រាជធានីភ្នំពេញ ៖ ថ្ងៃទី៥ ខែធ្នូ គឺជាទិវាអ្នកស្ម័គ្រចិត្តអន្តរជាតិ ដែលបានបង្កើតឡើងដោយអង្គការសហប្រជាជាតិនាឆ្នាំ១៩៨៥ ដើម្បីលើកទឹកចិត្តដល់ការទទួលស្គាល់ជាសកល និងការអបអរសាទរដល់អ្នកស្ម័គ្រចិត្ត និងការរួមចំណែករបស់ពួកគេចំពោះការអភិវឌ្ឍអន្ដរជាតិ។ ប្រធានបទប្រចាំឆ្នាំនេះគឺ «អ្នកស្ម័គ្រចិត្តកសាងសហគមន៍រឹងមាំ»។ នេះបើយោងតាមប្រកាសរបស់ស្ថានទូតអូស្ត្រាលីប្រចាំក្រុងភ្នំពេញ។
សហគមន៍រឹងមាំ គឺជាផ្នែកមួយដ៏សំខាន់នៃគោលដៅអភិវឌ្ឍប្រកបដោយចីរភាព (SDGs) ដែលជាគោលដៅសកលក្នុងការកាត់បន្ថយភាពក្រីក្រ ធ្វើឱ្យប្រសើរឡើងនូវសមភាព និងកាត់បន្ថយការប្រែប្រួលអាកាសធាតុត្រឹមឆ្នាំ២០៣០។ អ្នកស្ម័គ្រចិត្ត ត្រូវបានគេទទួលស្គាល់ថាជាចំណុចស្នូលដើម្បីសម្រេចបាននូវ គោលដៅអភិវឌ្ឍប្រកបដោយចីរភាព និងអាចចូលរួមយ៉ាងសកម្មនៅក្នុងការអភិវឌ្ឍដែលបង្កើតឡើងដោយប្រជាពលរដ្ឋក្នុងស្រុកនៅទូទាំងពិភពលោក។
មន្ត្រីស្ថានទូតបានឲ្យដឹងថា នាពេលបច្ចុប្បន្ន កម្ពុជាមានអ្នកស្ម័គ្រចិត្តអូស្ត្រាលីចំនួន ២៥រូបកំពុងធ្វើការជាមួយអង្គការដៃគូចំនួន២១ នៅក្នុងវិស័យនានា ដែលបានរួមចំណែកចែករំលែកជំនាញ និងបទពិសោធន៍ចំពោះការអភិវឌ្ឍនៅកម្ពុជា។ អ្នកស្ម័គ្រចិត្តអូស្ត្រាលី ធ្វើការជាមួយរដ្ឋាភិបាល វិស័យឯកជន អង្គការក្រៅរដ្ឋាភិបាលនិងក្រុមសហគមន៍ ដើម្បីគាំទ្រដល់គម្រោងនានាដែលគ្រប់គ្រង និងអនុវត្តដោយពលរដ្ឋក្នុងតំបន់។
ឯកអគ្គរាជទូតអូស្ត្រាលីប្រចាំកម្ពុជា Angela Corcoran ថ្លែងថា៖ «អ្នកស្ម័គ្រចិត្តអូស្ត្រាលីគ្រប់រូប នាំយកអ្វីដែលលេចធ្លោដល់ការងារ និងសហគមន៍ដែលពួកគេរស់នៅក្នុងប្រទេសកម្ពុជា ប៉ុន្តែពួកគេក៏បានស្វែងយល់រៀនសូត្រច្រើនដែរ»។
ឯកអគ្គរាជទូតអូស្ត្រាលី Angela Corcoran បន្ថែមថា៖ «ពួកគេស្វែងយល់អំពីវប្បធម៌ និងគុណតម្លៃរបស់ កម្ពុជា អំពីម្ហូបអាហារ និងជីវិតរស់នៅប្រចាំថ្ងៃក្នុងស្រុក ហើយសំខាន់បំផុតនោះគឺអំពីប្រជាជនកម្ពុជា។ ប្រជាជន គឺជាស្នូលដ៏សំខាន់របស់ការងារស្ម័គ្រចិត្ត ហើយបទពិសោធន៍របស់អ្នកស្ម័គ្រចិត្តអូស្ត្រាលីក្នុងអំឡុងពេលធ្វើការ និងស្នាក់នៅក្នុងប្រទេសកម្ពុជា បានផ្លាស់ប្តូរការយល់ឃើញរបស់ពួកគេជារៀងរហូត»។
រដ្ឋាភិបាលអូស្ត្រាលី បានជួយគាំទ្រដល់កិច្ចការស្ម័គ្រចិត្តអន្តរជាតិនៅកម្ពុជាអស់រយៈពេលជាច្រើនឆ្នាំមកហើយ។ កម្មវិធីអ្នកស្ម័គ្រចិត្តអូស្ត្រាលី បានបន្តកាសាងប្រវត្តិសាស្ត្រដ៏យូរអង្វែងនេះ។ កម្មវិធីនេះ ផ្តល់ឱកាសដល់អ្នកជំនាញជាពលរដ្ឋអូស្ត្រាលី ឲ្យធ្វើការស្ម័គ្រចិត្តនៅក្នុងចំណោមប្រទេសចំនួន២៦ នៅក្នុងតំបន់ ព្រមទាំងរួមចំណែកក្នុងកម្មវិធីជំនួយអភិវឌ្ឍន៍របស់រដ្ឋាភិបាលអូស្ត្រាលី។ ក្នុងឆ្នាំ ២០១៨ អ្នកស្ម័គ្រចិត្តអូស្ត្រាលីច្រើនជាង៨០០រូប បានរួមចំណែកក្នុងគម្រោងអភិវឌ្ឍប្រកបដោយចីរភាពនៅទូទាំងពិភពលោក។
ទិវាអ្នកស្ម័គ្រចិត្តអន្តរជាតិ គឺជាទិវាមួយដើម្បីទទួលស្គាល់សារៈសំខាន់នៃការរួមចំណែករបស់អ្នកស្ម័គ្រចិត្តទាំងពេលអតីតកាល បច្ចុប្បន្ន និងអនាគត។ អូស្ត្រាលី មានមោទនភាពក្នុងការគាំទ្រដល់អ្នកស្ម័គ្រចិត្ត អូស្ត្រាលីដើម្បីធ្វើការនៅកម្ពុជា៕
ចែករំលែកព័តមាននេះ