រាជធានីភ្នំពេញ ៖ បុរសជាជនជាតិឥណ្ឌាម្នាក់ដើររុញរទេះលក់នំរ៉ូទី ត្រូវយុវជនម្នាក់បើកម៉ូតូក្នុងល្បឿនលឿនបុកបណ្តាលឲ្យរងរបួសធ្ងន់ ។ ហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង៧និង៤០នាទីយប់ថ្ងៃទី១៩ ខែធ្នូ ឆ្នាំ២០១៨ តាមបណ្ដោយផ្លូវបេតុង ជាប់របងរោងចក្រកាណាឌីយ៉ា…
រាជធានីភ្នំពេញ ៖ បុរសជាជនជាតិឥណ្ឌាម្នាក់ដើររុញរទេះលក់នំរ៉ូទី ត្រូវយុវជនម្នាក់បើកម៉ូតូក្នុងល្បឿនលឿនបុកបណ្តាលឲ្យរងរបួសធ្ងន់ ។
ហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង៧និង៤០នាទីយប់ថ្ងៃទី១៩ ខែធ្នូ ឆ្នាំ២០១៨ តាមបណ្ដោយផ្លូវបេតុង ជាប់របងរោងចក្រកាណាឌីយ៉ា និងខាងក្រោយផ្សារវិនមីន ដែលស្ថិតនៅភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ ។
បុរសរងគ្រោះជាជនជាតិឥណ្ឌា មុខរបររុញរទេះលក់នំរ៉ូទី ។ ចំណែកភាគីខាងម៉ូតូម៉ាកស៊ុយហ្ស៊ុយគីនិច ពណ៌ស ពាក់ស្លាកលេខ ភ្នំពេញ ១DK- ៦៨៦៩ បើកបរដោយយុវជនម្នាក់មិនស្គាល់អត្តសញ្ញាណ ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបាននិយាយថា មុនពេលកើតហេតុ គេឃើញបុរសជាជនជាតិឥណ្ឌាម្នាក់កំពុងរុញរទេះលក់នំរ៉ូទីតាមផ្លូវបេតុងខាងលើ ក្នុងទិសដៅពីជើងទៅត្បូង លុះមកដល់ចំណុចកើតហេតុ ស្រាប់តែមានយុវជនម្នាក់បើកបរម៉ូតូមួយគ្រឿង ក្នុងល្បឿនយ៉ាងលឿន ក្នុងទិសដៅពីជើងទៅត្បូង ស្របទិសគ្នាជាមួយជនរងគ្រោះ បានបុកជនរងគ្រោះពីក្រោយពេញទំហឹង បណ្តាលអោយក្រឡាប់រទេះរុញ ធ្វើឲ្យជនរងគ្រោះដួលបោកនឹងថ្នល់បែកក្បាល និងបាក់ជើងខាងស្ដាំរងរបួសយ៉ាងធ្ងន់ធ្ងរ ។
ប្រភពព័ត៌មានបានបន្តទៀតថា ពេលគ្រោះថ្នាក់ភ្លាមៗ ភាគីខាងអ្នកបើកបរម៉ូតូឃើញជនរងគ្រោះរងរបួសធ្ងន់ធ្ងរពេក បានរត់ចោលម៉ូតូគេចខ្លួនបាត់ស្រមោល។
ក្រោយពេលកើតហេតុ ជនរងគ្រោះត្រូវបានរថយន្តសាមុយរបស់គ្លីនិកឯកជនមកដឹកយកទៅសង្គ្រោះភ្លាមៗផងដែរ ចំណែកឯម៉ូតូ និងរទេះខាងលើ ត្រូវបានជំនាញចរាចរណ៍ខណ្ឌពោធិ៍សែនជ័យបានប្រគល់អោយជំនាញចរាចរណ៍ការិយាល័យផ្លូវគោករាជធានីភ្នំពេញដើម្បីយកទៅរក្សាទុកដើម្បីរងចាំការដោះស្រាយ ៕
ចែករំលែកព័តមាននេះ