រាជធានីភ្នំពេញ ៖ ជាផ្នែកមួយនៃការចូលរួមសម្រាប់ការលើកស្ទួយដល់វិស័យសិល្បៈនិងវប្បធម៌របស់ប្រទេសកម្ពុជា រដ្ឋាភិបាលអូស្ត្រាលី តាមរយៈស្ថានទូតអូស្ត្រាលីប្រចាំទីក្រុងភ្នំពេញ បានចូលរួមគាំទ្រដល់អង្គការសិល្បៈក្នុងស្រុកមួយចំនួននៅក្នុងប្រទេសកម្ពុជាដើម្បីកសាងសមត្ថភាពសិល្បករវ័យក្មេងកម្ពុជា សម្រាប់ប្រកួតលើឆាកអន្តរជាតិ ជាពិសេសគឺការបណ្តុះបណ្តាលដល់យុវវ័យនៃក្រុមជនជាតិភាគតិចដើម្បីសិក្សាជំនាញផលិតភាពយន្ត ។
ជាក់ស្តែងក្នុងឆ្នាំ២០១៨កន្លងទៅនេះ រដ្ឋាភិបាលអូស្ត្រាលី បានផ្តល់មូលនិធិដល់កម្មវិធីសាកល្បងមួយដែលគ្រប់គ្រងដោយគម្រោងសិល្បៈស-ស ឬហៅថា (Sa Sa Art Projects)លើគម្រោងមួយដែលមានឈ្មោះថា «ភាសាអង់គ្លេសសម្រាប់សិល្បករ»ឬហៅថា “English for Artists ” ។
គម្រោងសាកល្បងដែលមានឈ្មោះថា «ភាសាអង់គ្លេសសម្រាប់សិល្បករ» ឬហៅថា “English for Artists” គឺជាគម្រោងមួយដែលមានរយៈពេល៣ខែ និងត្រូវបានរចនាឡើងដើម្បីកសាងសមត្ថភាពភាសាអង់គ្លេស សម្រាប់អ្នកសិល្បៈខ្មែរវ័យក្មេង និងអ្នកធ្វើការផ្នែកវប្បធម៌ ដោយការអភិវឌ្ឍនូវវាក្យស័ព្ទបច្ចេកទេស បរិបទវប្បធម៌ និងទំនុកចិត្តរបស់ពួកគេដើម្បីលូតលាស់នៅលើឆាកអន្តរជាតិ។ គម្រោងសាកល្បងមួយនេះ គឺរៀបចំឡើងដោយមានគោលបំណងសំខាន់ៗដូចជា ការបណ្តុះបណ្តាលសិល្បករខ្មែរជំនាន់ក្រោយ និងអ្នកដឹកនាំវប្បធម៌ ដោយផ្តល់ឱ្យពួកគេនូវជំនាញភាសាដើម្បីកំណត់អនាគតរបស់ពួកគេឱ្យមានប្រសិទ្ធភាព និងដើម្បីតំណាងឱ្យខ្លួនឯងនៅលើឆាកអន្តរជាតិ។
បន្ថែមពីលើនេះ គម្រោងនេះក៏បង្កើតឡើងដើម្បីបំពាក់ជំនាញត្រឹមត្រូវទៅដល់អ្នកគ្រប់គ្រងផ្នែកសិល្បៈ និងត្រៀមខ្លួនដើម្បីជំរុញការងាររបស់អង្គការរៀងៗខ្លួន ដោយរួមចំណែកដល់សហគមន៍សិល្បៈ ការសហការ និងការកសាងបណ្តាញសហគមន៍ឲ្យកាន់តែរស់រវើកជាងមុន ។
លោក វុធ លីណូ នាយកនៃគម្រោងសិល្បៈ ស-ស ឬហៅថា (Sa Sa Art Projects) មានប្រសាសន៍ថា គម្រោងសាកល្បងដែលមានឈ្មោះថា «ភាសាអង់គ្លេសសម្រាប់សិល្បករ» ជាគម្រោងសំខាន់លើកទី១របស់ស្ថាប័នលោក ដោយផ្តួចផ្តើមគំនិតរួមគ្នា ជាមួយសិល្បករ ឱក ព្រហ្មសុដន្តរៈ ដើម្បីពង្រឹងសមត្ថភាពសិល្បករខ្មែរ សម្រាប់ឱកាសនៃការប្រឡូកលើឆាកអន្តរជាតិ។ គម្រោងនេះ ទទួលបានការឧបត្ថម្ភមូលនិធិដោយស្ថានទូតអូស្ត្រាលីប្រចាំប្រទេសកម្ពុជា ដោយបណ្តុះបណ្តាលសមត្ថភាពរយៈពេល៣ខែ ដល់សិល្បករវ័យក្មេងចំនួន១០រូប ផ្នែកសិល្បៈ Visual arts ដូចជាផ្នែកថតរូប និងសិល្បៈគំនូរជាដើម។
