ជនសង្ស័យមិនមែនចោរទេ…ជាកងអង្គរក្ស និងមានឋានន្តរស័ក្តិជាអនុសេនីយ៍ឯក

ថ្ងៃទី ០៦ ខែ ធ្នូ ឆ្នាំ ២០១៨
ម៉ោង ១៥:៤៩
យន់ ស៊ីថា
,ម៉ម លីហេង

រាជធានីភ្នំពេញ ៖ រហូតមកដល់ព្រឹកថ្ងៃទី៥ ខែធ្នូ ជនសង្ស័យម្នាក់កំពុងសម្រាកព្យាបាលរបួសនៅក្នុងមន្ទីរពេទ្យកាល់ម៉ែត ហើយក៏ត្រូវបានស្គាល់អត្តសញ្ញាណផងដែរដែលប្រាប់ថា ខ្លួនគឺជាកងអង្គរក្ស និងមានឪពុកជាមន្ត្រីនគរបាលជាន់ខ្ពស់ម្នាក់ ។ យោងតាមកិច្ចសម្ភាសន៍ជាមួយបណ្ដាញសារព័ត៌មានមួយ បុរសដែលជាជនសង្ស័យខាងលើ ឈ្មោះ ឯល សុឹមសុភ័ក្ត្រ អាយុ៣០ឆ្នាំ ជាកងអង្គរក្ស មានឋានន្តរស័ក្ដិ
ជាអនុសេនីយ៍ឯក និងប្រើប្រាស់អាវុធខ្លីម៉ាកឡុក៩៨មួយដើម ។

បុរសនេះនិយាយថា មុនពេលកើតហេតុវេលាថ្ងៃត្រង់ រូបគេរួមជាមួយមិត្តភក្ដិ២នាក់ទៀត ដែលជាជាងទូរស័ព្ទ បាននាំគ្នាទៅហូបបាយ។ លុះពេលចេញមកវិញ រូបគេជិះហ្សូ៊ម័រអុិច១គ្រឿងជាមួយមិត្តភក្ដិម្នាក់ ចំណែកមិត្តភក្ដិម្នាក់ទៀត ឈ្មោះរ៉ា ជិះម៉ូតូសេ១២៥គ្រឿង បែកផ្លូវគ្នា ។ ពេលទៅដល់ផ្សារដីថ្មី សង្កាត់ស្ទឹងមានជ័យ ខណ្ឌមានជ័យ ស្រាប់តែមានម៉ូតូសេ១២៥មួយគ្រឿង ស្ទាក់មុខម៉ូតូរបស់ខ្លួន តែខ្លួនមិនបានដឹងរឿងអ្វីទេ រួចហើយអ្នកជិះម៉ូតូនោះ បានចុះមកវាយខ្លួនក៏មានការប្រវាយប្រតប់គ្នា ។

បន្ទាប់មក រូបគេបានជិះម៉ូតូចេញទៅ និងមិនបានដឹងថា នគរបាលមកពីណាទេដេញតាមនិងបាញ់រូបគេ៤ទៅ ៥គ្រាប់តែម្ដង តែរូបគេមិនបានតដៃ ឬបាញ់នគរបាលមុន ដូចជាការចោទប្រកាន់ឡើយ ព្រោះពេលនោះ ខ្លួនគេជាអ្នកបើកម៉ូតូ ហើយកាំភ្លើងនៅក្នុងកាតាបទៀត មិនតែប៉ុណ្ណោះ នគរបាលបានចាប់រូបគេដាក់ខ្នោះ និងវាយថែមទៀត ។ បុរសនេះ បានទទូចរកយុត្តិធម៌ និងអះអាងថា រូបគេមិនមែនជាចោរឡើយ គឺមានការងារធ្វើត្រឹមត្រូវ ហើយឪពុកគេក៏ជាមន្ត្រីនគរបាលដែរ ។

សូមរំលឹកថា កាលពីវេលាម៉ោង៣ និង៣០នាទីរសៀលថ្ងៃទី៤ ខែធ្នូ នៅទល់មុខផ្សារដីថ្មី ស្ថិតក្នុងភូមិដីថ្មី សង្កាត់ស្ទឹងមានជ័យទី៣ ខណ្ឌមានជ័យ កម្លាំងនគរបាលចម្រុះជាច្រើននាក់ នៃអធិការដ្ឋានខណ្ឌដង្កោ រួមជាមួយកម្លាំងនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ បានដេញតាមជនសង្ស័យ៣នាក់ជិះម៉ូតូ២គ្រឿង ដែលមួយគ្រឿងម៉ាកហ្សូ៊ម័រអុិច ពណ៌ខ្មៅ ពាក់ផ្លាកលេខ ភ្នំពេញ ១FB-៧៥០០ និងមួយគ្រឿងទៀតម៉ាកសេ១២៥ ដែលក្រុមជននេះ មានកាំភ្លើងខ្លី១ដើមផង ។

