រាជធានីភ្នំពេញ ៖ រដ្ឋបាលរាជធានីភ្នំពេញ និងទីក្រុងឡុងប៊ិចបានសម្រចចងសម្ព័ន្ធមេត្រីភាពជាមួយគ្នា ហើយខណៈទំហំពាណិជ្ជកម្មកម្ពុជា និងសហរដ្ឋអាមេរិកបានកើនឡើងពីជាង៣០០០លានដុល្លារអាមេរិក នៅឆ្នាំ២០១៦ និងកើនជិត៤ពាន់លានដុល្លារនៅឆ្នាំ២០១៨ ។
នេះបើតាមការបញ្ជាក់អោយដឹងពីលោក ឃួង ស្រេង អភិបាលរាជធានីភ្នំពេញ កាលពីព្រឹកថ្ងៃទី២៨ មករា ២០១៩ ក្នុងឱកាសដែលលោកអនុញ្ញាតអោយលោកបណ្ឌិត រ៉ូប៊ើត ហ្គាសៀ អភិបាលក្រុងឡុងប៊ិចនៃរដ្ឋកាលីហ្វរញ៉ាសហរដ្ឋអាមេរិកចូលជួបសម្តែងការគួរសមពិភាក្សាការងារ និងចុះហត្ថលេខាចងសម្ព័ន្ធមេត្រីភាពនឹងគ្នាស្របពេលដែលប្រតិភូនេះបាននឹងកំពុងបំពេញទស្សនៈកិច្ចផ្លូវការ នៅព្រះរាជាណាចក្រកម្ពុជាចាប់ពីថ្ងៃទី២៦ រហូតដល់ថ្ងៃទី៣០ ខែមករា ឆ្នាំ២០១៩នេះ ។
លោកឃួង ស្រេង បានអោយដឹងទៀតថា ព្រះរាជាណាចក្រកម្ពុជា និងសហរដ្ឋអាមេរិកបានបង្កើតទំនាក់ទំនងការទូតទ្វេភាគីជាមួយគ្នា ចាប់តាំងពីឆ្នាំ១៩៥០មកម្ល៉េះរហូតមកដល់ពេលនេះទំហំពាណិជ្ជកម្មទ្វេភាគីរវាងប្រទេសទាំងពីរមានអត្រាកំណើនគួរអោយកត់សម្គាល់ ក្នុងនោះទំហំពាណិជ្ជកម្មរវាងកម្ពុជា និងសហរដ្ឋអាមេរិកបានកើនឡើងពី៣,១៧៣លានដុល្លារអាមេរិក ក្នុងឆ្នាំ២០១៦ រហូតជិត៤ពាន់លានដុល្លារនៅក្នុងឆ្នាំ២០១៨ និងមានការកើនឡើងជាបន្តបន្ទាប់ទៀត ។
លោកឃួង ស្រេង បានទទួលស្វាគមន៍យ៉ាងកក់ក្តៅចំពោះដំណើរទស្សនៈកិច្ចរបស់គណៈប្រតិភូទីក្រុងឡុងប៊ិចដែលដឹកនាំដោយលោក បណ្ឌិត រ៉ូប៊ើតហ្គាសៀ អភិបាលក្រុងឡុងប៊ិច ដែលបានអញ្ចើញមកទស្សនៈកិច្ចជាផ្លូវការនៅព្រះរាជាណាចក្រកម្ពុជាក្នុងន័យរឹតចំណងមិត្តភាព សាមគ្គីភាព កិច្ចសហប្រតិបត្តិការ និងការចុះអនុស្សារណៈស្តីពីការចងសម្ព័ន្ធមេត្រីភាពរវាងរដ្ឋបាលនៃប្រទេសទាំងពីរភ្នំពេញ-ឡុងប៊ិច អោយកាន់តែរឹងមាំ និងកាន់តែស៊ីជម្រៅ ។