លោក វុធ លីណូ មានប្រសាសន៍បញ្ជាក់ថា « គម្រោងនេះពិតជាមានសារសំខាន់ខ្លាំងណាស់ ព្រោះជាតម្រូវការសំខាន់បំពេញនូវចន្លោះខ្វះខាតរបស់សិល្បករខ្មែរ ដោយសារសិល្បករខ្មែរត្រូវការចំណេះដឹងខាងផ្នែកភាសាអង់គ្លេស ដើម្បីប្រឡូកឆាកអន្តរជាតិ ក៏ដូចជាឱកាសចូលរួមនិងផ្លាស់ប្តូរបទពិសោធន៍នានា មិនត្រឹមតែក្នុងប្រទេសនោះទេ តែការប្រឡូកនៅក្រៅប្រទេស »។
លោកបានបន្ថែមថា ការពង្រឹងភាសាអង់គ្លេសដល់សិល្បករអាជីព គឺជួយឲ្យសិល្បករចេះសរសេរនិងពន្យល់ជាភាសាអង់គ្លេស ក្នុងបរិបទសិល្បៈអំពីស្នាដៃសិល្បៈរបស់គាត់ ដោយមិនចាំបាច់ឆ្លងអ្នកសម្របសម្រួល ឬក៏ពួកគាត់មានលទ្ធភាពទំនាក់ទំនងដោយផ្ទាល់ក្នុងអាជីពរបស់គាត់ ។
លោកនាយកនៃគម្រោងសិល្បៈស-ស បន្តថា «វាមានសារសំខាន់សម្រាប់សិល្បករវ័យក្មេងនិងសិល្បករសហសម័យ ពង្រឹងសមត្ថភាពសមត្ថភាពលើអាជីពរបស់គាត់ និងជួយឲ្យមានឯករាជ្យភាពរបស់សិល្បករ សម្រាប់ទំនាក់ទំនង និងផ្សារភ្ជាប់រួបគាត់លើឆាកអន្តរជាតិ ដោយការប្រើប្រាស់ភាសាអង់គ្លេសជាយាន »។
ជាមួយគ្នានោះផងដែរ កាលពីខែកក្កដា ឆ្នាំ២០១៨កន្លងទៅ ស្ថានទូតអូស្ត្រាលី ក៏បានអញ្ជើញសិល្បករជនជាតិដើមអូស្ត្រាលីដ៏ល្បីល្បាញមួយរូប គឺអ្នកនាង Tracey Moffatt មកប្រទេសកម្ពុជាសម្រាប់កម្មវិធី NAIDOC Week ដែលជាកម្មវិធីប្រារព្ធឡើងអបអរសាទរប្រវត្តិសាស្ត្រ វប្បធម៌ និងសមិទ្ធផលនៃជនជាតិដើមអូស្ត្រាលី Aboriginal និងTorres Strait។ ខណៈពេលដែលអ្នកនាង Tracey ស្ថិតនៅប្រទេសកម្ពុជា ដោយមានការសហការជាមួយនឹងSa Sa Art Projects ស្ថានទូតអូស្ត្រាលី បានរៀបចំឱ្យអ្នកនាង Tracey បានជួបជុំ និងចែករំលែកនូវបទពិសោធន៍ជាមួយសិល្បករខ្មែរ ។
បន្ថែមពីលើគម្រោងជួយដល់សិល្បករវ័យក្មេងពង្រឹងសមត្ថភាពលើភាសាបរទេសនោះ រដ្ឋាភិបាលអូស្ត្រាលី ក៏បានចូលរួមចំណែកផ្តល់មូលនិធិដល់គម្រោងមួយ ដែលគ្រប់គ្រងដោយមជ្ឈមណ្ឌលធនធានសោតទស្សន៍បុប្ផាណា សម្រាប់ការបង្ហាត់បង្រៀនយុវជនខ្មែរ ក្នុងការផលិតខ្សែភាពយន្ត។ ជាលទ្ធផល យុវវ័យកម្ពុជាទាំងនេះនឹងប្រើប្រាស់ជំនាញផលិតខ្សែភាពយន្តដើម្បីជួយលើកកម្ពស់បញ្ហាដែលប្រឈម និងបញ្ហាស្ត្រី និងកុមារជនជាតិដើមភាគតិចនៅក្នុងប្រទេសកម្ពុជា ។
លោក ជា សុភាព នាយកប្រតិបត្តិរបស់ មជ្ឈមណ្ឌលធនធានសោតទស្សន៍បុប្ផាណា (Bophana Audiovisual Resource Center) មានប្រសាសន៍ឲ្យដឹងថា នាពេលកន្លងមក ស្ថានទូតអូស្ត្រាលីបានជួយដល់វិស័យសិល្បៈ និងវប្បធម៌ខ្មែរជាច្រើន ទាំងការជួយដោយផ្ទាល់ និងមិនផ្ទាល់ ។
