រាជធានីភ្នំពេញ ៖ កម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃ កាលពីព្រឹកថ្ងៃទី២៤ ធ្នូ បានបញ្ជូនជនសង្ស័យជាជនជាតិចិនចំនួន៣នាក់ ដែលជាក្រុមចាប់ជំរិតទារប្រាក់ពីជនជាតិចិនដូចគ្នា ទៅកាន់សាលាដំបូងរាជធានីភ្នំពេញ ។ ជនសង្ស័យទាំង៣នាក់នេះមាន…
រាជធានីភ្នំពេញ ៖ កម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃ កាលពីព្រឹកថ្ងៃទី២៤ ធ្នូ បានបញ្ជូនជនសង្ស័យជាជនជាតិចិនចំនួន៣នាក់ ដែលជាក្រុមចាប់ជំរិតទារប្រាក់ពីជនជាតិចិនដូចគ្នា ទៅកាន់សាលាដំបូងរាជធានីភ្នំពេញ ។ ជនសង្ស័យទាំង៣នាក់នេះមាន ១-ឈ្មោះ Yao Qing Chun ២-ឈ្មោះ Cheng Jian Bing និង៣-ឈ្មោះ Chi Jian Hua ។
ប្រភពព័ត៌មានបានឲ្យដឹងថា ជនសង្ស័យទាំង៣នាក់ ត្រូវបានសមត្ថកិច្ចចាប់ខ្លួន កាលពីថ្ងៃទី២២ ខែធ្នូ នៅរាជធានីភ្នំពេញ និងខេត្តព្រះសីហនុ ដែលប្រតិបត្តិការដឹកនាំដោយលោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ និងលោកវរសេនីយ៍ឯក ជាវ វិបុល នាយការិយាល័យនគរបាលព្រហ្មទណ្ឌកម្រិតធ្ងន់ក្រសួងមហាផ្ទៃ ។
ប្រភពព័ត៌មានទាក់ទិននឹងការចាប់ខ្លួនជនជាតិចិនទាំង៣នាក់នេះ ត្រូវបានឲ្យដឹងថា នៅវេលាពាក់កណ្តាលអធ្រាត្រសប្តាហ៍កន្លងទៅនេះ មានករណីជនជាតិចិន១ក្រុម បានធ្វើសកម្មភាពចាប់ជនជាតិចិនម្នាក់ នៅមុខកាសុីណូណាហ្គាវើល ក្នុងទឹកដីសង្កាត់ទន្លេបាសាក់ ខណ្ឌចំការមន ខណៈជនរងគ្រោះដើរចេញពីទីនោះ រួចដឹកចេញតាមរថយន្តយកទៅបាត់ ។ ប៉ុន្តែ២ថ្ងៃក្រោយមក រឿងនេះ ក៏បែកធ្លាយជាករណីចាប់ជំរិតទារប្រាក់ តាមរយៈក្រុមគ្រួសារ ដែលបានប្តឹងសមត្ថកិច្ចឲ្យជួយអន្តរាគមន៍ ។
ករណីចាប់ជំរិតទារប្រាក់នេះ ឧក្រិដ្ឋជនបានទារប្រាក់ពីក្រុមគ្រួសារជនរងគ្រោះចំនួន១០លានយន់ (លុយចិន) ប៉ុន្តែនៅពេលតថ្លៃ ក៏បានត្រូវរ៉ូវគ្នាសល់ត្រឹម៦លានយន់ ។ នៅពេលទទួលបានពាក្យបណ្តឹងនោះ កម្លាំងនគរបាលនាយកដ្ឋានព្រហ្មទណ្ឌ បានធ្វើការស្រាវជ្រាវជាបន្ទាន់ ដោយសហការជាមួយក្រុមគ្រួសារជនរងគ្រោះផងដែរ ។ លុះមកដល់ថ្ងៃទី២២ ខែធ្នូ ឧក្រិដ្ឋជនបានណាត់ឱ្យក្រុមគ្រួសារជនរងគ្រោះប្រគល់ប្រាក់ដែលត្រូវរ៉ូវគ្នានេះ ហើយក៏ត្រូវកម្លាំងសមត្ថកិច្ចចាប់ខ្លួនជនសង្ស័យតែម្តង ។
ប្រភពព័ត៌មានបន្តថា ដំបូងសមត្ថកិច្ចតាមប្រមាញ់ចាប់ខ្លួនជនសង្ស័យបានតែ២នាក់ទេ នៅរាជធានីភ្នំពេញ និងបន្តទៅចាប់ខ្លួនបានម្នាក់ទៀតនៅតំបន់អូរត្រេះ ក្នុងក្រុងព្រះសីហនុ ជាកន្លែងដែលជនសង្ស័យយកជនរងគ្រោះជាចំណាប់ខ្មាំងទៅធ្វើទារុណកម្មដើម្បីជំរិតទារប្រាក់ រួមទាំងរំដោះជនរងគ្រោះពីកណ្តាប់ដៃឧក្រិដ្ឋជនផងដែរ ។ក្រោយពីចាប់ខ្លួនជនសង្ស័យ និងរំដោះជនរងគ្រោះបានហើយ សមត្ថកិច្ចមិនបានបង្អង់ទុកយូរឡើយ និងដោយមានបទបញ្ជាពីលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ តម្រូវឲ្យនាំខ្លួនឧក្រិដ្ឋជនម្នាក់នោះនិងជនរងគ្រោះតាមយន្តហោះពីក្រុងព្រះសីហនុមករាជធានីភ្នំពេញដើម្បីបន្តនីតិវិធី ។
ជនសង្ស័យទាំង៣នាក់បានសារភាពនៅចំពោះមុខសមត្ថកិច្ចថា ពួកគេពិតជាជាប់ពាក់ព័ន្ធនឹងករណីចាប់ជំរិតទារប្រាក់ពីជនរងគ្រោះជាជនជាតិចិនដូចគ្នាមែន លើទឹកប្រាក់ចំនួន៦លានយន់(ប្រមាណ២០មឺុនដុល្លារអាមេរិក)ប្រាកដមែន ហើយមូលហេតុដែលពួកគេធ្វើសកម្មភាពចាប់ជនរងគ្រោះទារប្រាក់ គឺផ្តើមចេញពីការចាញ់ល្បែងនៅកាសុីណូ ៕
ចែករំលែកព័តមាននេះ