រាជធានីភ្នំពេញ ៖ អតីតឧត្តមក្រុមប្រឹក្សាគណបក្សសង្គ្រោះជាតិបានអះអាងថា គណបក្សនេះបានកំពុងតែបែកក្បាលបែកខ្លួន និងកន្ទុយហើយ ដោយសារតែថ្នាក់ដឹកនាំចង់បានអំណាច ។
លោក គង់ គាំង អតីតឧត្តមក្រុមប្រឹក្សាគណបក្សសង្គ្រោះជាតិបានលើកឡើងយ៉ាងដូច្នេះថាគិតមិនត្រូវយល់មិនច្បាស់ និងធ្វើអ្វីមិនកើត គឺជាទ្រព្យជាប់ខ្លួនរបស់លោកសម រង្ស៊ី និងគូកននោះទេ ។ លោកបានបន្តថា ប្រធានចលនា ឬប្រធានស្តីទី CNRP វាដូចតែគ្នាទេ ។ តែផ្ទៃក្នុង CNRP មិនទទួលស្គាល់ផងឲ្យអន្តរជាតិណាគេទទួលស្គាល់ទៅកើត ។ លោកថា នៅក្នុងស ន្និសីទកម្រិតពិភពលោកលើកទី១របស់អតីត CNRP ក្រៅប្រទេសកំណត់ថា សម រង្ស៊ី និងកឹម សុខា ជាមនុស្សតែមួយ ហើយបានហៅអ្នកប្រឆាំងសម រង្ស៊ីថា ប្រឆាំងកឹម សុខា និងអ្នក ប្រឆាំងកឹម សុខា ថាប្រឆាំងសម រង្ស៊ី ។
លោកបញ្ជាក់ថា «សម រង្ស៊ី និងសន្និសីទថា លោក កឹម សុខា គ្មានសេរីភាពមតិរបស់គាត់មិនយកជាបានការ ចុះមតិកឹម មនោវិទ្យា និងអ្នកក្រៅប្រទេសដែលមិនគាំទ្រសម រង្ស៊ី និងសន្និសីទពិតជាប្រឆាំងលោក កឹម សុខា មែនដែរឬ ? ។បក្សប្រឆាំងក្បាលបែក ខ្លួនបែក កន្ទុយបោក» ។ ការលើកឡើងរបស់អតីតមន្ត្រីជាន់ខ្ពស់គណបក្សប្រឆាំងនេះ បន្ទាប់ពីលោកសម រង្ស៊ី បានប្រកាសទទួលធ្វើជាប្រធានស្តីទីគណបក្សសង្គ្រោះជាតិ នៅក្នុងសន្នីសីទ កាលពីថ្ងៃទី១-២ ធ្នូ នៅសហរដ្ឋអាមេរិក ។
លោក ជួន ជូងី អតីតមេធាវីការពារក្តីឲ្យគណបក្សសង្គ្រោះជាតិប្រកាសគាំទ្រចំពោះលោក សម រង្ស៊ី មកដឹកនាំគណបក្សសង្គ្រោះជាតិវិញ ។ លោកមេធាវីបានបញ្ជាក់ថា «យើងគូរពិចារណាបក្សអាចដំណើរការបាន និងខ្លាំងបានមិនអាចមិនមានមេដឹកនាំបានទេ ។ គំនិតជ្រើសរើសអនុប្រធានច្រើនរូប គឺជាការត្រៀបបេក្ខជនទៅធ្វើជាប្រធានបន្តបន្ទាប់ក្នុងករណីដែលមេបក្សមិនអាចធ្វើអ្វីកើត» ។ លោកបន្តថា លោក កឹម សុខា ត្រូវជាប់ឃុំមិនអាចដឹកនាំបក្សបានប៉ុន្តែបែរជាមិនព្រមជ្រើសរើសមេបក្សថ្មី តើមានន័យថាម៉េច ? បើមិនមានមេដឹកនាំ តើបក្សធ្វើនយោបាយរបៀបម៉េច ? តុលាការចាប់លោក កឹម សុខា ដាក់ពន្ធនាគារ គឺដើម្បីកុំឲ្យគាត់ដឹកនាំបក្សបាន ។ ហើយបើមិនព្រមរើសមេបក្សថ្មីគឺ CPP អរគុណអ្នកហើយ ។ រារាំងមិនឲ្យរើសមេបក្សថ្មី គឺចង់ទុកឲ្យបក្សគាំងអសកម្ម ឬយ៉ាងម៉េច ? ។
គួរបញ្ជាក់ថា ទោះបីជាលោក សម រង្ស៊ី ប្រកាសទទួលធ្វើជាប្រធានស្តីទីគណបក្សសង្គ្រោះជាតិយ៉ាងណាក្តីក៏លោក កឹម សុខា និងបក្ខពួកលោកមិនបានគាំទ្រនោះទេ ។ លោកបន្ថែមថា ក្នុងលិទ្ធប្រជាធិបតេយ្យអ្នកគាំទ្រសម្លេងច្រើន គឺទទួលជ័យជំនះ ៕
ចែករំលែកព័តមាននេះ