សម្រាប់មជ្ឈមណ្ឌលធនធានសោតទស្សន៍បុប្ផាណា លោក ជា សុភាព បានបញ្ជាក់ថា ស្ថានទូតអូស្ត្រាលីបានចូលរួមចំណែកដល់កម្មវិធីមួយឈ្មោះថា «បំពងសំឡេងស្ត្រី និងក្រុមដែលត្រូវបានគេរើសអើង តាមរយៈប្រព័ន្ធផ្សព្វផ្សាយពហុ (Multi Media)»។ កម្មវិធីនេះគឺជាផ្នែកមួយនៃកម្មវិធី “Voices” របស់អង្គការ Oxfam និងមានការរួមចំណែករបស់មូលនិធិរបស់អូស្ត្រាលី ដល់មជ្ឈមណ្ឌលបូផាណា បានជ្រើសរើសយុវវ័យចំនួន១២រូប (យុវនារី២រូប)ពីសហគមន៍ជនជាតិដើមភាគតិចចំនួន៣ គឺខេត្តរតនគិរី ខេត្តមណ្ឌលគិរី និងខេត្តបន្ទាយមានជ័យ ។
លោក ជា សុភាព មានប្រសាសន៍បន្ថែមថា «គោលបំណងសំខាន់នៃគម្រោងនេះគឺដើម្បីដោះស្រាយបញ្ហាមួយចំនួនដែលកើតឡើង ចំពោះស្ត្រីនៅសហគមន៍ជនជាតិដើមភាគតិច តាមរយៈការបណ្តុះបណ្តាលយុវជនចេញពីសហគមន៍ឲ្យចេះផលិតភាពយន្តឯកសារ និងការនាំយកបញ្ហាទាំងអស់នោះមកបង្ហាញជូនសាធារណជន និងអ្នកបង្កើតគោលនយោបាយ (Policy-makers)។ លោកបន្តថា គម្រោងរបស់លោករយៈពេល២ឆ្នាំ ដោយផ្តល់ការបណ្តុះបណ្តាលដល់យុវវ័យទាំង១២រូប សម្រាប់ការបណ្តុះបណ្តាលមានលក្ខណៈតឹងរ៉ឹង និង incentive training ហើយក៏មានការបង្រៀនលក្ខណៈបច្ចេកទេស ផ្នែកដឹកនាំរឿងផង ផ្នែកសង្គមផង និងផ្នែកសារព័ត៌មានផងដែរ ។
លោក ជា សុភាព បញ្ជាក់ថា គម្រោងបណ្តុះបណ្តាលនេះ គឺទើបនឹងចាប់ផ្តើមកាលពីដើមខែមករា ឆ្នាំ២០១៩ ហើយគម្រោងនេះគឺមានការចូលរួមមូលនិធិខ្លះរបស់រដ្ឋាភិបាលអូស្ត្រាលី និងមូលនិធិធំពីអង្គការ Oxfam និងកំពុងបន្តរកមូលនិធិបន្ថែមទៀត ។
លោក ជា សុភាព មានប្រសាសន៍បញ្ជាក់ថា «ទី១ គឺថា Multi-Media គឺជាមធ្យោបាយមួយស្រួលចែករំលែកមែនទែន។ ទី២ ការបង្រៀនពួកគាត់ឲ្យក្លាយទៅជាអ្នកមានជំនាញពិតប្រាកដ មានអាជីព មានសីលធម៌ គឺជារឿងដ៏សំខាន់បំផុត […] មិនត្រឹមតែចេះផ្នែកបច្ចេកទេសនោះទេ តែមានសីលធម៌ខ្ពស់។
សម្រាប់ការផលិតនូវភាពយន្តឯកសារ គឺយើងចង់ឲ្យគាត់ មានការស៊ើបអង្កេតស្រាវជ្រាវត្រឹមត្រូវ »។ ឯកអគ្គរាជទូតអូស្ត្រាលីប្រចាំកម្ពុជា លោកជំទាវ Angela Corcoran មានប្រសាសន៍ថា ស្ថានទូតអូស្ត្រាលី ពិតជាមានមោទនភាពក្នុងការរួមចំណែកដល់សហគមន៍សិល្បៈខ្មែរ ។
លោកជំទាវ Angela Corcoran មានប្រសាសន៍បញ្ជាក់យ៉ាងដូច្នេះថា «ខ្ញុំមានមោទនភាពចំពោះការគាំទ្ររបស់ស្ថានទូតអូស្ត្រាលីចំពោះសហគមន៍សិល្បៈខ្មែរ។ វាមានសារសំខាន់ខ្លាំងណាស់សម្រាប់សហគមន៍របស់យើងក្នុងការឱបក្រសោបយកសិល្បៈ និងវប្បធម៌។ ក្រោមការគាំទ្រពីអូស្ត្រាលី ខ្ញុំចង់មើលឃើញសិល្បករខ្មែរវ័យក្មេងចូលរួមក្នុងការបំផុសគំនិត ដើម្បីបន្តនូវភាពច្នៃប្រឌិត និងការបង្កើតថ្មីរបស់ពួកគេឱ្យបានល្អនាពេលអនាគត »៕
ចែករំលែកព័តមាននេះ