ខេត្តកំពត ៖ នារីម្នាក់ជាពេទ្យឆ្មបបានប្តឹងសមត្ថកិច្ច ដោយចោទភិក្ខុ១អង្គគង់នៅវត្តអង្គចៅពញា ក្នុងស្រុកឈូក ពាក់ព័ន្ធនឹងករណីសេពមេថុន ហើយមិនទទួលខុសត្រូវ ថែមទាំងគំរាមបង្ហោះខ្លឹមសារស្នេហាលួចលាក់ ធ្វើឲ្យប៉េះពាល់ដល់កិត្តិយស និងសេចក្តីថ្លៃថ្នូររបស់នាងថែមទៀត ។ ចំពោះរឿងរ៉ាវនេះ កាលពីថ្ងៃទី២៩ ខែវិច្ឆិកាកន្លងទៅ ភិក្ខុនាម សូ ណូ ព្រះជន្មជាង៣០ឆ្នាំ គង់នៅវត្តអង្គចៅពញា ក្នុងស្រុកឈូក ត្រូវបាន
សមត្ថកិច្ចនិមន្តទៅសាកសួរនៅប៉ុស្តិ៍នគរបាលប៉ុស្តិ៍ ទាក់ទិននឹងពាក្យបណ្តឹងរបស់នារីម្នាក់ជាពេទ្យឆ្មប នៅក្នុងរឿងអាស្រូវស្នេហារបស់នាងហើយមិនទទួលខុសត្រូវ ។
ពាក្យបណ្តឹងនោះរៀបរាប់ថា កាលពីថ្ងៃទី២១ ខែមករា ឆ្នាំ២០១៣ វេលាម៉ោងប្រហែល៧យប់ មានទូរស័ព្ទមួយខ្សែ បានហៅចូលទូរស័ព្ទនាងរួចសួរថា ផ្ទះនៅឯណា? ឯនាងឆ្លើយវិញថា នៅភូមិត្រពាំងល្ពៅ អ្នកណាគេហ្នឹង? តែខ្សែម្ខាងនោះបានឆ្លើយយ៉ាងរហ័សថា មិនបាច់ចង់ដឹងទេ ដឹងត្រឹមស្គាល់ទៅបានហើយ ។ រួចខ្សែទូរស័ព្ទនោះ បានសួរពីនេះពីនោះអស់រយៈពេលប្រមាណ៣០នាទីទើបបិទ ។ លុះនៅម៉ោង៨យប់ លេខដដែល បានទូរស័ព្ទមកម្តងទៀត ហើយប្រាប់នាងថា គេឈ្មោះរិទ្ធិ ជាកូនម្ចាស់បុរីប៉េងហួត ។
ដើមបណ្តឹងបន្តថា ចាប់តាំងពីម៉ោង៨យប់ ខ្សែទូរស័ព្ទម្ខាងនោះ បាននាំនាងនិយាយលេងទល់ភ្លឺ ។ ចាប់ពីពេលនោះមក នាងនិងគេតែងតែនិយាយគ្នាលេងតាមទូរស័ព្ទជារៀងរាល់ថ្ងៃ ហើយនិយាយម្តងៗរាប់ម៉ោងរហូតក្ដៅទូរស័ព្ទទើបឈប់ ។ រំលងបានប្រមាណ២ខែ នាងនិងបុរសនោះមានចិត្តស្រឡាញ់គ្នា តែមិនទាន់បានជួបមុខគ្នាយ៉ាងម៉េចនៅឡើយទេ តែបុរសនោះបានសុំរូបថតនាង២សន្លឹក តែនាងសុំវិញគេអត់ឲ្យទេ ។
លុះនៅថ្ងៃទី១៨ ខែវិច្ឆិកា ឆ្នាំ២០១៣ ទើបនាងស៊ើបដឹងថា ឈ្មោះរិទ្ធិ គឺជាភិក្ខុសង្ឃនាម សូ ណូ គង់នៅវត្តអង្គចៅពញា ស្ថិតក្នុងស្រុកឈូក ខេត្តកំពត ។ នៅថ្ងៃទី១៩ ខែវិច្ឆិកា ឆ្នាំ២០១៣ វេលាម៉ោងប្រហែល១១ព្រឹក នាងនិងប្អូនស្រីជីដូនមួយបានទៅជួបភិក្ខុនោះនៅក្នុងវត្ត ។ ពេលនោះភិក្ខុ សូ ណូ បានប្រាប់ឲ្យនាងទៅលេងផ្ទះម្តាយឪពុកលោកនៅជាប់វត្តសិន ទើបលោកនិមន្តទៅតាមក្រោយ ។
