រាជធានីភ្នំពេញ ៖ រដ្ឋមន្ត្រីក្រសួងព័ត៌មានបានបញ្ជាក់ឱ្យដឹងថា ក្រសួងព័ត៌មានគ្រោងនឹងបង្កើតទូរទស្សន៍៣ ឬ៤ប៉ុស្ដិ៍ថែមទៀត ដើម្បីផ្សព្វផ្សាយឱ្យបានទូលំទូលាយសម្រាប់ប្រព័ន្ធ ផ្សព្វផ្សាយព័ត៌មានរបស់ជាតិបន្ថែម លើការផ្សាយតាមគេហទំព័រ និងការផ្សាយជាសំឡេង ។
នេះបើតាមទីការចុះផ្សាយរបស់ទីភ្នាក់ងារសារព័ត៌មានកម្ពុជា (AKP) ។ យោងតាម AKP ចេញផ្សាយ កាលពីថ្ងៃទី២ មករា ឆ្នាំ២០១៩កន្លងមក បានឲ្យដឹងថា លោក ខៀវ កាញារីទ្ធ បានគូសបញ្ជាក់ថា ទូរទស្សន៍ដែលគ្រោងនឹងបង្កើតបន្ថែមនោះ គឺសម្រាប់ទីភ្នាក់ងារសារព័ត៌មានកម្ពុជាAKP និងវិទ្យុជាតិកម្ពុជា ខណៈបច្ចុប្បន្នស្ថាប័នទាំងពីរមានតែការផ្សព្វផ្សាយតាមគេហទំព័រ និងរលកធាតុអាកាសជាសំឡេងតែប៉ុណ្ណោះ ។
លោករដ្ឋមន្ដ្រីបានលើកឡើងថា សម្រាប់ការងារជាអាទិភាពបច្ចុប្បន្នស្ថាប័នជាតិទាំងពីរត្រូវបណ្តុះបណ្តាលមន្ត្រីឱ្យមានសមត្ថភាពខាងជំនាញគ្រប់គ្រងបច្ចេកទេស អ្នកសរសេរវិចារណកថា បទអត្ថាធិប្បាយ និងអ្នកវិភាគព័ត៌មានស៊ីជម្រៅជាមុនសិន ដើម្បីធ្វើឱ្យទស្សនិ កជន និងប្រិយមិត្តងាកមកគាំទ្រស្តាប់ និងទស្សនាបណ្តាញផ្សព្វផ្សាយព័ត៌មានរបស់ជាតិឱ្យ កាន់តែច្រើន និងមានការប្រកួតប្រជែងខ្ពស់ ។
ជាមួយគ្នានេះលោករដ្ឋមន្ត្រីក៏បានលើកឡើងថា ក្រសួងព័ត៌មានក៏មានគម្រោងបង្កើតកន្លែងផ្ទុកទិន្នន័យសំខាន់សម្រាប់ផ្តល់ភាពងាយស្រួលក្នុងការស្វែងរកឯកសារទាំងចាស់ទាំងថ្មី ដែលបន្សល់ទុកជាយូរមកហើយ ។ លោកបានបន្ថែមថា បច្ចុប្បន្ននេះមានកាសែតដែលផ្សាយជាប្រចាំចំនួន៥១២អង្គភាព ព័ត៌មានព្រឹតិ្ដបត្រដែលផ្សាយតាមអនឡាញចំនួន៧២អង្គភាព ស្ថានីយទូរទស្សន៍ផ្សាយតាមរលកធាតុអាកាស និងទូរទស្សន៍ខ្សែកាបទាំងផ្សាយផ្ទាល់ និងទាំងផ្សាយបន្តផ្ទាល់មានចំនួនជាង២០០ និងស្ថានីយផ្សាយតាមប្រព័ន្ធឌីជីថលមានចំនួន៥ ។
ជាមួយគ្នានេះដែរ លោករដ្ឋមន្ដ្រីក៏បានកត់សម្គាល់ឃើញថា ទន្ទឹមនឹងការរីកចម្រើនផ្នែក ប្រព័ន្ធផ្សព្វផ្សាយអ្នកសារព័ត៌មានកម្ពុជាក៏មានការអភិវឌ្ឍខ្លួនផ្នែកសមត្ថភាព វិជ្ជាជីវៈ និងមាន អ្នកសារព័ត៌មានមួយចំនួនអាចប្រឡូកអាជីពសារព័ត៌មានជាមួយអង្គភាពសារព័ត៌មានបរទេសតាមរយៈការសរសេរ និងធ្វើបទវិភាគឱ្យសារព័ត៌មានល្បីៗរបស់ពិភពលោកផងដែរ ។
សូមជម្រាបថា ការលើកឡើងរបស់ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាននេះធ្វើឡើងក្នុងបទសម្ភាសន៍ជាមួយទីភ្នាក់ងារសារព័ត៌មានកម្ពុជា AKP និងវិទ្យុជាតិកម្ពុជា កាលពី ព្រឹកថ្ងៃទី០២ ខែមករា ឆ្នាំ២០១៩ នៅទីស្តីការក្រសួងព័ត៌មាន ។
ទាក់ទិននឹងគម្រោងបើស្ថានីយ៍ទូរទស្សន៍របស់ក្រសួងព័ត៌មាននេះត្រូវបានវេទិការយុវសារព័ត៌មានកម្ពុជាសេចក្តីប្រកាសព័ត៌មានគាំទ្រ ។ យោងតាមសេចក្តីប្រកាសព័ត៌មានរបស់វេទិការយុវអ្នកសារព័ត៌មានកម្ពុជា (CYJF) ដែលបង្កើតឡើងយុវជនមកពីស្ថាព័ត៌មានចម្រុះបានចេញផ្សាយ នៅថ្ងៃទី៣ មករានេះ បានប្រកាសគាំទ្រដោយបានលើកឡើងថា ការបង្កើតទូរទស្សន៍នៅកម្ពុជា គឺជាចូលរួមចំណែកគាំទ្រ និងលើកកម្ពស់ដល់សិទ្ធិសេរីភាពសារព័ត៌មាន ពង្រឹង និងពង្រីកវិសាលភាពសារព័ត៌មាននៅកម្ពុជារួមទាំងជួយបង្កើត និងបង្កើនការងារជូនដល់អ្នកសារព័ត៌មានដែលជាយុវជនដែលកំពុងកើនឡើងជាបន្តបន្ទាប់ ។
មិនតែប៉ុណ្ណោះក៏ជួយបង្កើតការងារក្នុងវិស័យសារព័ត៌មាននេះក្នុងការចូលរួមចំណែកដល់ការលើកស្ទួយសេដ្ឋកិច្ច និងសង្គមកម្ពុជាយើងផងដែរ ៕
ចែករំលែកព័តមាននេះ