នៅក្នុងប្រតិបត្តិការខាងលើ ក៏មានការផ្ទុះអាវុធបណ្ដាលឲ្យជនសង្ស័យម្នាក់ រងរបួសជើង ដោយនគរបាលបានអះអាងថា បាញ់ដើម្បីការពារខ្លួន ព្រោះជនសង្ស័យបានដកកាំភ្លើងបាញ់គំរាមកងកម្លាំងដែលដេញតាមចំនួន៤គ្រាប់ ។ តាមប្រភពព័ត៌មានឲ្យដឹងថា នៅមុនពេលមានការដេញតាម គឺកម្លាំងនគរបាលការិយា
ល័យព្រហ្មទណ្ឌកម្រិតស្រាលរាជធានីភ្នំពេញ បានប្រទះឃើញបុរសសង្ស័យខាងលើ ចូលផឹកស៊ីនៅចម្ការស្វាយមួយកន្លែង ស្ថិតក្នុងភូមិ២៤ សង្កាត់ព្រៃស ខណ្ឌដង្កោ ។

ក្រោយមក ស្រាប់តែឃើញបុរសរូបនេះ ដកកាំភ្លើងអាម៉េបញ្ចូលគ្រាប់ ពេលនោះកម្លាំងនគរបាលព្រហ្មទណ្ឌកម្រិតស្រាលរាជធានីភ្នំពេញ ក៏បានប្រកាសតាមវិទ្យុទាក់ទងទៅកម្លាំងខណ្ឌដង្កោឲ្យជួយពួនស្ទាក់ ។ ភ្លាមៗនោះ កងកម្លាំងនគរបាលខណ្ឌដង្កោ ដែលមានស្លៀកពាក់ឯកសណ្ឋានត្រឹមត្រូវ ចេញល្បាតពួនស្ទាក់ក្នុងភូមិសាស្ត្របានប្រទះឃើញបុរសខាងលើរួមនឹងមិត្តភក្ដិជិះម៉ូតូហ្សូ៊ម័រអុិចគ្នា២នាក់ និងម្នាក់ទៀតជិះម៉ូតូហុងដាឌ្រីមសេ១២៥តែម្នាក់ឯង ។

ប្រភពដដែលបន្តថា ដោយមានការសង្ស័យ នគរបាលបានហៅឱ្យឈប់ ដើម្បីត្រួតពិនិត្យ បែរជាបុរសខាងលើ រួមនឹងបក្សពួកបន្ថែមល្បឿនកាន់តែលឿនគេចខ្លួន តាំងពីក្នុងភូមិសាស្ត្រខណ្ឌដង្កោ រហូតដល់ភូមិសាស្ត្រខណ្ឌមានជ័យ ត្រង់ចំណុចផ្សារដីថ្មី ក្នុងសង្កាត់ស្ទឹងមានជ័យ៣ខណ្ឌមានជ័យ ។ ខណៈនោះ ដោយមានការសហការរវាងនគរបាលព្រហ្មទណ្ឌខណ្ឌដង្កោ និងនគរបាលប៉ុស្តិ៍ស្ទឹងមានជ័យ៣ ហើយពេលនោះបុរសខាងលើដកកាំភ្លើងខ្លីម៉ាកឡុក បាញ់ឡើងលើចំនួន៤គ្រាប់ ដើម្បីគំរាមមកលើសមត្ថកិច្ចផង ក៏ត្រូវសមត្ថកិច្ចបាញ់ការពារខ្លួនវិញ ។

ពេលនោះ មិនដឹងជាគ្រាប់កាំភ្លើងខាងណាខាងណីឡើយ បានហោះទៅត្រូវចំភ្លៅខាងស្តាំរបស់បុរសខាងលើ បណ្តាលឲ្យដួលរងរបួសធ្ងន់ និងត្រូវបានសមត្ថកិច្ចឃាត់ខ្លួនភ្លាមៗ ចំណែក២នាក់ទៀត គេចខ្លួនបាត់ស្រមោល ៕