រាជធានីភ្នំពេញ ៖ ជនមិនស្គាល់មុខបានយកកង់ឡានចាស់ៗជាច្រើនទៅដាក់គដុត ដើម្បីយកដែកលក់អេតចាយបង្កឲ្យមានការឆាបឆេះហុយផ្សែងខ្មៅងងឹតពេញមេឃ បណ្ដាលឲ្យមានការភ្ញាក់ផ្អើលដល់អាជ្ញាធរ និងសមត្ថកិច្ចព្រមទាំងប្រជាពលរដ្ឋនៅក្នុងខណ្ឌដង្កោដោយស្មានថា អគ្គិភ័យឆាបឆេះលំនៅដ្ឋាន ឬទីតាំងណាមួយ ។ ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង២រសៀល…
រាជធានីភ្នំពេញ ៖ ជនមិនស្គាល់មុខបានយកកង់ឡានចាស់ៗជាច្រើនទៅដាក់គដុត ដើម្បីយកដែកលក់អេតចាយបង្កឲ្យមានការឆាបឆេះហុយផ្សែងខ្មៅងងឹតពេញមេឃ បណ្ដាលឲ្យមានការភ្ញាក់ផ្អើលដល់អាជ្ញាធរ និងសមត្ថកិច្ចព្រមទាំងប្រជាពលរដ្ឋនៅក្នុងខណ្ឌដង្កោដោយស្មានថា អគ្គិភ័យឆាបឆេះលំនៅដ្ឋាន ឬទីតាំងណាមួយ ។
ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង២រសៀល ថ្ងៃទី៤ ខែធ្នូ ឆ្នាំ២០១៨ ស្ថិតក្នុងដីឡូត៍របស់លោកឧកញ៉ា ម៉ៅ សុផល ទល់មុខក្រុមហ៊ុនស៊ិនទ្រី ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។
តាមប្រភពព័ត៌មានបានឲ្យដឹងថា នៅមុនពេលកើតហេតុមានជនមិនស្គាល់អត្តសញ្ញាណ១ក្រុមបានយកសំបកកង់រថយន្តជាច្រើនទៅដាក់គនៅក្នុងដីឡូត៍ខាងលើបន្ទាប់មកបានដុតបង្កឲ្យមានការឆាបឆេះយ៉ាងសន្ធោរសន្ធៅ និងមានផ្សែងហុយឡើងលើខ្មៅឃ្មួលខ្មាញ់តែម្ដង ។ ខណៈពេលឃើញមានផ្សែងហុយកប់អាកាសបែបនេះអាជ្ញាធរ និងសមត្ថកិច្ចព្រមទាំងប្រជាពលរដ្ឋទូទាំងខណ្ឌដង្កោមានការភ្ញាក់ផ្អើលយ៉ាងខ្លាំងព្រោះស្មានថា ភ្លើងឆេះផ្ទះ ឬឆេះទីតាំងក្រុមហ៊ុនរោងចក្រសហគ្រាសកន្លែងណាមួយ ហើយបាននាំគ្នាចេញអន្តរាគមន៍ទៅកាន់កន្លែងកើតហេតុភ្លាមៗដែរ ។
ប្រភពដដែលបានបន្តទៀតថា មិនតែប៉ុណ្ណោះអាជ្ញាធរ និងសមត្ថកិច្ចបាននាំយករថយន្តពន្លត់អគ្គិភ័យ១គ្រឿងទៅជាមួយផងដែរលុះពេលទៅដល់ទើបដឹងថា ជាភ្លើង និងផ្សែងដែលជនមិនស្គាល់មុខដុតសំបកកង់រថយន្ត ដើម្បីយកដែកលួសលក់អេតចាយ ។ ប៉ុន្តែខណៈនោះអ្នកដុតបានគេចខ្លួនបាត់ទៅហើយ បន្ទាប់មករថយន្តពន្លត់អគ្គិភ័យបានបាញ់ពន្លត់រហូតរលត់ទៅវិញទាំងស្រុង ។ តែមិនមានការឆ្លងរាលដាលដល់ផ្ទះប្រជាពលរដ្ឋដែលនៅក្បែរៗនោះឡើយ ហើយសមត្ថកិច្ចកំពុងធ្វើការស្រាវជ្រាវ ដើម្បីរកមុខជនមិនស្គាល់មុខ ដែលធ្វើសកម្មភាពដុតកង់ឡានដែលបង្កអោយមានការភ្ញាក់ផ្អើល និងប៉ះពាល់ដល់បរិស្ថាន ដើម្បីយកមកធ្វើការអប់រំ ៕
ចែករំលែកព័តមាននេះ