រាជធានីភ្នំពេញ ៖ ក្នុងចំណោមស្ថានទូតនៃបណ្តាប្រទេសជាមិត្តជាង៣០ ដែលមានវត្តមាននៅកម្ពុជា គឺមានតែស្ថានទូតជប៉ុនមួយប៉ុណ្ណោះ ដែលបានទទួលយករូបិយប័ណ្ណកម្ពុជា(រៀល)ក្នុងការបង់ថ្លៃវីសាដល់ស្ថានទូតនេះ ។ ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ…
រាជធានីភ្នំពេញ ៖ ក្នុងចំណោមស្ថានទូតនៃបណ្តាប្រទេសជាមិត្តជាង៣០ ដែលមានវត្តមាននៅកម្ពុជា គឺមានតែស្ថានទូតជប៉ុនមួយប៉ុណ្ណោះ ដែលបានទទួលយករូបិយប័ណ្ណកម្ពុជា(រៀល)ក្នុងការបង់ថ្លៃវីសាដល់ស្ថានទូតនេះ ។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានឲ្យដឹងតាមទូរស័ព្ទនារសៀលថ្ងៃទី១៧ ធ្នូកន្លងមកថា ៖« ក្នុងចំណោមទូតនៃបណ្តាប្រទេសជាមិត្តកម្ពុជា មានតែស្ថានទូតជប៉ុនមួយប៉ុណ្ណោះ បានទទួលយកលុយរៀលរបស់យើង ដើម្បីទូទាត់លើសេវាកម្មផ្សេងៗជាមួយប្រជាជនកម្ពុជា ។ ចំណែកស្ថានទូតប្រទេសជាមិត្ត និងប្រទេសជិតខាងកម្ពុជា ពួកគេមិនយកលុយរៀលទេ ពួកគេយកតែប្រាក់ដុល្លារអាមេរិកប៉ុណ្ណោះ »។
លោក ហូ វណ្ឌី បញ្ជាក់ថា ៖« ការទទួលយកលុយរៀលពីស្ថានទូតជប៉ុននៅកម្ពុជា បានឆ្លុះបញ្ចាំងពីពួកគេឲ្យតម្លៃអត្តសញ្ញាណកម្ពុជា ឲ្យតម្លៃលើប្រជាជនកម្ពុជា និងឲ្យតម្លៃលើរូបិយប័ណ្ណកម្ពុជា »។
ភ្ញៀវទេសចរណ៍ជប៉ុន ដែលបានមកទស្សនាកម្ពុជាបានកើនឡើងខ្ពស់ ដោយតាមការព្យាកររបស់ក្រសួងទេសចរណ៍ឆ្នាំនេះ កម្ពុជាអាចទទួលបានភ្ញៀវទេសចរណ៍ជប៉ុន៣០ម៉ឺននាក់ ដោយសារការភ្ជាប់ជើងហោះហើរត្រង់មកកាន់ទីក្រុងភ្នំពេញកាលពីឆ្នាំ២០១៦ កន្លងមក ។ ភ្ញៀវទេសចរណ៍ជប៉ុន ក៏ស្ថិតក្នុងចំណោមភ្ញៀវជាប់ក្នុងចំណោមTop Ten ដែលជាប្រទេសមានភ្ញៀវមកទស្សនាកម្ពុជាច្រើនជាងគេផងដែរ ។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកបានមានប្រសាសន៍ស្រដៀងគ្នាថា ៖« ស្ថានទូតជប៉ុន ជាស្ថានទូតដែលបានចាប់ផ្តើមទទួលយកប្រាក់រៀលរបស់យើង តាំងពីដើមមករហូតមកទល់ពេលនេះ ហើយនេះជាការឲ្យតម្លៃមួយពីមិត្តជប៉ុនចំពោះជាតិសាសន៍របស់យើង ក៏ដូចជាឲ្យតម្លៃខ្ពស់ចំពោះទំនាក់ទំនងនៃប្រទេសទាំងពីរ » ៕
ចែករំលែកព័តមាននេះ