ខេត្តកំពង់ធំ ៖ លោក ជា ចាន់តូ សមាជិកគណៈអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា និងប្រធានក្រុមការងារថ្នាក់ជាតិចុះជួយស្រុកសន្ទុក បានបញ្ជាក់ក្នុងមោទនភាពថា ជ័យជម្នះថ្ងៃ៧ មករា…
ខេត្តកំពង់ធំ ៖ លោក ជា ចាន់តូ សមាជិកគណៈអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា និងប្រធានក្រុមការងារថ្នាក់ជាតិចុះជួយស្រុកសន្ទុក បានបញ្ជាក់ក្នុងមោទនភាពថា ជ័យជម្នះថ្ងៃ៧ មករា ជាមូលដ្ឋានដ៏រឹងមាំនៃសន្តិភាព និងការអភិវឌ្ឍរបស់កម្ពុជា បើគ្មានថ្ងៃ៧ មករា ឆ្នាំ១៩៧៩ទេ នោះកម្ពុជាគ្មានអ្វីៗដូចថ្ងៃនេះឡើយ ។
នេះជាការបញ្ជាក់របស់លោក ជា ចាន់តូ កាលពីថ្ងៃទី១០ ខែមករា នៅក្នុងមិទ្ទីញអប អរសាទរខួបលើកទី៤០ឆ្នាំ នៃថ្ងៃជ័យជម្នះ ៧មករា (៧ មករា ១៩៧៩-៧ មករា២០១៩) ដែលរៀបចំធ្វើនៅបរិវេណទីស្នាក់ការគណបក្ស ស្រុកសន្ទុក ដោយមានមហាជននិងតំណាងស្ថាប័នទូទាំងស្រុកជិត១ពាន់នាក់ចូលរួម ។
នៅក្នុងសុន្ទរកថារបស់សម្តេចតេជោនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា ដែលអានជូនអង្គមិទ្ទីញដោយលោក ជា ចាន់តូ បានលើកឡើងយ៉ាងច្បាស់ថា ថ្ងៃ៧ មករា គឺជាថ្ងៃកំណើតទី២របស់ប្រជាជនកម្ពុជា ដែលនេះជាសច្ចធម៌ប្រវត្តិសាស្ត្រ ដែលគ្មានជនណា ឬកម្លាំងណាមកបំភ្លៃឬបំផ្លាញបានឡើយ ។
សុន្ទរកថារបស់សម្តេចតេជោ ហ៊ុន សែន បញ្ជាក់ទៀតថា ថ្ងៃជ័យជម្នះ ៧ មករា ១៩៧៩ ដែលសម្រេចបានមកនេះ គឺឈរលើមូលដ្ឋាននៃការគួបផ្សំយ៉ាងស្អិតរមួតរវាងកម្លាំង២គឺកម្លាំងមហាសាមគ្គីជាតិរបស់កម្ពុជា ក្រោមការដឹកនាំរបស់គណបក្សប្រជាជនកម្ពុជា និងការជួយឧបត្ថម្ភយ៉ាងធំធេងទាន់ពេល និងមានប្រសិទ្ធភាពពីសំណាក់កងទ័ពស្ម័គ្រចិត្តវៀតណាម។
ស្មារតី៧ មករា ស្ថិតនៅក្នុងដួងចិត្តរបស់យើងជានិច្ច និងជាកម្លាំងដ៏ធំធេងនៅក្នុងការអភិវឌ្ឍសេដ្ឋកិច្ចជាតិ ។ បច្ចុប្បន្នយើងកំពុងឈរយ៉ាងរឹងមាំក្នុងភាពជាម្ចាស់លើប្រទេសជាតិ និងជោគវាសនារបស់ខ្លួន ហើយក៏កំពុងឈានទៅមុខយ៉ាងស្វាហាប់ ប្រកបដោយភាពជឿជាក់ដែរ ។ ពោលគឺក្នុងរយៈពេល៤០ឆ្នាំកន្លងមកនេះផ្ដើមចេញពីជ័យជម្នះ ៧មករា ១៩៧៩ កម្ពុជាបានសម្រេចនូវការកែប្រែមុខមាត់ដែលគ្មានអ្នកណានឹកស្មានដល់ឡើយ ។
នៅក្នុងឱកាសនោះ លោក ជា ចាន់តូ ក៏បានអំពាវនាវដល់អ្នកចូលរួមក៏ដូចប្រជាជនកម្ពុជាទាំងអស់ ត្រូវប្រកាន់ឲ្យបានខ្ជាប់នូវស្មារតីរួបរួមជាតិជាធ្លុងមួយ ដើម្បីកសាងប្រទេសជាតិឲ្យទទួលបានការអភិវឌ្ឍថ្មីបន្ថែមទៀត ៕ ដោយសហការី
ចែករំលែកព័តមាននេះ