តើល្បែងកម្សាន្តប្រភេទណាដែលអ្នកចូលចិត្តបំផុត ហើយអ្នកធ្លាប់បានលេងហើយឬនៅ? សប្តាហ៍នេះទស្សនាវដ្តីមហាគ្រួសារសូមនាំអារម្មណ៍លោក-អ្នកទៅមណ្ឌលកម្សាន្តមួយក្នុងស្រុកដែលអាចចាត់ទុកថា ជាកន្លែងកម្សាន្តគ្មានពីរ និងលើកដំបូងគេបង្អស់នៅកម្ពុជា គឺកំរាលពីសជិះស្គីធ្វើពីទឹកកកពិតៗ មិនចាំទៅអឺរ៉ុប ឬតំបន់មានទឹកកកឡើយ ។ ទីនេះមានល្បែងកម្សាន្តប្លែកៗជាច្រើន
តើល្បែងកម្សាន្តប្រភេទណាដែលអ្នកចូលចិត្តបំផុត ហើយអ្នកធ្លាប់បានលេងហើយឬនៅ? សប្តាហ៍នេះទស្សនាវដ្តីមហាគ្រួសារសូមនាំអារម្មណ៍លោក-អ្នកទៅមណ្ឌលកម្សាន្តមួយក្នុងស្រុកដែលអាចចាត់ទុកថា ជាកន្លែងកម្សាន្តគ្មានពីរ និងលើកដំបូងគេបង្អស់នៅកម្ពុជា គឺកំរាលពីសជិះស្គីធ្វើពីទឹកកកពិតៗ មិនចាំទៅអឺរ៉ុប ឬតំបន់មានទឹកកកឡើយ ។ ទីនេះមានល្បែងកម្សាន្តប្លែកៗជាច្រើនទៀតដែលមិនធ្លាប់មានក្នុងប្រទេសយើងកន្លងមក ពោលគឺយុវវ័យ និងកុមារមិនធ្លាប់បានសាកល្បងឡើយ ។
ឡើងមកដល់ជាន់ទី១០ នៃអគារ KIDS CITY ដែលមានទីតាំងលើកំណាត់មហាវិថីព្រះសីហនុ ក្បែរអគារ៤២ជាន់យើងសង្កេតឃើញល្បែងប្លែកពេញនិយមខ្លាំងសម្រាប់យុវវ័យ និងកុមារ ហើយបើមើលពីទឹកមុខ និងសកម្មភាពរបស់ពួកគេដែលកំពុងរំអិលស្គី គឺម្នាក់ៗបានបង្ហាញឱ្យឃើញពីភាពរីករាយពន់ពេក ខណៈរាងកាយហាក់រឹងរងាចំប្រប់ ដោយសារសីតុណ្ហភាព-៥អង្សាសេ នៅលើកំរាលពីសទឹកកក និង១០អង្សាសេនៅក្នុងបរិវេណជុំវិញ ធ្វើឱ្យបុគ្គលិកប្រចាំការត្រូវពាក់អាវធំការពារ ឯអ្នកចូលទស្សនាខ្លះត្រជាក់ដល់អោបដៃ តែអ្នកខ្លះទៀតបែរជាស្លៀកខ្លីហាក់មិនខ្ចីរវល់នឹងអាកាសធាតុត្រជាក់ស្ទើរដូចតំបន់ប៉ូលនេះឡើយ ។ អ្នកខ្លះមិនចេះជិះស្គីទេ តែដោយការចូលចិត្តនឹងល្បែងនេះ ក៏ហ៊ានប្រថុយពាក់ស្បែកជើងស្គីចូលលេងលើកំរាលពីសទឹកកកបង្ហាញពីភាពក្លាហាន និងសមត្ថភាពទាំងពេលចូលដល់ភ្លាមៗត្រូវរៀនបោះជំហានដោយអបនឹងរបាំងការពារក្នុងសភាពត្រជាក់ញ័រញាក់ ហើយអ្នកខ្លះដួលច្រងាប់ច្រងិលគួរឱ្យចង់សើច។ ដោយការព្យាយាម មិនយូរប៉ុន្មានគាត់អាចលែងដៃដើរបានរដាក់រដុបដោយខ្លួនឯង ។ ឯអ្នកចេះស្រាប់គាត់លេងស្តាយបានម៉ាសេរីពេញកំរាលពីស បញ្ចេញកាយវិការតាមបទភ្លេងពីរោះៗក្រោមពន្លឺភ្លើងពណ៌ឆ្លុះចាំងភ្លឺផ្លេក។
លោកគឹម ហេង ជាមន្ត្រីរាជការ និងជាភ្ញៀវនៅកន្លែងរំអិលស្គីនេះ បានឱ្យដឹងថា ពេលមកដល់ទីនេះ សប្បាយត្រជាក់ស្រួលខ្លួន ហើយប្លែកពីកន្លែងដទៃច្រើន ព្រោះកន្លែងបែបនេះនៅភ្នំពេញយើងមិនធ្លាប់មានទេ ។ ទីនេះជាកន្លែងដំបូងគេដែលមានល្បែងកម្សាន្តសុទ្ធតែប្លែកៗសម្រាប់យុវវ័យ និងក្មេងៗសប្បាយ ឃើញហើយធ្វើឱ្យយើងរំភើប និងចង់សាកល្បង ។
