ខេត្តបាត់ដំបង៖ ប្រជាពលរដ្ឋដែលរស់នៅតាមបណ្ដាស្រុកចំនួន៣នៃភាគខាងលិចខេត្តបាត់ដំបង ជាប់ព្រំប្រទល់ប្រទេសថៃ បានធ្វើការរិះគន់ចំពោះក្រុមហ៊ុនអគ្គិសនីនៅតាមបណ្ដាស្រុកទាំងនេះថា«បានលក់ភ្លើងអគ្គិសនីក្នុងតម្លៃខ្ពស់ បើប្រៀបធៀបទៅនឹងតាមបណ្ដាស្រុកនានាក្នុងខេត្តបាត់ដំបង ហើយក្រុមហ៊ុនទាំងនេះថែមទាំងមិនទទូលយកលុយខ្មែរទៀតផង គឺយកតែលុយបាត(លុយថៃ)តែប៉ុណ្ណោះ។
ស្រុកចំនួន៣ដែលពលរដ្ឋ បានរិះគន់អំពីតម្លៃសេវាអគ្គិសនីខ្ពស់ ហើយមិនយករូបីយប័ណ្ណខ្មែរនោះ មានស្រុកសំពៅលូន, ស្រុកភ្នំព្រឹក និងស្រុកកំរៀង ។ ជាពិសេស ក្រុមហ៊ុនអគ្គិសនីនៅស្រុកសំពៅលូនតែម្ដង ដែលពលរដ្ឋបានរិះគន់ធ្ងន់ធ្ងរជាងគេថា «មិនយកសោះលុយខ្មែរ សូម្បីតែ១សេនក្ដី គឺយកតែលុយបាត
ថៃ»។
មន្ត្រីអគ្គិសនីមួយរូបសុំមិនប្រាប់ឈ្មោះបាននិយាយថា សេវា«ក»អគ្គិសនីនៅក្នុងស្រុកទាំង៣ខាងលើនេះ ពិតជាបានចេញវិក្កយបត្រទូទាត់ថ្លៃភ្លើងអគ្គិសនីដល់អ្នកប្រើប្រាស់គិតជាលុយបាត «ប្រាក់ថៃ»មែន ។ មន្ត្រីរូបនេះ បានលើកឡើងក្នុងន័យរិះគន់ដែរថា នេះជាការខុសឆ្គង និងមិនសមរម្យទេ ដែលសេវា«ក» ទាំងនេះ មិនទទូលយកលុយខ្មែរ ហើយបែរជាទទូលយកតែលុយបាតថៃ ដែលមិនមែនជារូបីយប័ណ្ណរបស់ជាតិខ្លួន ហើយថែមទាំងតម្លៃខ្ពស់ជាងតម្លៃអគ្គិសនីនៅក្នុងខេត្តទាំងមូលទៀត។
បើតាមប្រភពព័ត៌មានបានឲ្យដឹងថា តម្លៃអគ្គិសនីនៅក្នុងស្រុកទាំង៣នេះ មានតំលៃប្រហែលគ្នា គឺ១គីឡូវ៉ាត់ម៉ោងថ្លៃ៨,៥បាត (លុយថៃ) ។ ប៉ុន្តែអ្នកប្រើប្រាស់អគ្គិសនីបានបញ្ជាក់ថា ក្រុមហ៊ុនអគ្គិសនី នៅក្នុងស្រុកកំរៀង និងស្រុកភ្នំព្រឹក ចេញវិក្កយបត្របង់ភ្លើងជាលុយ«បាត» តែបើបង់ជាលុយខ្មែរ ឬលុយដុល្លារក៏ទទួលដែរ តែក្រុមហ៊ុនគិតតាមហាងឆេងរវាងលុយខ្មែរ និងលុយដុល្លារជាមួយលុយបាត ។ ពោលគឺក្រុមហ៊ុនអគ្គិសនីនៃស្រុកទាំង២នេះ យកលុយបាតថៃជាគោល ។ ដោយឡែក នៅឯស្រុកសំពៅលូនវិញ គឺក្រុមហ៊ុនអគ្គិសនីមិនទទួលយកលុយខ្មែរដាច់ខាតតែម្ដង សូម្បីតែ១សេនក្ដី ។
ជុំវិញការការលើកឡើងពីអថិជនដែលប្រើប្រាសអគ្គិសនីនៅស្រុកសំពៅលូននេះ កោះសន្តិភាពមិនអាចស្វែងរកសុំការបំភ្លឺពីម្ចាស់ក្រុមហ៊ុននេះ ដោយផ្ទាល់បានភ្លាមៗនៅឡើយទេ នៅព្រឹកថ្ងៃទី២១ មករា ។ ប៉ុន្តែនៅពេលដដែលនេះ អ្នកទទូលបង់លុយរបស់ក្រុមហ៊ុននេះម្នាក់បានបំភ្លឺយ៉ាងខ្លីប្រាប់តាមទូរស័ព្ទថា «ក្រុមហ៊ុនទទូលយកលុយបាត ដោយសារក្រុមហ៊ុនទិញសេវាភ្លើងបន្តពីថៃ»។ បុរសនេះ បានជម្រុញឲ្យសួរបន្តទៅអ្នកទទូលខុសត្រូវម្នាក់ទៀត តែមិនបានប្រាប់ឈ្មោះទេ ហើយផ្ដាច់ទូរស័ព្ទតែម្ដង។
រីឯលោកងាវ ប៊ុនយាង អភិបាលស្រុកសំពៅលូន ក៏មិនបានអត្ថាធិប្បាយអ្វីដែរ ជុំវិញការត្អូញត្អែររបស់ពលរដ្ឋខ្លួនអំពីបញ្ហាសេវាអគ្គិសនីខាងលើនេះ ដោយលោកបានប្រាប់យ៉ាងខ្លីតាមទូរស័ព្ទដែរថា «ខ្ញុំកំពុងជាប់ប្រជុំ»។
ដោយឡែក លោកសុខ ហួត ប្រធានអង្គភាពអគ្គិសនីខេត្តវិញ ក៏មិនអាចសុំការបំភ្លឺបានដែរ ដោយទូរស័ព្ទចូលហើយ តែគ្មានមនុស្សទទូល ។ ប៉ុន្តែមន្ត្រីខេត្តមួយរូបបាននិយាយថា «សេវាអគ្គិសនីដែលកំពុងដំណើរការនៅតាមបណ្ដាស្រុកទាំង៣ខាងលើនេះ គឺបានទិញបន្តមកពីប្រទេសថៃ» ។
ព័ត៌មានលម្អិតនឹងមានផ្សាយជូនបន្តលើទំព័រកាសែតកោះសន្តិភាព ។
ចែករំលែកព័តមាននេះ