ចាប់តាំងពីពេលនោះមក រូបនាងនិងភិក្ខុសូ ណូ ចាប់ផ្តើមមានភាពស្និទ្ធស្នាលនឹងគ្នាជាងមុនទៀត លុះមួយខែក្រោយមកភិក្ខុ សូ ណូ បាននិមន្តទៅភ្នំពេញ ហើយទូរស័ព្ទហៅនាងឲ្យទៅជួបនៅវត្តបទុមវតី វេលាម៉ោង២រសៀល ។ ពេលនោះ ភិក្ខុ សូ ណូ បានលួងលោមនាងរួមភេទ តែនាងប្រកែកថា កុំធ្វើអុីចឹងនៅក្នុងវត្តក្រែងមានគេឃើញ ។ ប៉ុន្តែភិក្ខុ សូ ណូ មានដីកាថា មិនអីទេនៅវត្តនេះ គេដឹងរឿងយើងទាំងពីរនាក់អស់ហើយ គ្មានអ្នកណាគេរំខានយើងទេ ! និយាយចប់ភិក្ខុ សូ ណូ បានចាប់នាងរួមភេទ រហូតបានសម្រេចដោយស្ម័គ្រចិត្ត ។
ពាក្យបណ្តឹងបន្តទៀតថា រំលងបានប្រហែល២ខែ ភិក្ខុ សូ ណូ បានទូរស័ព្ទហៅនាងឲ្យទៅជួបនៅវត្តអង្គចៅពញា ហើយនាងក៏ទៅតាមការណាត់ ដែលពេលទៅដល់ រូបនាងនិងភិក្ខុ សូ ណូ ក៏បានរួមភេទជាមួយគ្នាជាលើកទី២នៅក្នុងកុដិតែម្តង ។ លុះប្រមាណ១ខែក្រោយមក ភិក្ខុ សូ ណូ បានទូរស័ព្ទ ហៅនាងឲ្យទៅជួបនៅក្នុងវត្តម្តងទៀត ក្នុងគោលបំណងតែម្យ៉ាង គឺរួមភេទដដែល តែពេលនោះនាងប្រកែក ស្រាប់តែភិក្ខុនេះចោទថា នាងមានប្រុសថ្មីនៅភ្នំពេញព្រមទាំងគំរាមចង់បង្ហោះរូបភាពដែលនាងថតឲ្យពីពេលមុននោះនៅលើហ្វេសប៊ុកទៀតផង ។ ដោយសារនាងខ្លាចការបង្ហោះរូបនៅលើហ្វេសប៊ុកធ្វើឲ្យប៉ះពាល់ដល់កិត្តិយស
ក៏សុខចិត្តប្រគល់ខ្លួនប្រាណឲ្យភិក្ខុ សូ ណូ រួមភេទទាំងបង្ខំទៀតទៅ ។
ពាក្យបណ្តឹងបន្តថា ចាប់តាំងពីពេលនោះមក ភិក្ខុ សូ ណូ ចេះតែទូរស័ព្ទហៅនាងទៅរួមភេទ ហើយនាងបានប្រកែក តែភិក្ខុនោះចេះតែគំរាមរហូតពេលខ្លះនាងទ្រាំទៅ ធ្វើយ៉ាងណាដើម្បីការពារកិត្តិយស ។ រូបនាងនិងក្រុមគ្រួសារមានពេលខ្លះ ត្រូវភិក្ខុនោះជេរប្រមាថយ៉ាងធ្ងន់តាមទូរស័ព្ទ ដែលពេលខ្លះនាងបានថតជាសំឡេងទុកជាភ័ស្តុតាងទៀតផង ។
ជាចុងក្រោយ ស្រាប់តែភិក្ខុអង្គនោះ បានយករូបនាងទៅបង្ហោះលើអាខោនហ្វេសប៊ុករបស់ខ្លួនមែន ហើយនៅតែបន្តបង្ហោះ ទោះបីជាមានការនិយាយគ្នាយ៉ាងណាក្តី ។ ចំណុចដូចពាក្យបណ្តឹងខាងលើនេះហើយ ដែលធ្វើឲ្យនាងទ្រាំលែងបាន ទើបសម្រេចចិត្តដាក់ពាក្យបណ្តឹងទៅសមត្ថកិច្ចឲ្យជួយចាត់ការភិក្ខុអង្គនេះ ។ ជាមួយនេះ នាងបានទាមទារប្រាក់សំណងជំងឺចិត្តចំនួន៥ម៉ឺនដុល្លារអាមេរិក និងសុំឲ្យស្ថាប័នមានសមត្ថកិច្ចជួយរកយុត្តិដល់នាងដែលជាជនរងគ្រោះ ។
សេចក្តីរាយការណ៍បន្តថា ក្រោយពីសាកសួររួចហើយ សមត្ថកិច្ចក៏បានប្រគល់ភិក្ខុអង្គនេះទៅឲ្យខាងធម្មការស្រុក ដើម្បចាត់ការតាមវិន័យសង្ឃ ប៉ុន្តែដោយខាងធម្មការស្រុកមិនមានអានុភាពគ្រប់គ្រាន់ទៅលើការសម្រេច ក៏បញ្ជូនទៅឲ្យខាងមន្ទីរធម្មការនិងសាសនាខេត្តបន្តនីតិវិធី ។
ការរៀបរាប់ខាងលើនេះ គឺយោងតាមពាក្យបណ្ដឹងរបស់នារីជាពេទ្យឆ្មបប៉ុណ្ណោះ ៕
ចែករំលែកព័តមាននេះ