ខេត្តកណ្ដាល ៖ កម្មការិនីផ្នែកម៉ាសុីនវាយឡេវអាវម្នាក់ ខណៈកំពុងជូតម៉ាសុីន ក៏ភ្លាត់ស្នៀតចូលដៃទៅក្នុងម៉ាសុីនវាយឡេវអាវ បណ្ដាលឲ្យមានរបួសចេញឈាម ។ បន្ទាប់ពីឃើញបែបនេះ បានធ្វើឲ្យកម្មការិនីផ្សេងទៀតប្រមាណ៦៨នាក់ ដែលធ្វើការជិតគ្នាមានការតក់ស្លុត…
ខេត្តកណ្ដាល ៖ កម្មការិនីផ្នែកម៉ាសុីនវាយឡេវអាវម្នាក់ ខណៈកំពុងជូតម៉ាសុីន ក៏ភ្លាត់ស្នៀតចូលដៃទៅ
ក្នុងម៉ាសុីនវាយឡេវអាវ បណ្ដាលឲ្យមានរបួសចេញឈាម ។ បន្ទាប់ពីឃើញបែបនេះ បានធ្វើឲ្យកម្មការិនីផ្សេងទៀតប្រមាណ៦៨នាក់ ដែលធ្វើការជិតគ្នាមានការតក់ស្លុត ។ ពេលនោះ មួយចំនួនបានដួលសន្លប់ជាបន្តបន្ទាប់ និងមួយចំនួនទៀត ក៏ស្រាប់តែមានអាការៈទន់ដៃទន់ជើង ក្រៅពីនេះ បានសម្រុករត់ចេញពីក្នុងរោងចក្រទាំងស្ថានភាពភ័យស្លន់ស្លោរ ។ ហេតុការណ៍នោះបានកើតឡើង កាលពីវេលាម៉ោង៧និង១០នាទីព្រឹកថ្ងៃទី៣០ មករា ឆ្នាំ២០១៩ នៅក្នុងរោងចក្រកាត់ដេរសម្លៀកបំពាក់យីហោ «QMI» ដែលមានទីតាំងស្ថិតនៅក្នុងភូមិត្រយឹង ឃុំពើកស្រុកអង្គស្នួល ខេត្តកណ្ដាល ។
តាមប្រភពព័ត៌មានបានឲ្យដឹងថា នៅក្នុងរោងចក្រនោះ មានកម្មករសរុបចំនួន៤,២០០នាក់ ក្នុងនោះ ស្រីចំនួន៤,០៣០នាក់ ហើយនៅមុនពេលកើតហេតុ មានកម្មការិនីផ្នែកម៉ាសុីនវាយឡេវម្នាក់ ឈ្មោះ ទឿន ស្វិត បានចូលទៅជូតម៉ាសុីនវាយឡេវអាវ ដែលនាងកាន់ប្រើរាល់ថ្ងៃ ។ ខណៈនោះ ភ្លាត់ស្នៀតបានមុតចង្អុលដៃខាងឆ្វេង បណ្ដាលឲ្យរងរបួសចេញឈាមស្រែកចាចឡើងផ្អើលគេឯង ។ ចំណែកកម្មការិនីផ្សេងទៀតដែលស្ថិតនៅជិតគ្នាឃើញបែបនេះ មានការភិតភ័យតក់ស្លុតខ្លាំង រហូតដួលសន្លប់ជាបន្តបន្ទាប់តៗគ្នា និងមួយចំនួនទៀតមានអាការៈទន់ដៃទន់ជើង សរុប៦៨នាក់ទៀត ។
បន្ទាប់មក កម្មការិនីទាំងនោះត្រូវបានតំណាងរោងចក្រ ដឹកតាមរថយន្តទៅសង្គ្រោះនៅតាមគ្លីនិកឯកជន និងមន្ទីរពេទ្យបង្អែកស្រុកអង្គស្នួលផងដែរ ។ ប្រភពដដែលបានបន្តទៀតថា ដោយឡែក កម្មករកម្មការិនីដែលមិនសន្លប់បាននាំគ្នាសម្រុករត់ចេញមកក្រៅយ៉ាងប្រសេចប្រសាច ក្នុងស្ថានភាពភ័យស្លន់ស្លោរ ។ ប៉ុន្តែក្រោយពេលអ្នកសន្លប់ និងមានអាការៈទន់ដៃទន់ជើងត្រូវបញ្ជូនទៅកាន់មន្ទីរពេទ្យអស់ កម្មករកម្មការិនីទាំងនោះក៏បាននាំគ្នាចូលទៅធ្វើការងារបន្តទៀតជាធម្មតា ៕
ចែករំលែកព័តមាននេះ