ខេត្តកំពង់ឆ្នាំង ៖ កាលពីព្រឹកថ្ងៃទី១០ ខែធ្នូឆ្នាំ២០១៨ នេះមន្ត្រីខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង បានបញ្ជូនជនសង្ស័យចំនួន៥នាក់ទៅកាន់តុលាការខេត្ត ដើម្បីផ្តន្ទាទោស តាមច្បាប់ស្តីពីជលផល…
ខេត្តកំពង់ឆ្នាំង ៖ កាលពីព្រឹកថ្ងៃទី១០ ខែធ្នូឆ្នាំ២០១៨ នេះមន្ត្រីខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង បានបញ្ជូនជនសង្ស័យចំនួន៥នាក់ទៅកាន់តុលាការខេត្ត ដើម្បីផ្តន្ទាទោស តាមច្បាប់ស្តីពីជលផល ដែលជនសង្ស័យទាំង៥នាក់បានប្រព្រឹត្តបទល្មើសឆក់ត្រីដោយខុសច្បាប់ កាលពីយប់ថ្ងៃទី៨ ខែធ្នូ នៅក្នុងស្រុកកំពង់លែង និងស្រុកកំពង់ត្រឡាច ។
លោក លី ឡា នាយខណ្ឌរដ្ឋបាលជលផលកំពង់ឆ្នាំងបានអោយដឹងថា ជនសង្ស័យទាំង៥នាក់ត្រូវបានសមត្ថកិច្ចជំនាញបានចាប់ឃាត់ខ្លួនជនសង្ស័យខាងលើកំពុងធ្វើសកម្មភាពឆក់ត្រីពីរន្លែងដាច់ដោយឡែកពីគ្នា។
លោកបានបញ្ជាក់ថា ករណីទី១-ជនសង្ស័យមានគ្នា៣នាក់ ត្រូវបានសមត្ថកិច្ចផ្នែករដ្ឋបាលជលផលកំពង់ប្រាសាទចាប់ខ្លួននៅចំណុចក្បាលកោះហូរ ស្ថិតភូមិក្បាលកោះ ឃុំអំពិលទឹក ស្រុកកំពង់ត្រឡាច ខណៈកំពុងធ្វើសកម្មភាពឆក់ត្រី ។
ជនសង្ស័យទាំង៣នាក់រួមមាន ១-ឈ្មោះ អ៊ាន ឡូត ភេទប្រុស អាយុ២៩ឆ្នាំ ២-ឈ្មោះ យ៉េន យ៉ាន ភេទប្រុស អាយុ១៩ឆ្នាំ និង៣-ឈ្មោះ ជិន សុខយ៉េង ភេទប្រុស អាយុ១៨ឆ្នាំ ។ ពួកគេទាំង៣នាក់រស់នៅក្នុងភូមិក្បាលកោះ ឃុំអំពិលទឹក ស្រុកកំពង់ត្រឡាច ។
ក្រោយពេលចាប់ឃាត់ខ្លួន សមត្ថកិច្ចបានដកហូតវត្ថុតាងរួមមានម៉ូទ័រសម្រាប់ឆក់ត្រីមួយគ្រឿង, អាគុយ៤០អំពែចំនួន២គ្រឿង, កាណូតបំពាក់ម៉ាស៊ីន និងត្រីចំនួន២គីឡូក្រាម។
លោកនាយខណ្ឌ័រដ្ឋបាលជលផលកំពង់ឆ្នាំងបានបន្តថា ករណីទី២-សមត្ថកិច្ចសង្កាត់ជលផល ប្រឡាយមាស ស្រុកកំពង់លែង ក៏ចាប់បានជនសង្ស័យចំនួន២នាក់ផងដែរ ពេលកំពុងធ្វើសកម្មភាពនៅក្នុងភូមិសាស្ត្រឃុំផ្លូវទូក ស្រុកកំពង់លែង ។
ជនសង្ស័យទាំងពីរនាក់នេះ ម្នាក់ឈ្មោះ ង៉ូវ ដាឡុច ភេទប្រុស អាយុ២៥ឆ្នាំ និងម្នាក់ទៀតឈ្មោះ ងិន វីរៈ ភេទប្រុស អាយុ២៨ឆ្នាំ ។ ជនសង្ស័យទាំងពីរនាក់មានទីលំនៅក្នុងភូមិប្រឡាយមាស ឃុំប្រឡាយមាស ស្រុកកំពង់លែង ។
សមត្ថកិច្ចដកហូតវត្ថុតាងរួមមាន អាំងវែទ័រឆក់ត្រីចំនួន១គ្រឿង កន្ត្រងឆក់១គូ អាគុយ៧០អំពែរ១គ្រឿង កាណូតម៉ាស៊ីន១គ្រឿង។
លោកលី ឡា បានបញ្ជាក់ទៀតថា ជនសង្ស័យទាំង៥នាក់ខាងលើគឺសមត្ថកិច្ចជំនាញបានចាប់ខ្លួនកាលពីយប់ថ្ងៃទី ៨ខែធ្នូ កន្លងទៅនេះ នៅទីតាំងដាច់ដោយឡែកពីគ្នា ។
ក្រោយការបញ្ជូនខ្លួនជនសង្ស័យមកដល់ខណ្ឌរដ្ឋបាលជលផលនៅ ព្រឹកថ្ងៃទី១០ ខែធ្នូនេះ មន្ត្រីជលផលបានបញ្ជូនជនសង្ស័យទាំងនោះទៅតុលាការដើម្បីធ្វើការសាកសួរ។
តាមលោកដឹងជនសង្ស័យទាំង៥នាក់ខាងលើ អាចនឹងត្រូវជាប់ពន្ធនាគារពី១ឆ្នាំទៅ៣ឆ្នាំតាមច្បាប់ស្ដីពីជលផល៕
ចែករំលែកព័តមាននេះ