មន្ត្រីរដ្ឋបាលរាជធានីភ្នំពេញបានបញ្ជាក់ថា ក្នុងជំនួបនោះគណៈប្រិតភូទីក្រុងឡុងប៊ិច និងរដ្ឋបាលរាជធានីភ្នំពេញបានធ្វើពិធីចុះអនុស្សារណៈនៃការយោគយល់គ្នាស្តីពីការចងសម្ព័ន្ធមេត្រីភាពរវាងទីក្រុងឡុងប៊ិចរដ្ឋកាលីហ្វរញ៉ានៃសហរដ្ឋអាមេរិក និងរាជធានីភ្នំពេញនៃព្រះរាជា ណាចក្រកម្ពុជា ហើយការចង់សម្ព័ន្ធមេត្រីភាពនេះ គឺក្នុងគោលបំណងបង្កើនទំនាក់ទំនងវប្បធម៌ និងការអបរំក៏ដូចជា វិស័យសេដ្ឋកិច្ច និងចំណងមិត្តភាពរវាងប្រជាជននៃទីក្រុងទាំងពីរ តាមរយៈលក្ខខណ្ឌ និងខ្លឹមសារមួយចំនួនដែលមានដូចជា ទី១ ទីក្រុងទាំងពីរបានត្រៀមខ្លួនរួចជាស្រេច ដើម្បីអនុវត្តការផ្លាស់ប្តូរសហប្រតិបត្តិការ ដោយផ្អែកលើមូលដ្ឋានសមភាព និងផលប្រយោជន៍ទាំងសងខាង ។
ទី២ រាជធានីភ្នំពេញ និងទីក្រុងឡុងប៊ិច និងសម្របសម្រួលអោយមានការផ្លាស់ប្តូរកិច្ចសហប្រតិបត្តិការលើវិស័យផ្សេងៗរួមមានសេដ្ឋកិច្ច ពាណិជ្ជកម្ម អប់រំ វប្បធម៌ កសិកម្ម ទេសចរណ៍ សុខាភិបាល និងធនធានមនុស្ស វិទ្យាសាស្ត្រ និងបច្ចេកវិទ្យា ជំរុញអោយមានការអភិវឌ្ឍជារួម ដើម្បីចែករំលែកភាពរីកចម្រើនរវាងគ្នា និងគ្នា ។ ទី៣ រាជធានីភ្នំពេញ និងទីក្រុងឡុងប៊ិច និងឯកភាពសម្របសម្រួលអោយមានការផ្លាស់ប្តូរដំណើរទស្សនៈកិច្ចរបស់តំណាងទីក្រុងរបស់ខ្លួនទៅវិញទៅមក ។
ទី៤ រក្សាទំនាក់ទំនងជាប្រចាំ ដើម្បីរក្សាបាននូវសម្ព័ន្ធមេត្រីភាពរបស់ថ្នាក់ដឹកនាំ និងអង្គភាពពាក់ព័ន្ធរបស់ទីក្រុងទាំងពីរ ដើម្បីជំរុញអោយមានកិច្ចពិភាក្សាជាបន្តបន្ទាប់លើបញ្ហាពាក់ព័ន្ធកិច្ចសហប្រតិបត្តិការការផ្លាស់ប្តូរទ្វេភាគី រួមទាំងបញ្ហាផ្សេងៗទៀត ដែលភាគីទាំងពីរមានចំណាប់អារម្មណ៍ ។ ទី៥ អនុស្សរណៈនៃការយោគយល់គ្នានេះ គឺដើម្បីពង្រឹងនូវការផ្លាស់ប្តូរកិច្ចសហប្រតិបត្តិការទ្វេភាគី ដោយមិនមានកាតព្វកិច្ចច្បាប់ណាមួយឡើយ ។
រាជធានីភ្នំពេញមានក្តីសង្ឃឹម និងជឿជាក់យ៉ាងមុតមាំថា បន្ទាប់ពីទីក្រុងទាំងពីរបានក្លាយជាសម្ព័ន្ធមេត្រីភាពការចុះអនុស្សារណៈនៃការយោគយល់គ្នាស្តីពីការចងសម្ព័ន្ធមេត្រីភាពនេះហើយទីក្រុងទាំងពីរ និងមានការផ្លាស់ប្តូរដំណើរទស្សនៈកិច្ចជាបន្តបន្ទាប់ ដើម្បីឈានទៅពង្រឹង និងពង្រីកទំនាក់ទំនងទ្វេភាគី និងបាននាំមកនូវកាលានុវត្តភាពថ្មីមួយសម្រាប់ជាប្រយោជន៍លើប្រទេសជាតិ និងប្រជាជននៃទីក្រុងទាំងពីរក្នុងស្មារតីផ្តល់ការគាំទ្រ និងការជួយគ្នាទៅវិញទៅមកលើគ្រប់វិស័យនាពេលខាងមុខ ៕
ចែករំលែកព័តមាននេះ