ខេត្តកំពត ៖ លោកអភិបាលខេត្ត បានមានប្រសាសន៍កាលពីពេលថ្មីៗកន្លងមកនេះថា ភ្នំតូច-ធំជាច្រើន ស្ថិតនៅក្នុងទឹកដីខេត្តកំពត បានត្រូវឯកជនកាន់កាប់ស្ទើរទាំងស្រុងអស់ទៅហើយ ។ មានភ្នំខ្លះ ក៏មានអាជ្ញាប័ណ្ណធ្វើអាជីវកម្មស្របច្បាប់ត្រឹមត្រូវ…
ខេត្តកំពត ៖ លោកអភិបាលខេត្ត បានមានប្រសាសន៍កាលពីពេលថ្មីៗកន្លងមកនេះថា ភ្នំតូច-ធំជាច្រើន
ស្ថិតនៅក្នុងទឹកដីខេត្តកំពត បានត្រូវឯកជនកាន់កាប់ស្ទើរទាំងស្រុងអស់ទៅហើយ ។ មានភ្នំខ្លះ ក៏មានអាជ្ញាប័ណ្ណធ្វើអាជីវកម្មស្របច្បាប់ត្រឹមត្រូវ តាមប្រព័ន្ធរដ្ឋបាល ឯភ្នំមួយចំនួនទៀត ត្រូវបានបុគ្គលមានលុយ និងអ្នកមានអំណាចឃុបឃិតគ្នា ជាប្រព័ន្ធកាន់កាប់បម្រើផលប្រយោជន៍របស់ខ្លួន ហើយក៏មានភ្នំមួយចំនួនទៀត ត្រូវបានបុគ្គលខិលខូចយកគ្រឿងចក្រឈូសឆាយយកដី ធ្វើអាជីវកម្មដោយគ្មានច្បាប់ ។
សកម្មភាពអនាធិបតេយ្យខាងលើត្រូវបានគេដឹងទៀតថា បន្ទាប់ពីឈូសឆាយហើយ បុគ្គលទាំងនោះបានវាតទីយកដីភ្នំ ធ្វើជាកម្មសិទ្ធិតែម្តង ។ ប្រជាពលរដ្ឋនៅភូមិល្អាង និងភូមិដំណាក់អំពិល ក្នុងឃុំល្អាង ស្រុកដងទង់ ក៏បានធ្វើការរិះគន់អាជ្ញាធរស្រុកដងទង់ និងមន្ត្រីខណ្ឌរដ្ឋបាលព្រៃឈើ ដែលមានតួនាទីគ្រប់គ្រងគម្របព្រៃឈើរបស់រដ្ឋថា បណ្តែតបណ្តោយឲ្យបុគ្គលមានឥទ្ធិពលឆក់ឱកាសកាប់ឈើទន្ទ្រានដីភ្នំដោយខុសច្បាប់ និងប្រើប្រាស់គ្រឿងចក្រឈូសឆាយយកអាចម៍ដីលក់ដូរ យ៉ាងអនាធិបតេយ្យនៅដីចង្កះជួរភ្នំដង្កូវ ត្រង់ចំណុចភូមិដំណាក់អំពិល និងភូមិល្អាង ។
តាមអ្នកភូមិខាងលើនិយាយថា សកម្មភាពឈូសឆាយរុករានទន្ទ្រានដីភ្នំនាពេលកន្លងមកក៏ដូចជាពេលនេះដែរ គេឃើញជួរភ្នំដង្កូវស្ថិតក្នុងភូមិដំណាក់អំពិល និងភូមិល្អាង ក្នុងឃុំល្អាង កំពុងរងការកាប់ទន្ទ្រានរុករាននិងយកគ្រឿងចក្រមកឈូសឆាយ ព្រមទាំងកាយយកអាចម៍ដីភ្នំដឹកលក់យ៉ាងអនាធិបតេយ្យ ។ ចំពោះការរុករានកាប់បំផ្លាញព្រៃឈើ នៅក្បែរជើងភ្នំដើម្បីកាយយកអាចម៍ដីលក់និងដើម្បីទន្ទ្រានកាន់កាប់ជាកម្មសិទ្ធិរបស់បុគ្គលខាងលើ នេះ គេបានដាក់ការសង្ស័យទៅលើមន្ត្រីរដ្ឋបាលព្រៃឈើកំពត២រូប ដែលគេធ្លាប់ឃើញចុះទៅកន្លែងធ្វើសកម្មភាពខាងលើជាញឹកញាប់ មុននិងក្រោយមានការឈូសឆាយដីនៅចំណុចនោះ។
ក្រោយពីបានទទួលព័ត៌មានច្បាស់ការណ៍ពីប្រជាពលរដ្ឋ នាព្រឹកថ្ងៃទី៩ ខែធ្នូ អ្នករាយការណ៍ព័ត៌មានបានចុះទៅដល់ជួរភ្នំខាងលើ ឃើញមានសកម្មភាពឈូសឆាយដីយ៉ាងសកម្មមែនហើយដែលតាមការចោទប្រកាន់នានា បានចង្អុលទៅលើលោក សាស់ វណ្ណា អនុប្រធានសហគមន៍ព្រៃឈើ ។ ការប្រើគ្រឿងចក្រឈូសឆាយនេះដែរ ក៏មានបុគ្គលផ្សេងទៀតកំពុងធ្វើសកម្មភាពដែរ ។ អ្នកភូមិល្អាងបានចោទថា លោក សាស់ វណ្ណា ជាពលរដ្ឋរស់នៅក្នុងភូមិដំណាក់អំពិលហើយបច្ចុប្បន្នមានតួនាទីជាអនុប្រធានសហ
គមន៍ការពារព្រៃឈើ នៅតំបន់ជួរភ្នំដង្កូវនេះ។
ដោយសារមានតំណែងជាអនុប្រធានសហគមន៍ព្រៃឈើ ទើបបុគ្គលរូបនេះកាប់ទន្ទ្រានព្រៃភ្នំវាតទីឈូសឆាយដីព្រៃភ្នំខាងលើជាបន្តបន្ទាប់ រហូតដល់បច្ចុប្បន្ននេះក៏បានយកគ្រឿងចក្រឈូសឆាយកាយរណ្តៅព័ទ្ធចង្កេះភ្នំជាច្រើនពាន់ម៉ែត្រ ។ ជុំវិញការធ្វើសកម្មភាពកាប់ទន្ទ្រាននិងឈូសឆាយដីភ្នំធ្វើអាជីវកម្មអត់ច្បាប់ និងជីករណ្តៅកាយព្រំដីភ្នំក្នុងគោលបំណងយកធ្វើជាកម្មសិទ្ធិនេះ អ្នកយកព័ត៌មានយើងបានជួបសម្ភាសន៍ជាមួយ លោក សាស់ វណ្ណា ដែលរងការចោទប្រកាន់ ហើយលោកបានឲ្យដឹងថា ដីដែលគាត់កំពុងឈូសឆាយនេះគឺគាត់ទិញពីប្រជាពលរដ្ឋស្របច្បាប់ ។ ប៉ុន្តែយ៉ាងណាក៏ដោយ ការអះអាងរបស់លោក សាស់ វណ្ណា មិនមានឯកសារណាមួយបញ្ជាក់ច្បាស់លាស់ជាផ្លូវការទេ ។ មិនតែប៉ុណ្ណោះ ថែមទាំងអះអាងថា ដីនៅចំណុចដែលលោកកំពុងឈូសឆាយនិងកាយអាចម៍ដីលក់នេះ ក៏មិនបានដឹងថាដីរបស់ខ្លួនកាន់កាប់មានទំហំប៉ុន្មានហិកតាផងទេ ហើយដីដែលឈូសឆាយថ្មីៗនោះក៏ឃើញមានដាំដូងថ្មីៗផងដែរ គឺឈូសភ្នំឱ្យរាបយកដីធ្វើកម្មសិទ្ធិដោយឯកឯង ។
