រាជធានីភ្នំពេញ ៖ កម្លាំងសមត្ថកិច្ចនគរបាលការិយល័យទី៣ និងទី៨ នៃមន្ទីរប្រឆាំងគ្រឿងញៀនក្រសួងមហាផ្ទៃ កាលវេលាម៉ោង១២និង១៥នាទីយប់ឈានចូលថ្ងៃទី១៩ មករា ក្រោយការចង្អុលបង្ហាញពីនាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ និងដឹកនាំផ្ទាល់ដោយលោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន ក្រោមការសម្របសម្រួលពីស្ថាប័នអយ្យការសាលាដំបូងរាជធានីភ្នំពេញ រួមទាំងអាជ្ញាធរមូលដ្ឋាន បានឆ្មក់ចូលបង្ក្រាបទីតាំងខារ៉ាអូខេមួយកន្លែង ពោពេញទៅដោយក្រុមប្រើប្រាស់ ចែកចាយ និងជួញដូរគ្រឿងញៀនដោយខុស ហើយក៏មានធ្វើការឃាត់ខ្លួន មនុស្សប្រុសស្រីចំនួន៥៨នាក់ ។
កិច្ចប្រតិបត្តិការនោះក៏បានធ្វើឡើងនៅចំណុចក្លឹមកម្សាន្តខារ៉ាអូខេ (ប្រូ) ដែលមានទីតាំងស្ថិតនៅផ្ទះលេខ៧៥៧ និង៧៥៨ ភូមិ៧ សង្កាត់បឹងត្របែក ខណ្ឌចំការមន រាជធានីភ្នំពេញ ។
ជាលទ្ធផលសមត្ថកិច្ចបានធ្វើការឃាត់ខ្លួនមនុស្សប្រុសស្រីចំនួន៥៨នាក់ ក្នុងនោះមានស្រី២៤ នាក់ និងប្រុស៣៤នាក់ និងចម្រុះ៥ជាតិសាសន៍ ដូចជា ១-ជនជាតិចិនចំនួន២៩នាក់ (ស្រី៥នាក់) ២-ជនជាតិវៀតណាមចំនួន២៣នាក់ (ស្រី១៥នាក់) ៣-ជនជាតិថៃចំនួន២នាក់ សុទ្ធតែស្រី្ត ៤-ជនជាតិខ្មែរ៣នាក់ (ស្រី២នាក់) និង៥-ជនជាតិកូរ៉េចំនួន១នាក់ ( ប្រុស) ។
ក្នុងនោះក៏បានបែងចែកជនសង្ស័យជាប្រភេទគឺ ១-មានអនុប្រធានក្រុមហ៊ុនម្នាក់ ជាម្ចាស់ទីតាំង ២-មេការធំម្នាក់ និងមេការតូចម្នាក់ ជាអ្នកចាត់ចែងទូទៅនៅក្នុងក្លឹបកម្សាន្តខារ៉ាអូខេ.ប្រូនោះ និង៣-អ្នកប្រើប្រាស់ គ្រឿងញៀន៥៣នាក់ និងអ្នកកំដរ២នាក់ ។
ចាប់យកវត្ថុតាងរួមមាន ១-ថ្នាំញៀនប្រភេទ អ៊ិចស្តាស៊ី គ្រាប់ទម្ងន់២,០៥ក្រាម ២-ថ្នាំញៀនម្សៅប្រភេទ គេតាមីន ៦,៥៨ក្រាម និង៣-ថ្នាំញៀនម្សៅប្រភេទកាហ្វេអ៊ិចស្តាស៊ី ៩៧,០៨ ក្រាម ។
ក្រោយពេលឃាត់ខ្លួនមនុស្សប្រុសស្រីទាំង៥៨នាក់នោះ សមត្ថកិច្ចបានធ្វើតេស្តពិនិត្យទឹកនោម ដោយរកឃើញថា មនុស្ស៥២នាក់មានផ្ទុកដោយសារធាតុញៀន (វិជ្ជមាន) និង៦នាក់គ្មាន (អវិជ្ជមាន) ។
លោក ឡឹក វណ្ណៈ បន្តថា យុទ្ធនាការឆ្មក់ចូលបង្ក្រាបទីតាំងខារ៉ាអូខេជាសំបុកគ្រឿងញៀនមួយកន្លែងនេះ គឺដោយមានការណែនាំពីសម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ និង នាយឧត្តមសេនីយ៍ នេត សាវឿន អគ្គស្នងការនគរបាលជាតិផងដែរ ។
ក្រោយឃាត់ខ្លួនជនសង្ស័យពាក់ព័ន្ធករណីប្រើប្រាស់ ចែកចាយ និង ជួញដូរគ្រឿងទាំង៥៨ នាក់មាន៥ជាតិសាសន៍នោះ កម្លាំងសមត្ថកិច្ចបាននិងកំពុងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញតាមនីតិវិធី ៕
ចែករំលែកព័តមាននេះ