រាជធានីភ្នំពេញ ៖ សម្ដេចនិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិមានប្រសាសន៍ថា ជោគជ័យទាំងឡាយដែលកងទ័ពខិតខំសម្រេចបានកន្លងមកនេះបានបង្ហាញថា កងយោធពលខេមរភូមិន្ទពិតជាកម្លាំងស្នូលជាឆ្អឹងខ្នងដ៏ចាំបាច់មានឧត្តមគតិស្មោះត្រង់ចំពោះជាតិមាតុភូមិគោរពស្រលាញ់ប្រជាជនមានឆន្ទៈប្រយុទ្ធប្ដូរផ្ដាច់មានសមត្ថភាពគ្រប់គ្រាន់ និងធានាបាននូវកិច្ចការពារសន្តិភាពបូរណភាព ទឹកដីនិងអធិបតេយ្យជាតិការពារសន្តិសុខសណ្ដាប់ធ្នាប់សុវត្ថិភាពសង្គមនិងទប់ស្កាត់បានទាន់ពេលវេលាគ្រប់ឧបាយកល់ធ្វើបដិវត្តពណ៌របស់គណបក្សប្រឆាំងគ្រប់កាលៈទេសៈនិងធានាបានដល់ដំណើរការរីកចម្រើននៃលទ្ធិប្រជាធិបតេយ្យសិទ្ធិមនុស្សនិងការអភិវឌ្ឍប្រកបដោយចីរភាពនៅកម្ពុជា ។
សម្តេចពិជ័យសេនាបានថ្លែងនៅក្នុងពិធីបិទសិក្ខាសាលាបូកសរុបលទ្ធផលការងារឆ្នាំ ២០១៩របស់បញ្ជាការដ្ឋានកងទ័ពជើងទឹកនារសៀលថ្ងៃទី៣០ ខែមករាឆ្នា២០១៩ ។
សម្តេចបានថ្លែងការកោតសរសើរចំពោះមេបញ្ជាការកងទ័ពជើងទឹកនាយនាវិក និងថ្នាក់ដឹកនាំតាមស្ថាប័ននិងកងឯកភាពគ្រប់លំដាប់ថ្នាក់ដែលបានខិតខំយកអស់កម្លាំងកាយចិត្តប្រាជ្ញានិងស្មារតីបំពេញបេសកកម្មតាមតួនាទី និងភារកិច្ចរបស់ខ្លួនសម្រេចបានជោគជ័យជាបន្តបន្ទាប់សំដៅលើកកម្ពស់សមត្ថភាពអង្គភាពកងទ័ពជើងទឹកឲ្យកាន់តែមានប្រសិទ្ធភាពដើម្បីពង្រឹងកិច្ចការពារអធិបតេយ្យភាពបូរណភាពទឹកដីការពារសន្តិសុខសណ្ដាប់ធ្នាប់សង្គមសំដៅចូលរួមអភិវឌ្ឍន៍ប្រទេសជាតិឲ្យកាន់តែរីកចម្រើនថែមទៀត ។
សម្តេចពិជ័យសេនាបានថ្លែងថា ៖«កងទ័ពត្រូវចូលរួមដើម្បីទប់ស្កាត់បដិវត្តន៍ពណ៌ដោយសម្ដេចបានចាត់ទុកបញ្ហាបដិវត្តន៍ពណ៌ជារឿងដ៏ស្មុគស្មាញបំផុតព្រោះមានការប្រែប្រួលស្ថានភាពជាបន្តបន្ទាប់ទៅតាមបំណងរបស់ក្រុមដែលចង់បំភ្លេចបំផ្លាញនូវការរីកចម្រើនរបស់សង្គមជាតិ» ។
សម្តេចបានលើកឡើងថា«បដិវត្តន៍ពណ៌នេះកន្លងមកបានកើតឡើងនៅជុំវិញពិភពលោកបានបង្កភាពអុកឡុកបង្កភាពមហន្តរាយ និងភាពវឹកវរដែលបណ្តាប្រទេសមួយចំនួនមិនទាន់រួចចាកផុតពីភាពអន្តរាយនៅឡើយ ។ ដោយឡែកកម្ពុជាយើងក៏ធ្លាប់បានជួបបញ្ហាប៉ុនប៉ងធ្វើបដិវត្តន៍ពណ៌នេះដែរតាំងពីឆ្នាំ ២០១៣ដែលក្រុមប្រឆាំងបាននាំយកមកប្រើប្រាស់នៅកម្ពុជាយើង ដោយគេបានកៀងគរប្រើកម្លាំងប្រជាជនមកធ្វើការផ្លាស់ប្ដូររដ្ឋាភិបាលស្របច្បាប់ដែលដឹកនាំដោយសម្ដេចតេជោ ហ៊ុន សែន» ។
សម្តេចពិជ័យសេនាប្រមុខការពារជាតិបញ្ជាក់ដោយបានដាក់បទបញ្ជាយ៉ាងម៉ឹងម៉ាត់ដល់កងទ័ពទាំងអស់ត្រូវតែស្មោះត្រង់ និងមានឆន្ទៈប្ដូរផ្ដាច់ក្នុងការការពាររាជរដ្ឋាភិបាលការពារសម្ដេចតេជោមិនអនុញ្ញាតឲ្យក្រុមណាឬជនណាមកផ្តួលរំលំ រាជរដ្ឋាភិបាលស្របច្បាប់ដែលដឹកនាំដោយសម្ដេចតេជោហ៊ុនសែនបានឡើយ ។
សម្ដេចថ្លែងថា «ការចូលរួមក្នុងការដាក់ទណ្ឌកម្មមកលើកម្ពុជាក៏ជាផ្នែកមួយនៃការលូកដៃក្នុងការធ្វើបដិវត្តន៍ពណ៌ផងដែរ» ៕
ចែករំលែកព័តមាននេះ