ខេត្តបន្ទាយមានជ័យ ៖ យ៉ាងហោចណាស់ក៏មានមនុស្សស្លាប់២នាក់ ក្នុងថ្ងៃតែមួយ ដោយសារលង់ទឹក ដែលម្នាក់នៅស្រុកព្រះនេត្រព្រះ និងម្នាក់ទៀតនៅស្រុកមង្គលបូរី ខេត្តបន្ទាយមានជ័យ ថ្ងៃទី១៩ ខែធ្នូ…
ខេត្តបន្ទាយមានជ័យ ៖ យ៉ាងហោចណាស់ក៏មានមនុស្សស្លាប់២នាក់ ក្នុងថ្ងៃតែមួយ ដោយសារលង់ទឹក ដែលម្នាក់នៅស្រុកព្រះនេត្រព្រះ និងម្នាក់ទៀតនៅស្រុកមង្គលបូរី ខេត្តបន្ទាយមានជ័យ ថ្ងៃទី១៩ ខែធ្នូ ឆ្នាំ២០១៨នេះ ។
លោកវរសេនីយ៍ឯក មាស ប្ញទ្ធី អធិការនគរបាលស្រុកព្រះនេត្រព្រះបានឲ្យដឹងថា នៅចន្លោះម៉ោង២ទាបភ្លឺទៅម៉ោង២រសៀល ថ្ងៃទី១៩ ខែធ្នូ ឆ្នាំ២០១៨ មានឈ្មោះ ចេង ប្រុស ភេទប្រុស អាយុ៤៥ឆ្នាំ នៅភូមិជើងវត្ត ឃុំព្រះនេត្រព្រះ ស្រុកព្រះនេត្រព្រះ ខេត្តបន្ទាយមានជ័យ បានក្រោកទៅមើលមងដាក់ត្រី នៅចំណុចអូតាជ្រាំ ខាងត្បូងភ្នំកូនដំរី ចំងាយ៨៥០ម៉ែត្រ ទឹកមានជម្រៅ២,២០ម៉ែត្រ ស្ថិតក្នុងឃុំព្រះនេត្រព្រះ ស្រុកព្រះនេត្រព្រះ ដោយបាត់យូរពេកប្រពន្ធបានទៅតាមរកនៅកន្លែងដាក់មង តែរកមិនឃើញក៏ត្រឡប់មកផ្ទះវិញ និងបានរកបងប្អូនក្នុងភូមិចំនួនពី៧-៨នាក់ អោយទៅជួយតាមរកនៅកន្លែងដាក់មងម្ដងទៀត លុះដល់វេលាម៉ោង២រសៀលថ្ងៃខែឆ្នាំដដែល ពេលចុះទៅរកឃើញតែមងក៏ទាញសាច់មងមក ស្រាប់តែឃើញសាកសពរុំព័ទ្ធដោយសាច់មងជាប់ បណ្ដាលអោយស្លាប់តែមិនដឹងតាំងពីពេលណានោះឡើយ រួចក៏នាំគ្នាស្រង់យកមកដាក់លើគោកដាក់ក្នុងអង្រឹងសែងយកមកផ្ទះ ។
លោកអធិការបានបន្តថា បើឆ្លងតាមការរៀបរាប់បំភ្លឺពីឈ្មោះ ជិន ម៉ៅ ដែលត្រូវជា (ប្រពន្ធសាកសព) អាយុ៤៤ឆ្នាំ បានបញ្ជាក់សមត្ថកិច្ចថា ប្ដីរបស់ខ្លួនបានទៅមើលមងតាំងយប់ម៉ោង២អធ្រាត្រ ម្លេះរហូតដល់ថ្ងៃមិនឃើញមកផ្ទះគាត់បានទៅតាមរកនៅកន្លែងដាក់មងតែមិនឃើញក៏មកហៅបងប្អូនក្នុងភូមិអោយទៅជួយរកទើបឃើញប្ដីរបស់ខ្លួនរុំជាប់ និងសាច់មងស្លាប់បាត់ទៅហើយ មិនដឹងតាំងពីពេលណានោះទេ ។
លោកវរសេនីយ៍ឯកមាស ប្ញទ្ធី ក៏បានបញ្ជាក់ទៀតថា ក្រោយពីទទួលបានព័ត៌មានបានបង្កើតគណៈកម្មការមានគ្រូពេទ្យមណ្ឌលសុខភាពចូលរួមផងដែរ ធ្វើកោសល្យវិច្ច័យពិនិត្យលើខ្លួនប្រាណសាកសពឈ្មោះ ចេង ប្រុស ឃើញថា ពុំមានស្លាក់ស្នាមអ្វីគួរអោយកត់សម្គាល់ទេ តាមការសន្និដ្ឋានការស្លាប់នេះពិតជាស្លាប់ដោយសារលង់ទឹកពិតមែន ។ ហើយយើងបានធ្វើកំ ណត់ហេតុប្រគល់សពជូនប្រពន្ធ ដើម្បីធ្វើបុណ្យតាមប្រពៃណី ។
ដោយឡែកនៅឯស្រុកមង្គលបូរី បើតាមការឱ្យដឹងពីនគរបាលស្រុកមង្គលបូរីបានឱ្យដឹងថាថ្ងៃទី១៩ ខែធ្នូ ឆ្នាំ២០១៨ វេលាម៉ោង៣និង៥៤នាទីរសៀល មានប្រជាពលរដ្ឋឈ្មោះ អឿ សារ៉ាត់ ភេទប្រុស អាយុ៣៧ឆ្នាំ នៅភូមិបឹងត្រស់ ឃុំចំណោម បានទៅមើលស្រែនៅខាងត្បូងភូមិ ចំងាយ១០០០ម៉ែត្រ បានប្រទះឃើញសពរបស់ឈ្មោះ ចាន់ នឿត ភេទប្រុស អាយុ៤៤ឆ្នាំ បានស្លាប់ក្នុងទឹកប្រឡាយ ។
បើតាមករបំភ្លឺពីលោកមេភូមិ និងពលរដ្ឋដែលនៅក្នុងភូមិជាអ្នកជិតខាងថា ជនរងគ្រោះជាមនុស្សស្រវឹងខួប ហើយរស់នៅម្នាក់ឯងគ្មានប្រពន្ធកូននៅជាមួយទេ មុនពេលស្លាប់ជនរងគ្រោះបានជិះកង់មកពីលើកមងធ្លាក់ចូលទឹកប្រឡាយ បណ្តលឱ្យលង់ស្លាប់គ្មានអ្នកណាដឹង ។
តាមការសន្និដ្ឋានសង្ស័យគាត់ស្រវឹងស្រា ជិះកង់ធ្លាក់ក្នុងទឹកប្រឡាយ ទាំងកង់ទាំងមនុស្ស បណ្តាលឲ្យលង់ស្លាប់ ។ សពត្រូវបានប្រគល់ជូនសាច់ញាតិចាត់ចែងធ្វើបុណ្យតាមប្រពៃណី ៕
ចែករំលែកព័តមាននេះ