អ្នកជំនាញនៅក្នុងវិស័យកាត់ដេរបាននិយាយថា វិបត្តិធ្ងន់ធ្ងរណាមួយអាចកើតឡើងលើវិស័យកាត់ដេរនៅក្នុងប្រទេសកម្ពុជានឹងធ្វើអោយមានផលប៉ះពាល់ជាអវិជ្ជមានទៅលើវិស័យធនាគារកម្ពុជា ។
អ្នកជំនាញដែលសុំមិនបញ្ចេញឈ្មោះបាននិយាយថា កម្មករកម្ពុជាច្រើនណាស់បានជំពាក់លុយធនាគារពិសេស គឺមីក្រូហិរញ្ញវត្ថុ ។ ដូច្នេះ បើសិនជាពួកគេបាត់បង់ការងារធ្វើ ពួកគេនឹងមិនអាចមានលុយសង ធនាគារទេ ។ ដោយសារតែបញ្ហានេះ វិបត្តិណាមួយចំពោះវិស័យកាត់ដេរនឹងធ្វើអោយមានការប៉ះពាល់ដល់ចរាចរណ៍លុយនៅធនាគារផងដែរ។
ចំណែករបាយការណ៍មួយរបស់អង្គការពលកម្មអន្តរជាតិILO បានអោយដឹងថាគ្រួសារ កម្មកររហូតដល់ប្រមាណ៤០ភាគរយ មានបំណុលធនាគារ ឬហិរញ្ញវត្ថុជាប់ខ្លួន ។
អ្នកជំនាញរូបនោះក៏ព្រមានផងដែរថា បញ្ហាទាំងអស់នេះនឹងអាចបណ្តាលអោយមានបញ្ហាសង្គមផងដែរ។ដូច្នេះ វាចាំបាច់ណាស់ដែលសហភាពអឺរ៉ុប រដ្ឋាភិបាលកម្ពុជា និងអ្នកនយោបាយកម្ពុជាត្រូវ ធ្វើយ៉ាងណាចៀសវាងដល់វិបត្តិវិស័យកាត់ដេរនៅកម្ពុជាដែលនឹងអាចធ្វើអោយប៉ះពាល់ដល់មនុស្សប្រមាណជាបួនលាននាក់ ។
ការព្រួយបារម្ភអំពីផលប៉ះពាល់ដល់វិស័យកាត់ដេរកម្ពុជាកើតមាន បន្ទាប់ពីសហភាពអឺរ៉ុបបានប្រកាស បើកដំណើរការឆ្ពោះទៅរកការលុបបំបាត់ការលើកលែងពន្ធនាំចូលទំនិញពីប្រទេសកម្ពុជា ពិសេសគឺសម្លៀកបំពាក់និងស្បែកជើង ដោយសារតែអ្វីដែលគេថា ជាដំណើរថយក្រោយនៃលទ្ធិប្រជាធិបតេយ្យនៅកម្ពុជា ។
ចែករំលែកព័តមាននេះ