រាជធានីភ្នំពេញ ៖ កាលពីព្រឹកថ្ងៃទី២០ ខែមករា ឆ្នាំ២០១៩ នៅអគារនៃនាទីស្វែងយល់ព្រះពុទ្ធសាសនា ក្រោមអធិបតីរបស់លោកជំទាវ កែ គឹមសែ ដែលជាព្រះរាជតំណាងដ៏ខ្ពង់ខ្ពស់របស់សម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ បានសព្វព្រះរាជហឬទ័យព្រះរាជទាន ព្រះរាជ្យទ្រព្យផ្ទាល់ព្រះអង្គចំនួន២ម៉ឺនដុល្លារ ដើម្បីចូលរួមក្នុងការកសាងមហាប្រាសាទ «ព្រះចូឡាមុនីចេតិយ» ដែលមានទីតាំងស្ថិតនៅក្នុងរមនីយដ្ឋានឧទ្យានជាតិ ព្រះសុរាម្រិត-កុសុមៈ ភ្នំគីរីរម្យ ស្រុកភ្នំស្រួច ខេត្តកំពង់ស្ពឺ។
ពិធីនេះដែរ បានប្រារព្ធធ្វើឡើងក្រោមអធិបតីភាពរបស់សម្តេចព្រះសុមេធាធិបតី នន្ទ ង៉ែត ព្រះសង្ឃនាយកនៃព្រះរាជាណាចក្រកម្ពុជា លោកជំទាវឧកញ៉ា មហាឧបាសិកាធម្មបណ្ឌិត ញ៉ឹក ប៊ុនថា ជាប្រធានមជ្ឈមណ្ឌលវប្បធម៌ ព្រះពុទ្ធសាសនាកម្ពុជា ព្រមទាំងអស់លោក លោកជំទាវ ព្រះសង្ឃ តាជី យាយជី លោក លោកស្រី សីលវ័ន្ត សីលវតី សិស្ស មន្ត្រីជាន់ខ្ពស់នៃសាលាភូមិន្ទរដ្ឋបាលជាច្រើននាក់ទៀតចូលរួមផងដែរ។
ឧកញ៉ាមហាឧបាសិកាធម្មបណ្ឌិត ញ៉ឹក ប៊ុនថា ប្រធានមជ្ឈមណ្ឌលវប្បធម៌ព្រះពុទ្ធសាសនាកម្ពុជា បានមានប្រសាសន៍ថា សូមក្រាបបង្គំទូលថ្វាយសម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គលជាទីគោរពសក្ការៈដ៏ខ្ពង់ខ្ពស់បំផុត។
បពិត្រ ព្រះករុណាជាម្ចាស់ជីវិតលើត្បូង ជាទីសក្ការៈដ៏ខ្ពង់ខ្ពស់បំផុត។ទូលព្រះបង្គំខ្ញុំម្ចាស់ ព្រះសង្ឃនាយក គណៈកម្មាធិការ សប្បុរសជន និងពុទ្ធបរិស័ទ មានសេចក្តីរំភើបសោមនស្សរីករាយ និងមហាកិត្តិយសដ៏ខ្ពង់ខ្ពស់បំផុតដែលបានទទួលព្រះរាជ្យទ្រព្យជាបច្ច័យដ៏ថ្លៃថ្លាពីសម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុតនៅពេលនេះ។
ដើម្បីកសាងចូឡាមណីចេតិយ នៃមជ្ឈមណ្ឌល វប្បធម៌ព្រះពុទ្ធសាសនាកម្ពុជានៅឧទ្យានជាតិគីរីរម្យ ខេត្តកំពង់ស្ពឺ ចំនួន២ម៉ឺនដុល្លារអាមេរិក ទ្រង់បានប្រោសប្រទាននូវព្រះរាជទ្រព្យចំនួន ៥ពាន់ដុល្លារផងដែរ សរុបចំនួនព្រះរាជទ្រព្យព្រះអង្គផ្ទាល់ ២ ៥០០០ដុល្លារ សម្រាប់កសាងទុកជាសម្បត្តិ វប្បធម៌ជាតិ។
ឧកញ៉ាមហាឧបាសិការធម្មបណ្ឌិតក៏បានថ្លែងបន្តទៀតថា ក្នុងឱកាសដ៏មហានក្ខត្តឬក្សថ្លៃថ្លានេះ ក្នុងនាមមជ្ឈមណ្ឌលវប្បធម៌ព្រះពុទ្ធសាសនាកម្ពុជា ទូលព្រះបង្គំខ្ញុំម្ចាស់ សូមព្រះបរមរាជានុញ្ញាត លំឱនកាយ សូមក្រាបថ្វាយអំណរព្រះគុណដ៏ជ្រាលជ្រៅបំផុតចំពោះសម្តេចព្រះមហាក្សត្រី ព្រះវររាជមាតាជាតិខ្មែរ ដែលទ្រង់មានព្រះរាជសទ្ធាជ្រះថ្លា និងតែងតែមានព្រះរាជហឬទ័យទុកដាក់ទ្រទ្រង់លើកតម្កើងចំពោះវិស័យព្រះពុទ្ធសាសនា ។
ទូលព្រះបង្គំខ្ញុំម្ចាស់ សូមលើកហត្ថាប្រណមបួងសួងដល់វត្ថុសក្តិសិទ្ធិទាំងឡាយក្នុងលោកតាមប្រោះព្រំទ្រទ្រង់ ការពារ ថ្វាយព្រះពរជ័យ សិរីមង្គល វិបុលសុខគ្រប់ប្រការ ថ្វាយចំពោះសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គប្រកបដោយព្រះរាជសុភាពល្អពេញបរិបូរណ៍ ព្រះពលានុភាពមាំមួនខ្លាំងក្លា ព្រះបញ្ញាញាណភ្លឺថ្លាវាងវៃ ព្រះជន្មា យុយ៉ឺនយូរជាងរយព្រះវស្សា និងសូមបុណ្យកុសលដ៏ខ្ពង់ខ្ពស់នេះ។
ជួយឃុំគ្រងថៃរក្សាសម្តេចម៉ែប្រកបដោយ ព្រះពុទ្ធពរដ៏ឧត្តុងឧត្តម្ភទាំងប្រាំប្រការ គឺអាយុ វណ្ណៈ សុខៈ ពលៈ និងបដិពាណៈ កុំបីឃ្លៀងឃ្លាតឡើយ។ សូមព្រះករុណាជាម្ចាស់ជីវិតលើត្បូងជាទីសក្ការៈដ៏ខ្ពង់ខ្ពង់បំផុត ទ្រង់ព្រះមេត្តាប្រោសទទួលនូវគារវភក្តីភាពដ៏ស្មោះស្ម័គ្រ និងខ្ពង់ខ្ពស់ បំផុតអំពីទូលព្រះបង្គំ។
ព័ត៌មានពិស្តារបន្តនឹងមានផ្សាយនៅលើកាសែតកោះសន្តិភាព
ចែករំលែកព័តមាននេះ