ខេត្តកោះកុង ៖ ពិធីបុណ្យសមុទ្រលើកទី៧ (ជុំទី២) នៅខេត្តកោះកុងនឹងឈានចូលមកដល់ហើយ ចាប់ពីថ្ងៃទី១៤ ខែធ្នូ ឆ្នាំ២០១៨ ស្អែកហើយល្ងាចនេះក៏មានពិធីក្រុងពាលីដល់ម្ចាស់ទឹកម្ចាស់ដី ដើម្បីសុខក្នុងពិធីបុណ្យសមុទ្រនេះផងដែរ ក្រោមវត្តមានលោក ថោង ខុន រដ្ឋមន្ត្រីទេសចរណ៍ផងដែរ ។
បុណ្យសមុទ្រនឹងត្រូវប្រារព្ធធ្វើឡើងរយៈពេលបីថ្ងៃ គឺនៅថ្ងៃទី១៤-១៥-១៦ ខែធ្នូ ក្រោមប្រធានបទ«ឆ្នេរស្អាត ពលរដ្ឋរមណី» ហើយក៏មានការអញ្ជើញចូលរួមបើកជាផ្លូវការពីសំណាក់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ។
តាមការបញ្ជាក់របស់លោក ប៊ុន បៀវ ប្រធានមន្ទីរទេសចរណ៍ខេត្តកោះកុងមកដល់ពេលនេះផ្ទះសំណាក់ និងសណ្ឋាគារនៅក្នុងក្រុងខេមរភូមិន្ទត្រូវបានភ្ញៀវទេសចរណ៍ជួល និងកក់ទុកជិតពេញអស់ហើយមានតែនៅតាមជាយៗក្រុងតិចតួចប៉ុណ្ណោះ ប៉ុន្តែភ្ញៀវទេសចរណ៍នៅមានជម្រើសទៅស្នាក់នៅខេត្តត្រាត ប្រទេសថៃក៏បានដែរ ។ សម្រាប់ភ្ញៀវទេសចរណ៍ដែលចង់ទៅស្នាក់នៅ និងទស្សនាកម្សាន្តនៅខេត្តត្រាតប្រទេសថៃត្រូវថតចម្លងអត្តសញ្ញាណប័ណ្ណសញ្ជាតិខ្មែរ (Copy) មកជាមួយឱ្យបានស្រេច ។
លោកប្រធានមន្ទីរបានបន្តថា ខាងភាគីថៃបានត្រៀមបន្ទប់ស្នាក់នៅ សម្រាប់ភ្ញៀវទេសចរណ៍ទៅពីកម្ពុជាដល់ទៅជាង៦០០បន្ទប់ឯណោះ ប៉ុន្តែមកដល់ពេលនេះភ្ញៀវទើបតែជួលអស់ជាង១០០បន្ទប់នៅឡើយទេ ពោល គឺនៅដល់ទៅជាង៤០០បន្ទប់ទៀត ។ សម្រាប់តម្លៃស្នាក់នៅខាងថៃវិញ គឺមិនលើសពី៣០ដុល្លារឡើយ ។ ប្រជាពលរដ្ឋខ្មែរ ដែលទៅលេងបុណ្យសមុទ្រក្នុងរយៈពេល៣ថ្ងៃ ដែលគ្មានលិខិតឆ្លងដែនក៏អាចឆ្លងទៅលេងដល់ខេត្តត្រាតប្រទេសថៃបានដែរ ដោយគ្រាន់តែយកអត្តសញ្ញាណប័ណ្ណទៅជាមួយ ។
បើចង់បើករថយន្តចូលខ្លួនឯងត្រូវមានប័ណ្ណសម្គាល់យានយន្ត និងប័ណ្ណបើកបរ ហើយបើមានក្មេងតូចៗទៅជាមួយត្រូវយករូបថតទៅផង ពោល គឺមិនចាំបាច់មានលិខិតឆ្លងដែនក៏បាន (តែបើមានលិខិតឆ្លងដែនក៏គួរយកតាមផងកាន់តែងាយស្រួល) ។
នេះបើតាមការបញ្ជាក់របស់ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ។ លោកជំទាវ មិថុនា ភូថង អភិបាលខេត្តកោះកុងបានបញ្ជាក់ដែរថា សម្រាប់ប្រជាពលរដ្ឋដែលមិនចង់បើករថយន្តរបស់ខ្លួនទៅផ្ទាល់ទេក៏អាចផ្ញើថយន្តនៅវត្តចាំយាមក្បែរព្រំដែនកម្ពុជា-ថៃបាន ហើយគេនឹងមានរថយន្តពីខាងថៃមកទទួលទៀតផង ។ ប្រសិនបើប្រជាពលរដ្ឋចង់ទៅស្នាក់ផ្ទះសំណាក់សណ្ឋាគារនៅខ្លងយ៉ៃ ឬទីរួមខេត្តត្រាតក៏បានដែរ ។
តាមការរំពឹងទុកពិធីបុណ្យសមុទ្រឆ្នាំនេះនឹងទទួលបានភ្ញៀវទេសចរយ៉ាងតិច៩ម៉ឺននាក់ ។ ទន្ទឹមនឹងនោះក្រសួងទេសចរណ៍ និងរដ្ឋបាលខេត្តកោះកុងក៏បានសហការគ្នារៀបចំតំបន់រមណីយដ្ឋានទេសចរណ៍មួយចំនួនទៀត សម្រាប់ត្រៀមទទួលភ្ញៀវទេសចរណ៍ក្នុងឱកាសបុណ្យសមុទ្រផងដែរ ដូចជា រមណីយដ្ឋានវិស្សមកាលតារាសាគរ តំបន់អេកូទេសចរណ៍ឆាយអារ៉ែង តាតៃ ព្រៃកោងកាង ឆ្នេរខ្សាច់ប៉ាក់ខ្លង រមណីយដ្ឋាន ចេតិយឃុនឆាង តំបន់ជុំវិញក្រុងខេមរភូមិន្ទ ព្រមទាំងកម្មវិធីកីឡា និងកម្មវិធីកម្សាន្តជាច្រើនទៀតផងដែរ ៕
ចែករំលែកព័តមាននេះ