លោក ស៊ីវ ផេង អភិបាលស្រុកដងទង់ បានមានប្រសាសន៍ជុំវិញករណីខាងលើថា លោកកំពុងរៀបចំរបាយការណ៍ពាក់ព័ន្ធនឹងករណីរំលោភបំពានយកដីដែលកំពុងឈូសឆាយកាប់ទន្ទ្រានតំបន់ដីព្រៃឈើជួរភ្នំដង្កូវ នាពេលថ្មីៗនេះទៅថ្នាក់លើ ។ ទោះជាបែបណា លោកអភិបាលស្រុកបានបន្ធូរលើការមន្ទិលសង្ស័យនានាថា ក្រុមមន្ត្រីសាលាស្រុកនិងមន្ត្រីជំនាញបានចុះទៅដល់ទីនោះដែរនាពេលថ្មីៗនេះ តែគ្មានឃើញ
សកម្មភាពអ្វីធំដុំទេ ឃើញតែគ្រឿងចក្រមួយគ្រឿងបញ្ឈរចោលនៅចំណុចដីលោក សាស់ វណ្ណា ដោយគ្មានធ្វើសកម្មភាពអ្វីទាំងអស់ ។ចំណែកលោក ស៊ី គៀន មេឃុំល្អាង បានបញ្ជាក់តាមទូរស័ព្ទនារសៀលថ្ងៃទី៩ ខែធ្នូថា រាល់សកម្មភាពរបស់លោក សាស់ វណ្ណា មិនមានពាក់ព័ន្ធជាមួយនឹងអាជ្ញាធរមូលដ្ឋានរបស់លោកឡើយ ។ អ្វីដែលលោក សាស់ វណ្ណា លើកឡើងថាទិញលក់ដីពីប្រជាពលរដ្ឋនោះគឺគ្មានទេ ហើយពាក់ព័ន្ធនឹងករណីជីកដីភ្នំថាយកមកធ្វើផ្លូវក្នុងមូលដ្ឋាននោះក៏គ្មានដែរ នេះគឺជាលេសដោះសាប៉ុណ្ណោះ
ពាក់ព័ន្ធនឹងសកម្មភាពខាងលើ លោក ជួន សារ៉ា នាយខណ្ឌរដ្ឋបាលព្រៃឈើកំពត បានប្រាប់អ្នកយកព័ត៌មានយ៉ាងខ្លីតាមទូរស័ព្ទថា ចំពោះករណីកាប់ព្រៃទន្ទ្រានឈូសឆាយដីភ្នំខាងលើ បើសិនមន្ត្រីជំនាញរបស់លោកមានការឃុបឃិតនោះលោកនឹងចាត់ការទៅតាមផ្លូវច្បាប់ ។ករណីខាងលើ ប្រជាពលរដ្ឋនិងអាជ្ញាឃុំល្អាងរង់ចាំមើលថា បើប្រភពច្បាស់ការណ៍បែបនេះទៅហើយ តើមន្ត្រីជំនាញពាក់ព័ន្ធមានចំណាត់ការទៅលើលោក សាស់ វណ្ណា ដែរឬទេ ពីព្រោះមានប្រភពព័ត៌មានពីមាត់ចាបមាត់ព្រាបថា លោក សាស់ វណ្ណា ហ៊ានធ្វើសកម្មភាពរំលោកយកដីភ្នំដោយប្រើគ្រឿងចក្រទំនើបៗនេះ គឺអាចមានអ្នកមានអំណាចនៅពីក្រោយខ្នង ទើបហ៊ានវាតទីកាយរណ្តៅដីព័ទ្ធជើងភ្នំរាប់ពាន់ម៉ែត្របម្រុងធ្វើកម្មសិទ្ធិបែបនេះ ៕
ចែករំលែកព័តមាននេះ