ខេត្តសៀមរាប ៖ អដ្ឋិធាតុលោកសាស្ត្រាចារ្យវេជ្ជបណ្ឌិត Beat Richner អតីតស្ថាបនិកមន្ទីរពេទ្យ គន្ធ បុប្ផា បានយកទៅដល់អាកាសយានដ្ឋានអន្តរជាតិសៀមរាប នៅវេលាម៉ោង៨និង០០នាទីព្រឹក ថ្ងៃទី៥ ខែធ្នូ ឆ្នាំ២០១៨ ដែលជាបំណងប្រាថ្នាចុងក្រោយមុនពេលស្លាប់របស់លោកសាស្ត្រចារ្យវេជ្ជបណ្ឌិត Beat Richner ដោយមានអ្នកកាន់ធាតុដោយលោកសាស្ត្រចារ្យ យ៉ៃ ចន្ទនា ប្រធានមន្ទីរពេទ្យគន្ធបុប្ផាសៀមរាបហែរចេញពីព្រលានយន្តហោះ ។
ហើយកាត់តាមដងផ្លូវជាតិលេខ៦ដល់ស្តុបសុខា បត់ឆ្វេងកាត់តាមដងផ្លូវស៊ីវុត្ថាឆ្ពោះទៅរង្វង់មូលវត្តដំណាក់ រួចហែរកាត់តាមដងស្ទឹងសៀមរាបពីខាងកើតរហូតឡើងមករង្វង់មូលព្រះរាជដំណាក់មុខព្រះអង្គចេក ព្រះអង្គចម រួចសំដៅទៅកាន់ចេតិយនៅមន្ទីរពេទ្យគន្ធបុប្ផាខេត្តសៀមរាប ក្នុងក្រុងសៀមរាប ។
ពីធីដង្ហែនេះស្ថិតក្រោមអធិបតីភាពដ៏ខ្ពង់ខ្ពស់បំផុតរបស់សម្តេចចៅហ្វាវាំង វរវៀងជ័យ អធិបតីស្រីង្គារ គង់ សំអុល និង អមដំណើរ ដោយគណប្រតិភូជាន់ខ្ពស់ និងមន្ត្រីរាជការជំវិញខេត្ត, ព្រះសង្ឃ, តាជី យាយជី និងសិក្សានុសិស្ស ព្រមទាំងបងប្អូនប្រជាពលរដ្ឋឈរកាន់ ទៀន ធូប ផ្កា អមតាមផ្លូវតាំងពីព្រលានយន្តហោះរហូតដល់ចេតិយនៅមន្ទីរពេទ្យគន្ធបុប្ផាខេត្តសៀមរាប យ៉ាងច្រើនកុះករ ដូចមានបញ្ជាក់ក្នុងសេចក្តីជូនដំណឹងខាងក្រោមនេះផងដែរ ។
សេចក្តីជូនដំណឹងស្តីពីការដង្ហែអដ្ឋិធាតុលោកសាស្ត្រាចារ្យវេជ្ជបណ្ឌិត Beat Richner មកតម្កល់ទុកក្នុងចេតិយនៅមន្ទីរពេទ្យ គន្ធ បុប្ផា ខេត្តសៀមរាបនាថ្ងៃទី៦ ខែធ្នូ ឆ្នាំ២០១៨ ស្អែកនេះ ព្រះករុណាជាម្ចាស់ជីវិតតម្កល់លើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហា ក្សត្រ នៃព្រះរាជណាចក្រកម្ពុជា និងសម្តេចមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល យាងចូលរួមពិធីបង្សកូល ឧទ្ទិសកុសលផលបុណ្យជូនដួងវិញ្ញាណក្ខន្ធលោកសាស្ត្រាចារ្យវេជ្ជបណ្ឌិត Beat Richner អតីតស្ថាបនិកមន្ទីរពេទ្យគន្ធបុប្ផា ។
ដើម្បីជាការចូលរួមសំដែងនូវទឹកចិត្តគោរពស្រឡាញ់ចំពោះការពលីគ្រប់បែបយ៉ាងស្ទើរពេញមួយជីវិតរបស់លោកជាមួយប្រជាជនកម្ពុជា រដ្ឋបាលខេត្ត សូមគោរពអញ្ជើញលោក លោកជំទាវ លោក លោកស្រី និងសាធារណជន ចូលរួមឈរអមសងខាងផ្លូវដូចបានបញ្ជាក់ ដោយសំលៀកបំពាក់ អាវស ខោខៀវ ឬខ្មៅ ។
គួរបញ្ជាក់ផងដែរថា លោកសាស្ត្រាចារ្យវេជ្ជបណ្ឌិត Beat Richner អតីតស្ថាបនិកមន្ទីរពេទ្យគន្ធបុប្ផា បានស្លាប់នៅទីក្រុងសេរិច នៃប្រទេសស្វីស កាលពីថ្ងៃទី៩ ខែកញ្ញា ឆ្នាំ២០១៨ ៕
ចែករំលែកព័តមាននេះ