រាជធានីភ្នំពេញ ៖ ជនសង្ស័យ៤នាក់រួមជាមួយថ្នាំញៀន៨៦កញ្ចប់ ត្រូវបានកម្លាំងកងរាជអាវុធហត្ថខណ្ឌមានជ័យធ្វើការបង្ក្រាបបាន បន្ទាប់ពីកម្លាំងជំនាញជិះម៉ូតូល្បាតហើយប្រទះឃើញសង្ស័យទើបឆែកឆេររកឃើញថ្នាំញៀន នៅចំណុចប្រឡាយស្ទឹងមានជ័យ ស្ថិតក្នុងក្រុមទី២ ភូមិមានជ័យ១ សង្កាត់ស្ទឹងមានជ័យទី១ ខណ្ឌមានជ័យ…
រាជធានីភ្នំពេញ ៖ ជនសង្ស័យ៤នាក់រួមជាមួយថ្នាំញៀន៨៦កញ្ចប់ ត្រូវបានកម្លាំងកងរាជអាវុធហត្ថខណ្ឌមានជ័យធ្វើការបង្ក្រាបបាន បន្ទាប់ពីកម្លាំងជំនាញជិះម៉ូតូល្បាតហើយប្រទះឃើញសង្ស័យទើបឆែកឆេររកឃើញថ្នាំញៀន នៅចំណុចប្រឡាយស្ទឹងមានជ័យ ស្ថិតក្នុងក្រុមទី២ ភូមិមានជ័យ១ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ កាលពីវេលាម៉ោង៩ និង១៥នាទីព្រឹកថ្ងៃទី២ ខែធ្នូ ឆ្នាំ២០១៨ ។
ជនសង្ស័យទាំង៤នាក់ ដែលត្រូវបានឃាត់ខ្លួនរួមមាន១-ឈ្មោះទួន ភារៈ ភេទប្រុស អាយុ១៦ឆ្នាំ មុខរបរមិនពិតប្រាកដ ២-ឈ្មោះយៀន ហួរ ភេទប្រុស អាយុ៤៨ឆ្នាំ មុខរបរមិនពិតប្រាកដ ៣-ឈ្មោះម៉ែន រស្មីបញ្ញ ហៅម៉ូវ ភេទប្រុស អាយុ២៥ឆ្នាំ មុខរបរសន្តិសុខ ។ ជនសង្ស័យទាំង៣នាក់ ស្នាក់នៅភូមិមានជ័យ១ សង្កាត់ស្ទឹងមានជ័យទី១ និង៤-ឈ្មោះ ហេង គិរី ភេទប្រុស អាយុ២៦ឆ្នាំ មុខរបររើសអេតចាយ ស្នាក់នៅម្ដុំផ្លូវម៉ៃដា ខណ្ឌសែនសុខ ។
មន្ត្រីកងរាជអាវុធហត្ថអោយដឹងថា នៅវេលាខាងលើ គឺកម្លាំងកងរាជអាវុធហត្ថបានពង្រាយកម្លាំងចេញល្បាតពួនស្ទាក់ក្នុងមូលដ្ឋាន ដើម្បីការពារសន្តិសុខសុវត្ថិភាពជូនពលរដ្ឋក្នុងមូលដ្ឋាន ។
លុះល្បាតដល់ចំណុចខាងលើ ស្រាប់តែប្រទះឃើញជនសង្ស័យទាំង៤នាក់កំពុងឈរពពាក់ពពួនគ្នា ដោយមើលទៅគួរអោយសង្ស័យ កម្លាំងអាវុធហត្ថបានធ្វើការឆែកឆេរខ្លួន ប៉ុន្តែពេលនោះជនសង្ស័យម្នាក់ក្នុងចំណោមអ្នកទាំង៤បានបោះកញ្ចប់ថង់មួយចោល ហើយនាំគ្នាប្រុងរត់គេចពីកម្លាំងអាវុធហត្ថ តែត្រូវកម្លាំងអាវុធហត្ថចាប់ក្របួចភ្លាមៗនៅហ្នឹងកន្លែង ។
ចំណែកថង់ដែរក្រុមជនសង្ស័យបោះចោលនោះ កម្លាំងជំនាញបានរើសយកមកស្រាយមើល ក៏ប្រទះឃើញសុទ្ធតែថ្នាំញៀន ទើបសម្រេចធ្វើការឃាត់ខ្លួនពួកគេទាំង៤នាក់តែម្តងទៅ ។
ក្នុងការឃាត់ខ្លួន កម្លាំងអាវុធហត្ថបានដកហូតបានថ្នាំញៀនក្រាមសថ្លា ហៅម៉ាទឹកកកចំនួន៨៦កញ្ចប់ រួមជាមួយទូរស័ព្ទ២គ្រឿងផងដែរ ។
បច្ចុប្បន្ន ជនសង្ស័យទាំង៤នាក់ រួមជាមួយវត្ថុតាង ត្រូវបានបញ្ជូននទៅកាន់ការិយាល័យប្រឆាំងបទល្មើសគ្រឿងញៀន នៃទីបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីសាកសួរនាំបន្តនីតិវិធី ៕
ចែករំលែកព័តមាននេះ