រាជធានីភ្នំពេញ ៖ មន្ត្រីជាន់ខ្ពស់រដ្ឋសភាជាតិ បានស្នើឲ្យក្រសួងពាណិជ្ជកម្មពន្លឿនរៀបចំផ្តល់សេវាសាធារណៈ និងការដោះស្រាយបញ្ហាប្រឈមមួយចំនួន ទាក់ទងនឹងភាពយឺតយ៉ាវនៃបែបបទនីតិវិធីឯក សារនាំចេញ នាំចូលទំនិញនានា ខណៈរបត់ពាណិជ្ជកម្មអន្តរជាតិបច្ចុប្បន្នកំពុងមានការប្រែប្រួលលឿន ។
នៅក្នុងជំនួបពិភាក្សាការងារផ្នែកច្បាប់ រវាងលោកជំទាវ និន សុផុន ប្រធានគណៈកម្មការទី៩នៃរដ្ឋសភា និងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មនៅទីស្តីការក្រសួងថ្ងៃទី២១ ខែធ្នូ ប្រធានគណៈកម្មការទី៩នៃរដ្ឋសភា បានដាក់សំណើជាច្រើន ក្នុងនោះមានសំណើមួយ ដែលខាងរដ្ឋសភាជាតិស្នើក្រសួងពាណិជ្ជកម្ម រៀបចំពន្លឿនការផ្តល់សេវាកម្មសាធារណៈ និងពន្លឿនការធ្វើបែបបទឯកសារទំនិញនាំចេញនាំចូលឲ្យមានភាពលឿនរហ័សទាន់ចិត្ត ដើម្បីទាក់ទាញកំណើនវិនិយោគមកកម្ពុជា ។
ឆ្លើយតបបញ្ហានេះ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម មានប្រសាសន៍ថា ដើម្បីជំរុញដោះស្រាយនិងពន្លឿនការផ្តល់សេវានេះឲ្យបានល្អ លឿនរហ័សនោះក្រសួងពាណិជ្ជកម្ម នឹងបន្តធ្វើការងារសហការជាមួយ ក្រសួងពាក់ព័ន្ធនានា ដែលមានពាក់ព័ន្ធក្នុងវិស័យ ហើយបន្ថែមលើនេះ ក្រសួងនឹងជំរុញការធ្វើការសេចក្តីព្រាងច្បាប់ពាណិជ្ជកម្មអេឡិចត្រូនិក ឲ្យរួចរាល់នៅក្នុងឆ្នាំ២០១៩នេះ ។
លោកបន្តថា បើទោះក្រសួងនៅមិនទាន់ច្បាប់ពាណិជ្ជកម្មអេឡិចត្រូនិច ឬហៅថាមានច្បាប់ E-Commerce សម្រាប់អនុវត្តក៏ដោយ ក៏សេវាកម្មសាធារណៈរបស់ក្រសួង បាននិងកំពុងផ្តល់ការចុះបញ្ជីតាមប្រព័ន្ធ Online រួចហើយ ពិសេសចុះការបញ្ជីពាណិជ្ជកម្មនៅតាមប្រព័ន្ធOnline និងការបង់ចំណូលរដ្ឋតាមអនឡាញជាដើម ។
លោកបញ្ជាក់ថា ៖« ការបង្កើតប្រព័ន្ធផ្តល់សេវាសាធារណៈនៅតាមប្រព័ន្ធអនឡាញនេះ គឺកំពុងលុបបំបាត់បាននូវអំពើពុករលួយ កាត់បន្ថយការបង់សេវានៅក្រោមតុ និងការរត់ការឯកសារនៅក្រៅសេវា ពិសេសលប់បំបាត់នូវសកម្មភាពអសកម្មជាច្រើនរបស់មន្ត្រី »៕
ចែករំលែកព័តមាននេះ