ខេត្តកណ្តាល ៖ ក្មេងស្រី២នាក់ដែលត្រូវជាបងប្អូនបង្កើតនឹងគ្នាបានលង់ទឹកស្លាប់នៅចំណុចក្នុងប្រឡាយទឹកជម្រៅទឹកប្រហែល២ម៉ែត្រ កាលពីវេលាម៉ោងប្រហែល៨និង៣០នាទីព្រឹកថ្ងៃទី១០ ខែធ្នូ ឆ្នាំ២០១៨ ស្ថិតនៅក្នុងភូមិទួលសេរី ឃុំទួលព្រេជ ស្រុកអង្គស្នួល ខេត្តកណ្តាល។
ជនរងគ្រោះដែលស្លាប់ទាំង២នាក់ខាងលើ ម្នាក់ឈ្មោះ ប៉ិច រក្សា ភេទស្រី អាយុ ៩ឆ្នាំ ត្រូវជាបង ចំណែកម្នាក់ទៀតឈ្មោះ ប៉ិច រម្យនា ភេទស្រី អាយុ៤ឆ្នាំ ត្រូវជាប្អូន។ ជនរងគ្រោះទាំង២នាក់រស់នៅភូមិ អន្ទង់ក្រវៀន ឃុំម្កាក់ ស្រុកអង្គស្នួល ខេត្តកណ្ដាល។
តាមការបំភ្លឺរបស់ម្តាយក្មេងស្រីរងគ្រោះខាងលើឈ្មោះឡាង ប៊ុនណាង អាយុ២៨ ឆ្នាំ មុខរបរជាអ្នកសំអាងការ រស់នៅភូមិអន្ទង់ក្រវៀន ឃុំម្កាក់ ស្រុកអង្គ ស្នួល ខេត្តកណ្ដាល បានឲ្យដឹងថា មុនពេលកើតហេតុ ប្តីរបស់គាត់និងគាត់បានយកកូនស្រី២នាក់ទៅផ្ញើឪពុកម្តាយនៅភូមិទួលសេរី ឃុំទួលព្រេជ ស្រុកអង្គស្នួល រយៈពេល៣ថ្ងៃមកហើយ ដោយសារគាត់ទាំង២នាក់ប្តីប្រពន្ធជាប់រវល់ដើរភ្នួងគេ។
ប្រភពដដែលបានបន្តថា លុះដល់វេលាម៉ោង៨និង១០នាទីព្រឹកថ្ងៃទី១០ ខែធ្នូ ឆ្នាំ ២០១៨ គាត់បានទទួលដំណឹងពីប្អូនរបស់ប្តីគាត់ឈ្មោះ ឆុន មុំ ភេទស្រី អាយុ៣៥ឆ្នាំ មុខរបរកសិករ នៅភូមិទួលសេរី ឃុំទួលព្រេជ ស្រុកអង្គស្នួល បានទូរស័ព្ទប្រាប់ថា «កូនរបស់បងឯងលង់ទឹកប្រឡាយខាងត្បូងភូមិស្លាប់ទាំង២នាក់ហើយ ដោយសារវាទៅតាមខ្ញុំនិងកូនខ្ញុំ ហើយកូនខ្ញុំវាក៏លង់ទឹកដែរ តែវានៅរស់ទេ ដោយសារខ្ញុំយកបាយទៅឲ្យម្តាយកំពុងតែច្រូតស្រូវនៅខាងត្បូងប្រឡាយ ។
មូលហេតុមកពីខ្ញុំឲ្យពួកវាទាំង៣នាក់ឈរចាំមាត់ប្រឡាយ ពេលខ្ញុំត្រឡប់មកវិញឃើញតែកូនខ្ញុំហែលទឹកខ្វៃៗ ខ្ញុំក៏ស្រែកហៅអ្នកភូមិមកជួយស្រង់ដែរ តែកូនស្រីរបស់បងឯងទាំង២នាក់បានស្លាប់បាត់ទៅហើយ»។
ប្រភពដដែលបានបន្តទៀតថា ពេលនោះគាត់ក៏មកដល់ ស្រាប់តែឃើញកូនស្រីទាំង២ស្លាប់មែន គាត់ក៏យកសពកូនស្រីទាំង២នាក់ទៅផ្ទះវិញ។
ក្រោយកើតហេតុ សមត្ថកិច្ចនគរបាលផ្នែកពិនិត្យ វិភាគកន្លែងកើតហេតុស្រុកអង្គស្នួល បានមកដល់កន្លែងកើតហេតុ ដោយមានការចូលរួមពីលោកក្រុមប្រឹក្សាឃុំ គ្រូពេទ្យ មេភូមិនគរបាលប៉ុស្តិ៍ និងសាច់ញាតិរបស់ក្មេងស្រីរងគ្រោះបានធ្វើការពិនិត្យសព បនរកឃើញថាគ្មានស្នាកស្នាមអ្វីគួរឱ្យកត់សម្គាល់នោះទេ គឺក្មេងស្រីរងគ្រោះទាំង២នាក់ពិតជាស្លាប់ដោយសារលង់ទឹកប្រាកដមែន។
បន្ទាប់ពីពិនិត្យរួច សពត្រូវបានប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