កញ្ញា លីលី ជាសិស្សវិទ្យាល័យមួយក្នុងរាជធានីភ្នំពេញបានឱ្យដឹងថា ពេលមកដល់ទីនេះខ្ញុំមានអារម្មណ៍ថា ពិតជាប្លែក ប៉ុន្តែបើមើលបរិវេណលេងស្គីរបស់យើង ធៀបនឹងបរទេសវាដូចជាតូចបន្តិច ប៉ុន្តែផ្ទុយទៅវិញនៅពេលខ្ញុំចូលលេង បែរជាយល់ថា វាមិនតូចប៉ុន្មានទេ ហើយមានអារម្មណ៍ថា ដូចបានជិះស្គីនៅបរទេសអញ្ចឹងដែរ ។ លោកស្រី សុខនាង ជាមេផ្ទះមានទីលំនៅនៅក្រុងតាខ្មៅ ខេត្តកណ្តាល បាននាំក្មួយម្នាក់ និងកូនរបស់គាត់ម្នាក់មកកម្សាន្ត ។ លោកស្រីបានឱ្យដឹងថា ខ្ញុំមកទីនេះដោយសារកូនចង់លេងស្គីទឹកកកនេះតែម្តង កូនចូលចិត្ត និងចង់ជិះលេងតាំងពីនៅតូចេម៉្លះ ហើយក្នុងចំណោមល្បែងទាំងអស់កូនមានចំណាប់អារម្មណ៍ខ្ពស់លើស្គីទឹកកកនេះឯង។
លោកមាស សុភក្ត្រ Assistan to CEO-Floor Manager (Ice Skating) នៅ Kids City Asia Company Limited បានឱ្យដឹងថា ជាទូទៅនៅ KIDS CITY មានការរៀបចំខុសពីកន្លែងដទៃបន្តិច ដោយសារយើងចែកជាពីរសកម្មភាព មួយគឺហាងលក់សម្លៀកបំពាក់ ហើយមួយទៀត គឺសម្រាប់លេងកម្សាន្ត ។ យើងមានរូបភាព ការចង្អុលបង្ហាញ និងផែនទីមួយចំនួនជូនភ្ញៀវ ព្រមទាំងណែនាំ ។ អញ្ចឹងពេលភ្ញៀវសម្រេចចិត្តថា ចង់លេងអ្វី យើងនាំគាត់ទៅជាន់នោះតែម្តង។ ពិសេសទៀតនោះ គឺកន្លែងយើងមិនតម្រូវឱ្យចាយប្រាក់សុទ្ធនោះទេ បើភ្ញៀវត្រូវការទិញអ្វី គឺត្រូវទិញជាកាតដែលមានចំនួនទឹកប្រាក់តាមតម្រូវការរបស់អតិថិជន ។
លោកមាស សុភក្ត្រ បញ្ជាក់ថា ចំពោះការជិះស្គីទឹកកកដែលនៅជាន់ទី១០ នោះ លក្ខណសម្បត្តិដែលតម្រូវឱ្យលេងដាច់ខាតក្មេងត្រូវតែមានអាយុចាប់៥ឆ្នាំឡើង ។ ឯតម្លៃយើងចែកជាពីរមួយសម្រាប់ក្មេងអាយុចាប់ពី៥ឆ្នាំដល់១៨ឆ្នាំ ជិះម្តង១០ដុល្លារ រយៈពេលនៅលើកំរាលពីស១ម៉ោង ។ មួយទៀតសម្រាប់មនុស្សពេញវ័យជិះម្តង១២ដុល្លាររយៈពេលនៅលើកំរាលពីស១ម៉ោងដូចគ្នា គឺក្រោយពីការពាក់ស្បែកជើង បុគ្គលិកយើងធ្វើការបង្ហាត់បង្ហាញជាទ្រឹស្តី ឬបង្ហាញលក្ខណៈខ្លះៗមុនពេលចាប់ផ្តើមលេង ។
ដោយឡែកយើងក៏មានតម្លៃពិសេសសម្រាប់ក្រុមសិស្សសាលាដែលមានសម្ព័ន្ធភាពជាមួយយើង ហើយមកកម្សាន្តក្នុងន័យកម្មវិធីរបស់សាលា គឺអាចមានតម្លៃទាបជាងនេះ ។ សម្រាប់ពេលវេលានៃការបើកចែកជា២ គឺថ្ងៃចន្ទដល់ថ្ងៃសុក្រពីម៉ោង៨ព្រឹកដល់ម៉ោង៩យប់ ។ ឯថ្ងៃសៅរ៍ដល់អាទិត្យ និងថ្ងៃបុណ្យជាតិ ឬអន្តរជាតិផ្សេងៗ បើកពីម៉ោង៨ព្រឹកដល់ម៉ោង១០យប់ ៕
ចែករំលែកព័តមាននេះ