករា កន្លងមក បានឲ្យដឹងថា បុណ្យចូលឆ្នាំប្រពៃណីចិនរយៈពេលមួយសប្តាហ៍នេះប្រៀបបានជាការសាកល្បងសម្រាប់អតិថិជនក្នុងប្រទេសចិន។ ការធ្វើដំណើរកម្សាន្តបានចាប់ផ្តើមទៅហើយ ដោយមានប្រជាជនអាចធ្វើដំណើរដល់ទៅ៣ប៊ីលានដងក្នុងអំឡុងពេលនេះ ប៉ុន្តែភាគច្រើនតាមផ្លូវរថភ្លើង ។
បុណ្យចូលឆ្នាំប្រពៃណីចិននឹងចាប់ផ្តើមជាផ្លូវការនៅថ្ងៃអង្គារ ដែលធ្វើឲ្យប្រជាជនរាប់សិបលាននាក់ធ្វើដំណើរទៅផ្ទះញាតិមិត្ត ទៅបរទេសដើម្បីកម្សាន្ត ឬចំណាយលើការទិញអំណោយផ្សេងៗជាដើម។
កាលពីឆ្នាំ២០១៨ ប្រជាជនចិនចំណាយប្រមាណ១៣៧ប៊ីលានដុល្លារនៅភោជនីយដ្ឋាន និងហាងទំនិញផ្សេងៗក្នុងអំឡុងពេលបុណ្យចូលឆ្នាំប្រពៃណី។
ការអបអរឆ្នាំថ្មីសម្រាប់ឆ្នាំនេះកើតមានឡើងខណៈដែលមានសង្គ្រាមពាណិជ្ជកម្មជាមួយនឹងសហរដ្ឋអាមេរិក។ សង្គ្រាមនេះបានប៉ះពាល់ដល់ទីផ្សារភាគហ៊ុននិងអចលនទ្រព្យចិន ព្រមទាំងផលិតផលក្នុងស្រុកសរុបសម្រាប់ត្រីមាសចុងក្រោយនាឆ្នាំ២០១៨ ផងដែរ ។
លោក Adam Xu អ្នកជំនាញមកពីក្រុមហ៊ុនផ្តល់សេវាកម្មប្រឹក្សាយោបាល់ OC&C បានឲ្យដឹងថា ក្រុមហ៊ុនដែលមានអតិថិជនភាគច្រើនជាប្រជាជនថ្នាក់កណ្តាលនឹងទទួលរងការប៉ះពាល់ច្រើនជាងគេក្នុងអំឡុងពេលបុណ្យចូលឆ្នាំចិននេះ ។
តម្រូវការគ្រឿងអលង្ការភាគច្រើនតែងតែកើនឡើងក្នុងអំឡុងពេលបុណ្យប្រពៃណីនេះព្រោះមាសបានចាត់ទុកជាអំណោយដ៏ល្អពីអ្នកជំនាន់មុនដល់អ្នកជំនាន់ថ្មី។ ប៉ុន្តែលោក Nikos Kavalis ដែលជាប្រធានម្នាក់មកពីសហគ្រាសស្រាវជ្រាវ Metals Focus បាននិយាយថា ការទិញនឹងមិនដូចគ្នានឹង១០ឆ្នាំមុនទេ ព្រោះអតិថិជនចិនកាន់តែច្រើននាបច្ចុប្បន្ននេះជ្រើសការធ្វើដំណើរកម្សាន្តវិញ ៕
ចែករំលែកព័តមាននេះ