ខេត្តក្រចេះ ៖ ទណ្ឌិត៨នាក់ ក្នុងនោះ៧នាក់ត្រូវបានលើកលែងទោស និងម្នាក់ត្រូវបានបន្ធូរបន្ថយទោសរយៈពេល៩ខែ ក្នុងឱកាសអបអរសាទរខួបលើកទី២០នៃទិវានយោបាយឈ្នះឈ្នះ២៩ ធ្នូ ឆ្នាំ២០១៩ នៅក្នុងពន្ធនាគារខេត្ត កាលពីព្រឹកថ្ងៃទី២២…
ខេត្តក្រចេះ ៖ ទណ្ឌិត៨នាក់ ក្នុងនោះ៧នាក់ត្រូវបានលើកលែងទោស និងម្នាក់ត្រូវបានបន្ធូរបន្ថយទោសរយៈពេល៩ខែ ក្នុងឱកាសអបអរសាទរខួបលើកទី២០នៃទិវានយោបាយឈ្នះឈ្នះ២៩ ធ្នូ ឆ្នាំ២០១៩ នៅ
ក្នុងពន្ធនាគារខេត្ត កាលពីព្រឹកថ្ងៃទី២២ មករា ។
ប្រធានពន្ធនាគារខេត្តក្រចេះ លោក ក្វា សារ៉ន បានឱ្យកោះសន្តិភាពដឹងថា ទណ្ឌិតដែលត្រូវបានព្រះមហាក្សត្រចេញព្រះរាជក្រិត្យលើកលែងទោសនិងបន្ធូរបន្ថយទោសនេះ កន្លងមកគឺការអនុវត្តទោសរបស់ពួកគេនៅក្នុងពន្ធនាគារខេត្ត គឺសុទ្ធតែមានកិរិយាមាយាទល្អ ។
លោកបានបញ្ជាក់ទៀតថា សព្វថ្ងៃពន្ធនាគារខេត្តក្រចេះមានទណ្ឌិតនិងពិរុទ្ធជនចំនួន៥៧៧នាក់ ក្នុងនោះស្រី៨១នាក់ ។ ជាមួយគ្នានេះ នៅក្នុងពន្ធនាគារសព្វថ្ងៃក៏មានការបណ្តុះបណ្តាលវិជ្ជាជីវៈដល់អ្នកជាប់ទោស៤មុខជំនាញ ។ ក្នុងនោះ ទី១-ការរៀនអក្ខរកម្ម ២-កាត់ដេរ ៣-រៀនកុំព្យូទ័រ និងទី៤-ផ្សារដែក។
ព្រះរាជអាជ្ញាអមសាលាដំបូងខេត្ត លោក កែវ សុជាតិ ដែលអញ្ជើញក្នុងពិធីលើកលែងទោសដល់ទណ្ឌិតនៅក្នុងពន្ធនាគារខេត្ត បានមានប្រសាសន៍ផ្តាំផ្ញើដល់ទណ្ឌិតដែលកំពុងអនុវត្តទោសនៅក្នុងពន្ធនាគារថា ត្រូវខិតខំបន្តអប់រំកែប្រែខ្លួន និងផ្លាស់ប្តូរឥរិយាបទដែលធ្លាប់តែប្រព្រឹត្តសកម្មភាពខុសច្បាប់នៅក្នុង
សង្គម ។
លោកក៏បានផ្តាំផ្ញើបន្ថែមដល់ទណ្ឌិត ដែលបានលើកលែងទោសឱ្យមានសេរីភាពនេះដែរថា ត្រូវខិតខំកែខ្លួនបន្ថែមមានអាជីពការងារឱ្យបានច្បាស់លាស់ ដើម្បីក្លាយជាពលរដ្ឋល្អរស់នៅក្នុងគ្រួសារ និងមានសេចក្តីថ្លៃថ្នូរក្នុងសង្គម ដែលកំពុងតែអភិវឌ្ឍន៍នេះផង ។
ចែករំលែកព័តមាននេះ