រាជធានីភ្នំពេញ ៖ រដ្ឋមន្ត្រីក្រសួងសាធារណការ និងដឹកជញ្ជូន បានអះអាងថា ការអភិវឌ្ឍកំណាត់ផ្លូវជាតិលេខ៥ នឹងក្លាយជាផ្លូវប៉ូលសេដ្ឋកិច្ចដ៏សំខាន់របស់កម្ពុជា តាមរយៈការតភ្ជាប់ជាមួយប្រទេសចំនួន៤ផ្សេងទៀតក្នុងតំបន់អាស៊ាន និងប្រទេសចិន ។…
រាជធានីភ្នំពេញ ៖ រដ្ឋមន្ត្រីក្រសួងសាធារណការ និងដឹកជញ្ជូន បានអះអាងថា ការអភិវឌ្ឍកំណាត់ផ្លូវជាតិលេខ៥ នឹងក្លាយជាផ្លូវប៉ូលសេដ្ឋកិច្ចដ៏សំខាន់របស់កម្ពុជា តាមរយៈការតភ្ជាប់ជាមួយប្រទេសចំនួន៤ផ្សេងទៀតក្នុងតំបន់អាស៊ាន និងប្រទេសចិន ។
លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់បែបនេះនៅក្នុងពិធីចុះហត្ថលេខាលើកិច្ចព្រមព្រៀងគម្រោងធ្វើឱ្យប្រសើរឡើងវិញនូវកំណាត់ផ្លូវជាតិលេខ៥ ភាគកណ្តាល (ធ្លាម្អម-បាត់ដំបង) កាលពីថ្ងៃទី ២៨ ខែកមរា ឆ្នាំ ២០១៩ កន្លងមក ។ លោកថ្លែងថា ៖« កំណាត់ផ្លូវជាតិលេខ៥ គឺមានសក្តានុពលខ្លាំងសម្រាប់វិស័យដឹកជញ្ជូនឆ្លងដែន ដែលតភ្ជាប់ពីប្រទេសចិន ឆ្លងកាត់ប្រទេសមីយ៉ាន់ម៉ា ថៃ កម្ពុជា និងឆ្លងកាត់ផ្លូវជាតិលេខ១ឆ្ពោះទៅកាន់ប្រទេសវៀតណាម និងប្រទេសចិន »។
លោកទេសរដ្ឋមន្ត្រីបន្ថែមថា ការស្ថាបនាកំណាត់ផ្លូវជាតិលេខ៥ គឺជាគម្រោងក្រោមកម្ចីឥណទានសម្បទានពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការ អន្តរជាតិជប៉ុនប្រចាំកម្ពុជា ដែលហៅកាត់ថាJICA ។ លោកថា ៖« កំណាត់ផ្លូវជាតិលេខ៥ ជាផ្លូវអាស៊ានហាយវេ ដែលជាផ្លូវមួយប្រកបដោយសក្តានុពលសម្រាប់ការដឹកជញ្ចូនទំនិញ អាចកាត់បន្ថយគ្រោះថ្នាក់ និងការកកស្ទះចរាចរណ៍ ថែមទាំងបានធ្វើឲ្យប្រជាពលរដ្ឋធ្វើដំណើរតាមដងផ្លូវនេះមានភាពងាយស្រួល និងជួយឲ្យមានកំណើនវិស័យសេដ្ឋកិច្ចនៅកម្ពុជាមានការរីកចម្រើន និងអាចទាក់ទាញអ្នកវិនិយោគបរទេសមកអភិវឌ្ឍន៍បន្ថែមទៀត »។
លោកបានលើកឡើងថា ក្នុងអំឡុងពេលស្ថាបនាផ្លូវនេះ ក្រសួងនឹងដាក់ផ្លាកសញ្ញាសុវត្ថិភាពនៅតាមការដ្ឋាន ដើម្បីបង្កលក្ខណៈងាយស្រួលដល់អ្នកធ្វើដំណើរនិងកាត់បន្ថយគ្រោះថ្នាក់ចរាចរណ៍ផង ។ គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគកណ្តាលសរុបប្រវែងជាង១៤៦គីឡូម៉ែត្រ ដោយចាប់ពី ធ្លាម្អម-បាត់ដំបង មានប្រវែងជាង១១០គីឡូម៉ែត្រ និងរួមបញ្ជូលផ្នែកចុងក្រោយសិរីសោភ័ណ-ប៉ោយប៉ែត មានប្រវែងជាង៣៥ គីឡូម៉ែត្រ ។
ក្រុមហ៊ុនដែលទទួលបានសិទ្ធិម៉ៅការសាងសង់គម្រោងនេះសម្រាប់កញ្ចប់ទី១ កញ្ចប់ទី២ និងកញ្ចប់ទី៣ រួមមាន៖ ទី១ ក្រុមហ៊ុន ILSUNG-CIENCO1 Joint Venture , ទី២ ក្រុមហ៊ុន OBAYASHI Corporation និងទី៣ ក្រុមហ៊ុន TEKKEN-IKEE Joint Venture ។ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ លោកបណ្ឌិតម៉ី កល្យាណ បានថ្លែងថា ការកសាងហេដ្ឋរចនាសម្ព័ន្ធគឺជារឿងចាំបាច់មួយ ដើម្បីពន្លឿនកំណើនសេដ្ឋកិច្ចកម្ពុជា ព្រោះហេដ្ឋារចនាសម្ព័ន្ធគឺជាបញ្ហាប្រឈមធំមួយ នៅក្នុងការអភិវឌ្ឍសេដ្ឋកិច្ចកម្ពុជា ជាពិសេសបញ្ហានៃការដឹកជញ្ជូនរបស់យើងមានតម្លៃថ្លៃជាងគេ បើធៀបជាមួយបណ្តាប្រទេសក្នុងតំបន់អាស៊ាន ។ លោកបន្តថា ៖« រដ្ឋាភិបាលបាននិងកំពុងយកចិត្តទុកដាក់លើបញ្ហានេះហើយ តែការកសាងហេដ្ឋារចនាសម្ព័ន្ធត្រូវការពេលវេលាវែង មិនមែនធ្វើបានក្នុងរយៈពេល១ខែឬ១ឆ្នាំនោះទេ »៕
ចែករំលែកព័តមាននេះ